Congress Govt | ఖాళీలతో ఇరిగేషన్‌ శాఖ అస్తవ్యస్తం.. సాగునీటి నిర్వహణకు సర్కార్‌ ‘నీళ్లు’

ముఖ్యంగా వ్యవసాయ రంగానికి గుండెకాయ లాంటి నీటిపారుదల శాఖ, కాంగ్రెస్‌ సర్కార్‌ పట్టింపులేని తనంతో నిర్వీర్యమవుతున్నది. నీటి వనరుల గుర్తింపు, ప్రాజెక్టుల నిర్మాణంతోపాటు వాటిని సంరక్షిస్తూ ఒడిసిపట్టిన నీటిని పొలాలకు మళ్లించి పంటల పెరుగుదలకు తోడ్పడాల్సిన ‘ఇరిగేషన్‌ శాఖ’ ఇప్పుడు ఖాళీల భారంతో కొట్టుమిట్టాడుతున్నది.

• ‘నీటిపారుదల’ నిర్వీర్యం
• ఏడాదిగా భర్తీకాని కీలక స్థానాలు
• ఏడాదిలోనే 11 మంది సీఈలు,59 ఎస్‌ఈలు, 35 ఈఈల ఉద్యోగ విరమణ
• భర్తీ కోసం ప్రతిపాదనలు పంపినా కాంగ్రెస్‌ సర్కార్‌ మీనమేషాలు
• సీనియర్లను కాదని జూనియర్లకు బాధ్యతలు
• అనుయాయులకే ఎఫ్‌ఏసీలు
• ఒక్కొక్కరికి రెండుకు మించి పోస్టులు
• పరిపాలన గాడితప్పి.. పర్యవేక్షణ కరువు
• ప్రభుత్వ తీరుపై ఆఫీసర్ల గుర్రు

Congress Govt | హైదరాబాద్‌, జనవరి 17 (నమస్తే తెలంగాణ): ముఖ్యంగా వ్యవసాయ రంగానికి గుండెకాయ లాంటి నీటిపారుదల శాఖ, కాంగ్రెస్‌ సర్కార్‌ పట్టింపులేని తనంతో నిర్వీర్యమవుతున్నది. నీటి వనరుల గుర్తింపు, ప్రాజెక్టుల నిర్మాణంతోపాటు వాటిని సంరక్షిస్తూ ఒడిసిపట్టిన నీటిని పొలాలకు మళ్లించి పంటల పెరుగుదలకు తోడ్పడాల్సిన ‘ఇరిగేషన్‌ శాఖ’ ఇప్పుడు ఖాళీల భారంతో కొట్టుమిట్టాడుతున్నది. బీడు భూములను సస్యశ్యామలం చేయడం, తగిన వర్షపాతం లేక ఎండిపోతున్న పంటలను పరిరక్షించడం, వ్యవసాయ క్షేత్రాల్లో సరైన నీటి నిర్వహణతో అధిక దిగుబడులు వచ్చేలా పాటుపడాల్సిన ఆ శాఖ కాస్తా సిబ్బంది లేక అస్తవ్యస్తంగా మారింది. తెలంగాణలో ప్రధానమైన వ్యవసాయ రంగానికి అన్ని విధాలా ప్రోత్సాహం అందిస్తూ గత బీఆర్‌ఎస్‌ ప్రభుత్వం కంటికి రెప్పలా కాపాడుకుంటే.. అధికారంలోకి వచ్చిన ఏడాదిలోనే సాగును గాలికి వదిలేసిన కాంగ్రెస్‌ సర్కార్‌, అందులో భాగంగానే నీటిపారుదల శాఖను బలహీనం చేస్తున్నదనే విమర్శలు వెల్లువెత్తుతున్నాయి. ఈ శాఖలో వందల సంఖ్యలో పోస్టులు ఖాళీ ఉన్నా భర్తీపై దృష్టి పెట్టకపోవడమే ఇందుకు నిదర్శనంగా నిలిచింది.

సర్కార్‌ నిర్ణయాలతో ఆగమాగం

ఏడాది పాలనలోనే కాంగ్రెస్‌ సర్కారు అడ్డగోలు నిర్ణయాలతో ఇరిగేషన్‌శాఖ అస్తవ్యస్తమైంది. ఓవైపు సీనియర్‌ ఇంజినీర్లు విరమణ పొందారు. గతంలో ఉన్న కన్సల్టెంట్లను తొలగించారు. మరోవైపు పూర్తిస్థాయి అధికారులను నియమించకుండా ప్రభుత్వం ఇన్‌చార్జిలతోనే నెట్టుకొస్తున్నది. సీనియర్లను కాదని జూనియర్లకు, అనుయాయులకు బాధ్యతలు అప్పగిస్తుండటంతో సాగునీటి పారుదల శాఖ పరిపాలన పూర్తిగా గాడితప్పింది. ఇక కొత్త ప్రాజెక్టుల సంగతేమోగాని, బీఆర్‌ఎస్‌ హయాంలో మొదలై తుదిదశకు చేరిన పనులు సైతం ఇప్పుడు పర్యవేక్షణ లేక పడకేశాయి. మరోవైపు పొరుగు రాష్ర్టాలు గోదావరి, కృష్ణా జలాలను చెరబట్టేందుకు అడుగులు వేస్తుంటే ఆ దిశగా కన్నెత్తి చూసేవారే లేకుండా పోయారంటే సాగునీటి పారుదలశాఖ దుస్థితి ఎలా తయారైందో తెలుసుకోవచ్చు.

