దంచికొట్టిన వాన.. రాష్ట్రవ్యాప్తంగా కుండపోత వర్షాలు

బంగాళాఖాతంలో ఉపరితల ఆవర్తనం ప్రభావంతో రాష్ట్రవ్యాప్తంగా మంగళవారం రాత్రి నుంచి ఎడతెరిపిలేకుండా భారీ వర్షాలు కురుస్తున్నాయి. కుండపోత వానతో పల్లెలు, పట్టణాల్లోని లో తట్టు ప్రాంతాలు జలమయమయ్యా యి. జలాశయాలు నిండుకుండలను తలపిస్తున్నాయి.

• ములుగు జిల్లా వెంకటాపురంలో అత్యధికంగా 25.82 సెం.మీ వర్షపాతం
• 3 రోజులు అతిభారీ వర్షాలకు అవకాశం
• పలు జిల్లాలకు ఆరెంజ్‌, ఎల్లో అలర్ట్‌లు

నమస్తే తెలంగాణ నెట్‌వర్క్‌, జూలై 23 : బంగాళాఖాతంలో ఉపరితల ఆవర్తనం ప్రభావంతో రాష్ట్రవ్యాప్తంగా మంగళవారం రాత్రి నుంచి ఎడతెరిపిలేకుండా భారీ వర్షాలు కురుస్తున్నాయి. కుండపోత వానతో పల్లెలు, పట్టణాల్లోని లో తట్టు ప్రాంతాలు జలమయమయ్యా యి. జలాశయాలు నిండుకుండలను తలపిస్తున్నాయి. వాగులు, వంకలు, చెరువులు అలుగుపోస్తున్నాయి.

వరద నీరు ఉధృతంగా ప్రవహిస్తుండటంతో పలుచోట్ల రహదారులపై రాకపోకలు నిలిచిపోయాయి. రాష్ట్రంలోని ములుగు జి ల్లా వెంకటాపురంలో అత్యధికంగా 25.5 సెం. మీ వర్షపాతం నమోదైనట్టు హైదరాబాద్‌ వాతావరణ కేంద్రం ప్రకటించింది. 33 జిల్లాల్లోని మొత్తం 621 మండలాలకుగాను 586 మండలాల్లో వర్షాలు కురిసినట్టు వెల్లడించింది.

• ఉమ్మడి వరంగల్‌ జిల్లా వ్యాప్తంగా వర్షాలు విస్తారంగా కురుస్తున్నాయి. ములుగు జిల్లా ఏటూరునాగారం మండలంలో 18.51 సెంటీమీటర్ల అతిభారీ వర్షం పడింది. అడవిలోని దొడ్ల సమీపంలో జంపన్నవాగుతో పాటు పలు వాగులు, ఉధృతంగా ప్రవహిస్తున్నది.
• తాడ్వాయి-పస్రా మధ్యలోని 163వ జాతీయ రహదారిపై నుంచి జనగలంచ వాగు ప్రవహిస్తున్నది. గోవిందరావుపేట మండలంలో కోటకాల్వకు వరద పోటెత్తి గండి పడింది. చల్వాయిలో ఇండ్లలోకి వరద నీరు చేరింది.
• వరద ధాటికి వెంకటాపురం-భద్రాచలానికి రాకపోకలు నిలిచిపోయాయి. వెంకటాపురం మండలంలోని రాళ్లవాగును కలెక్టర్‌ దివాకర పరిశీలించారు. సమస్యలు ఉత్పన్నమైతే కలెక్టరేట్‌ టోల్‌ఫ్రీ నంబర్‌ 1800425709కు కాల్‌ చేసి సమాచారం అందించాలని సూచించారు.
• మహబూబాబాద్‌ జిల్లా కొత్తగూడ ఏజెన్సీలో రెండురోజులుగా కురుస్తున్న వర్షాలతో ప్రజలు అవస్థలు పడుతున్నారు.
• వాగులు పొంగిపోర్లడంతోపాటు వర్షాలతో కొన్ని గ్రామాలు అంధకారంలోకి వెళ్లిపోయాయి. కొత్తగూడ మండలంలోని మొండ్రాయిగూడెం, కొత్తపల్లి, బూర్కపెల్లి, కక్కెర్ల వాగులు పొంగిపొర్లుతున్నాయి.
• కొత్తగూడ మండలంలోని బూర్గుగుంపు గ్రామానికి చెందిన ఆగబోయిన నరేశ్‌ (30) కొత్తగూడలోని రాళ్లతిటే వాగులో చేపలు పట్టేందుకు వెళ్లి వరద ఉధృతిలో గల్లంతయ్యాడు. అధికారులు వాగు వద్దకు చేరుకొని గాలింపు ముమ్మరం చేశారు.
• ఉమ్మడి ఖమ్మం జిల్లాను బుధవారం మూడోరోజూ వర్షం ముంచెత్తింది. ఏజెన్సీ ప్రాంతంలో వాగులు వంకలు పొంగి ప్రవహిస్తున్నాయి. పలు రహదారులపైకి వరద నీరు చేరడంతో రాకపోకలకు అంతరాయం ఏర్పడింది. దుమ్ముగూడెం మండలం పర్ణశాల వద్ద సీతమ్మ నారచీరల ప్రాంతం గోదావరి వరద నీటితో మునిగిపోయింది. చిన్నగుబ్బల మంగి వాగు పొంగి ప్రవహిస్తున్నది.

• మణుగూరు మున్సిపాలిటీ పరిధిలోని సుందరయ్యనగర్‌, అశోక్‌నగర్‌, ఆదర్శనగర్‌, శ్రీశ్రీనగర్‌, భగత్‌సింగ్‌నగర్‌లోని ఇండ్లలోకి వరద నీరు చేరింది. కోడిపుంజుల వాగు, మెట్లవాగు, కట్లవాగు ఉధృతంగా పొంగిపొర్లడంతో పట్టణంలోకి భారీగా వరద నీరు వచ్చి చేరింది. ఎస్టీ బాలికల వసతి గృహంలోకి నీరు చేరడంతో విద్యార్థినులను అధికారులు సురక్షిత ప్రాంతాలకు తరలించారు.
• కరకగూడెం-బంగారుగూడెం గ్రామాల మధ్య ప్రధాన రహదారిపై వరద ఉధృతంగా ప్రవహిస్తుండడంతో అధికారులు వాహనాల రాకపోకలను నిలిపివేశారు. బట్టుపల్లి సమీపంలోని బూడిదవాగు ప్రధాన రహదారి కల్వర్టుపైకి భారీ వరద చేరుతుంది. కలవల నాగారం గ్రామంలో ఇండ్లలోకి వరద నీరు చేరడంతో ప్రజలు ఇబ్బందులు పడుతున్నారు. ఖమ్మం జిల్లా ఎర్రుపాలెం మండలంలోని పలు గ్రామాల్లో వరద నీరు పంట భూముల్లోకి చేరడంతో నష్టం వాటిల్లింది.
• ఖమ్మం జిల్లా చర్లపల్లి-గాదెపాడు మార్గమధ్యలోని రైల్వే అండర్‌ బ్రిడ్జి కింది నుంచి బుధవారం రేలకాయలపల్లి గ్రామానికి కారులో వెళ్తున్న కారేపల్లి వ్యవసాయాధికారి అశోక్‌కు పెను ప్రమాదం తప్పింది. ఆర్‌యూబీ కిందకు చేరిన వరద నీరు ఇంజిన్‌లోకి వెళ్లడంతో కారు ఆగిపోయింది. దీంతో వరద నీటిలో తేలియాడుతున్న కారును గమనించిన స్థానికులు వెంటనే వ్యవసాయాధికారి అశోక్‌ను బయటకు తీసి కాపాడారు.
• కుమ్రంభీం ఆసిఫాబాద్‌ జిల్లా బెజ్జూర్‌-సోమిని మార్గంలో కుశ్నపల్లి, సుస్మీర్‌ వాగులు పొంగడంతో ఇప్పలగూడ, మొగవెళ్లి, నాగేపల్లి సహా 12 గ్రామాల నుంచి మండల కేంద్రానికి రాకపోకలు నిలిచిపోయాయి. బెజ్జూర్‌లో మత్తడి వాగులో చిక్కుకున్న వ్యక్తిని రెవెన్యూ, పోలీసు అధికారులు స్థానికులతో కలిసి తాళ్లు కట్టి కాపాడారు.

• మంచిర్యాల జిల్లాలో భీమిని మండలంలోని చిన్న తిమ్మాపూర్‌ గ్రామ శివారులోని ఎర్రవాగులో మంగళవారం సాయంత్రం కన్నెపల్లి మండలం జంగంపల్లికి చెందిన బోర్‌కుంట రాజం ట్రాక్టర్‌తోపాటు వరదలో చిక్కుకున్నాడు. ట్రాక్టర్‌ను వదిలి వచ్చాడు. బుధవారం ట్రాక్టర్‌ను బయటకుతీశారు.
• ఏకధాటిగా కురుస్తున్న వర్షాల కారణంగా పెద్దపల్లి జిల్లాలోని సింగరేణిలో నాలుగు ఉపరితల గనుల్లో బొగ్గు ఉత్పత్తికి అంతరాయం ఏర్పింది. సాధారణంగా ఈ గనుల్లో రోజుకు 40 వేల టన్నుల బొగ్గు ఉత్పత్తి జరుగుతుంది.
• ఉమ్మడి కరీంనగర్‌ జిల్లా వ్యాప్తంగా పలుచోట్ల భారీ వర్షం కురిసింది. బుధవారం తెల్లవారుజాము నుంచి మధ్యాహ్నం వరకు వర్షం దంచికొట్టింది. కరీంనగర్‌ జిల్లా కేంద్రంలో లోతట్టు ప్రాంతాలన్నీ జలమయమయ్యాయి. కాలనీల్లో నీరు నిలిచింది.
• ఉమ్మడి మెదక్‌ జిల్లాలో మంగళవారం రాత్రి నుంచి బుధవారం మధ్యాహ్నం వరకు ఓ మోస్తరు వర్షం కురిసింది. రామాయంపేట పట్టణంలో మెదక్‌ -రామాయంపేట రోడ్డుపై విద్యుత్‌ స్తంభాలు విరిగిపడ్డాయి.
• వికారాబాద్‌ జిల్లా తాండూరులో మంగళవారం రాత్రి కురిసిన భారీ వర్షానికి తాండూరు నుంచి కరణ్‌కోట్‌కు 12 గంటలపాటు రాకపోకలు నిలిచిపోయాయి.