సగం మంది సీఈలు ఖాళీ

నీటిపారుదల శాకలో ఇంజినీర్‌ ఇన్‌ చీఫ్‌ (ఈఎన్సీ), చీఫ్‌ ఇంజినీర్‌ (సీఈ), అసిస్టెంట్‌ ఎగ్జిక్యూటివ్‌ ఇంజినీర్స్‌, టెక్నికల్‌, నాన్‌ టెక్నికల్‌, సూపరింటెండెంట్‌, రికార్డ్‌ అసిస్టెంట్‌ తదితర విభాగాలకు సంబంధించి మొత్తం 5334 పోస్టులు మంజూరు ఉండగా ప్రస్తుతం 4389 మంది మాత్రమే ఉన్నారు. ఏడాదిలో మరో 231కి పైగా ఖాళీలు ఏర్పడ్డాయి. ఇప్పటికే రెండు ఈఎన్సీ (జనరల్‌, ఓఅండ్‌ఎం) పోస్టులు ఖాళీ ఉన్నాయి. 22 సీఈ పోస్టుల్లో 11మంది ఉద్యోగ విరమణ పొందారు. 59 మందికి పైగా ఎస్‌ఈలు, అనేక సర్కిళ్లలో ఈఈ పోస్టులు ఖాళీ అయ్యాయి. మరోవైపు శాఖలో కొత్తగా రెండు నెలల క్రితమే 687 మంది ఏఈలు నియామకమయ్యారు. కింది నుంచి పైస్థాయి వరకు ప్రమోషన్లు కల్పించేందుకు పెద్దగా ఇబ్బందులు కూడా లేవు. ఆ దిశగా చర్యలు చేపట్టాలని 3 నెలల క్రితం ప్రభుత్వం ఆదేశించింది. ఆ మేరకు ఉన్నతాధికారులు సినీయార్టీ జాబితాను సిద్ధం చేసి నివేదించారు. కానీ రెండు నెలలుగా ప్రభుత్వం మాత్రం ఎటూ తేల్చడం లేదు. గతంలోనే కమిటీలు వేసి నివేదించినా తాజాగా మళ్లీ మరోసారి కమిటీ వేసింది. దీనిపై ఇంజినీర్లు తీవ్ర అసహనం వ్యక్తం చేస్తున్నారు. ఇది కాలయాపనకే తప్ప మరేమీ కాదని ఇంజినీర్లు నిప్పులు చెరుగుతున్నారు.

సీనియర్లను కాదని జూనియర్లకు..

• ప్రమోషన్లు, ఖాళీల భర్తీ చేపట్టకుండా తాత్సారం చేస్తున్న ప్రభుత్వం, మరోవైపు ఇష్టారీతిన అధికారులకు బాధ్యతలు అప్పగిస్తున్నది. వాస్తవానికి ఈఎన్సీ, సీఈ, ఎస్‌ఈ, ఈఈ ఇలా ఏ పోస్టు ఖాళీ అయినా వెంటనే సీనియార్టీ జాబితాలో అక్కడే ఉన్న ఇంజినీర్‌కు, ఒకవేళ అక్కడ సీనియర్‌ ఇంజినీర్‌ లేకుంటే ఆ బాధ్యతలను పక్కనే ఉన్న ఇతర సీఈ, ఎస్‌ఈ, ఈఈలకు అప్పగించడం ఆనవాయితీ. కానీ కాంగ్రెస్‌ సర్కారు నిబంధనలకు తిలోదకాలిచ్చింది. నచ్చినోళ్లకు, ఎమ్మెల్యేలు పైరవీ చేసినోళ్లకే బాధ్యతలు అప్పగిస్తున్నది. తమ అనుయాయుల కోసం కొన్నిచోట్ల సీనియర్‌ ఇంజినీర్లను సైతం బలవంతంగా బదిలీ చేసిన సందర్భాలు కూడా ఉన్నాయి. ఏడాదిలో 2004 బ్యాచ్‌కు చెందిన సీనియర్లను పకన పెట్టి 2005, 2007 బ్యాచ్‌లకు చెందిన పదుల సంఖ్యలో ఇంజినీర్లను ఉన్నతస్థానాల్లో ఎఫ్‌ఏసీలుగా నియమించారని బాధిత ఇంజినీర్లు నిప్పులు చెరుగుతున్నారు. ఈ వ్యవహారంలో సచివాలయంలోని ఓ అధికారి చక్రం తిప్పుతున్నారని బాహాటంగానే చర్చించుకుంటున్నారు.
• సాగునీటిశాఖ పారుదలశాఖ మంత్రి ఉత్తమ్‌కుమార్‌రెడ్డి సొంత నియోజకవర్గం హుజూర్‌నగర్‌లో ఈఈ పోస్టు బాధ్యతలను 2004 బ్యాచ్‌ ఇంజినీర్‌ను పక్కన పెట్టి, 2005 బ్యాచ్‌కు చెందిన జూనియర్‌కు అప్పగించారు.
• నిర్మల్‌ జిల్లాలో కూడా ఓ ఎమ్మెల్యే బంధువైన 2007 బ్యాచ్‌కు చెందిన ఇంజినీర్‌ను నియమించారు.
• బోధన్‌ డివిజన్‌లోనూ ఓ ఎమ్మెల్యే పైరవీతో 2005 బ్యాచ్‌కు చెందిన జూనియర్‌ ఇంజినీర్‌కే బాధ్యతలు అప్పగించారు.
• ఆదిలాబాద్‌, నల్లగొండతోపాటు, ఇతర జిల్లాలోనూ ఇదే దుస్థితి నెలకొన్నది.
• కీలకస్థానాల్లో ఉన్నవారు సెలవుపెట్టినా, విరమణ పొందిన వెంటనే తాత్కాలికంగా బాధ్యతలు అప్పగిస్తారు. కానీ ఖమ్మం, ములుగు సీఈ పోస్టులు ఖాళీ ఏర్పడి దాదాపు 5 రోజులు దాటినా ఇప్పటివరకు ఇన్‌చార్జిలను నియమించలేదు.