వాగు దాటి.. వైద్యం అందించి

ఆదిలాబాద్‌ జిల్లా ఇంద్రవెల్లి మండలంలోని మామిడిగూడ గ్రామంలో బుధవారం వైద్య శిబిరం నిర్వహించారు. వాల్గొండ సబ్‌ సెంటర్‌ పరిధిలోని వైద్య సిబ్బంది, ఏఎన్‌ఎం విజయసుందరి మామిడిగూడ వాగును దాటి ఆదివాసీ గిరిజనులకు వైద్యం అందించారు. గ్రామంలో వైద్య శిబిరం ఏర్పాటు చేసి, రక్త పరీక్షలు నిర్వహించారు. ఈ కార్యక్రమంలో ఆశా వర్కర్‌ ఆత్రం అనుసూయ పాల్గొన్నారు.

ఎల్‌ఎండీలో చేపలవేటకు వెళ్లి ఇద్దరు మృతి

తిమ్మాపూర్‌, జూలై 23: కరీంనగర్‌ జిల్లా తిమ్మాపూర్‌ మండలం ఎల్‌ఎండీలో చేపల వేటకు వెళ్లి ఒకే కుటుంబానికి చెందిన ఇద్దరు మృతి చెందారు. పోలీసులు తెలిపిన వివరాల ప్రకారం.. కరీంనగర్‌ నగరానికి చెందిన సర్వర్‌(52), అతని తమ్ముడి కుమారుడు రిజ్వాన్‌(20), మరో వ్యక్తి ఇసాక్‌ బుధవారం ఉదయం ఎల్‌ఎండీలో చేపలు పట్టేందుకు వెళ్లారు. రిజ్వాన్‌ ప్రమాదవశాత్తూ నీట మునిగాడు. రిజ్వాన్‌ను కాపాడేందుకు సర్వర్‌ ప్రయత్నించి, అతడు కూడా నీటిలో మునిగిపోయాడు. ఇరువురి మృతదేహా లను పోలీసులు వెలికితీశారు.

మరో మూడు రోజులు జోరు వానలు

హైదరాబాద్‌, జూలై 23 (నమస్తేతెలంగాణ): బంగాళాఖాతంలో తూర్పు, పశ్చిమద్రోణి ప్రభావంతో మూడు రోజులపాటు భారీ నుంచి అతి భారీ, అత్యంత భారీ వర్షాలు కురిసే అవకాశమున్నదని హైదరాబాద్‌ వాతావరణ కేంద్రం వెల్లడించింది. ఆదిలాబాద్‌, కుమ్రంభీం ఆసిఫాబాద్‌, మంచిర్యాల, పెద్దపల్లి, జయశంకర్‌ భూపాలపల్లి, ములుగు జిల్లాలకు అత్యంత భారీ వర్ష హెచ్చరిక జారీచేసింది.

నిర్మల్‌, నిజామాబాద్‌, జిగిత్యాల, రాజన్న సిరిసిల్ల, కరీంనగర్‌, మహబూబాబాద్‌, వరంగల్‌, హనుమకొండ జిల్లాలకు అతి భారీ వర్ష సూచన చేసింది. గురువారం జయశంకర్‌-భూపాలపల్లి, ములుగు జిల్లాల్లో అక్కడక్కడ భారీ నుంచి అతి భారీ వర్షాలు కురిసే అవకాశమున్నదని తెలిపింది. ఆయా జిల్లాలకు ఆరెంజ్‌ అలర్ట్‌ జారీచేసింది. ఆదిలాబాద్‌, కుమ్రంభీం ఆసిఫాబాద్‌, మంచిర్యాల, భద్రాద్రి కొత్తగూడెం, మహబూబాబాద్‌, వికారాబాద్‌, సంగారెడ్డి జిల్లాలలో భారీ వర్షాలు కురుస్తాయని పేర్కొంది.