ఒక్కరికే రెండుకు మించి బాధ్యతలు

• ఒక్క టెరిటోరియల్‌, సర్కిల్‌, డివిజన్‌కు చెందిన బాధ్యతలతోనే ఇంజినీర్లు సతమతమవుతుంటారు. ఆయా ఇంజినీర్లు తమ పరిధిలోని ప్రాజెక్టుల పర్యవేక్షణ, పనుల నిర్వహణ, ఇతరత్రా బాధ్యతలు నిర్వర్తించేందుకే సమయం సరిపోని పరిస్థితి. అదనంగా మరో టెరిటోరియల్‌, సర్కిల్‌, డివిజన్‌ బాధ్యతలు నిర్వర్తించాలంటే చాలా కష్టం. అలాంటిది ప్రస్తుతం ఇరిగేషన్‌శాఖలో పలువురు ఇంజినీర్లకు లెక్కకు మించి అదనపు బాధ్యతలు అప్పగిస్తున్నారు.
• ఇరిగేషన్‌శాఖలో ఈఎన్సీ జనరల్‌ పోస్టు అత్యంత కీలకం. ప్రభుత్వంతో సంప్రదింపులు, అనేక కమిటీలకు చైర్మన్‌గా ఈఎన్సీ జనరలే కీలకం. నిరుడు ఫిబ్రవరిలో ఈ పోస్టు ఖాళీ కాగా ఇప్పటివరకు రెగ్యులర్‌ ఈఎన్సీని నియమించలేదు. ఈఎన్సీ (అడ్మినిస్ట్రేషన్‌) అనిల్‌కుమార్‌కే అదనపు బాధ్యతలను అప్పగించి ప్రభుత్వం చేతులు దులుపుకొన్నది.
• రామగుండం ఈఎన్సీ పోస్టు సైతం ఖాళీ కాగా ఆ బాధ్యతలను అప్పటికే జగిత్యాల సీఈగా అదనపు బాధ్యతలు నిర్వర్తిస్తున్న ఎస్‌ఈ సుధాకర్‌రెడ్డికి అప్పగించారు. మొత్తంగా ఆయన రెండు అదనపు బాధ్యతలను నిర్వర్తిస్తున్నారు.
• నాగార్‌కర్నూల్‌ టెరిటోరియల్‌లో ఓ డివిజన్‌ ఈఈకి సైతం మరో డివిజన్‌ ఈఈగా, ఇటీవలే సర్కిల్‌ ఎస్‌ఈగా అదనపు బాధ్యతలను ప్రభుత్వం అప్పగించింది.
• నాగర్‌కర్నూల్‌ సర్కిల్‌-1 ఎస్‌ఈ (సూపరింటెండెంట్‌ ఇంజినీర్‌)గా విధులు నిర్వర్తిస్తున్న ఎస్‌ఈ విజయభాస్కర్‌రెడ్డికే నాగర్‌కర్నూల్‌ సీఈగా తొలుత అదనపు బాధ్యతలను ప్రభుత్వం అప్పగించింది. ఆ పోస్టుతో అనుబంధంగా తెలంగాణ జలవనరుల అభివృద్ధి సంస్థ ఎండీగానూ నియమించింది. వనపర్తి సీఈ విరమణ పొందగా ఆ బాధ్యతలను కూడా విజయభాస్కర్‌రెడ్డికే కట్టబెట్టింది. కాళేశ్వరం కమిషన్‌లో టెక్నికల్‌ సీఈగానూ విజయభాస్కర్‌రెడ్డినే నియమించింది. ఇటీవల ఆపరేషన్స్‌ అండ్‌ మెయింటెనెన్స్‌ (ఓఅండ్‌ఎం) ఈఎన్సీగానే సదరు విజయభాస్కర్‌రెడ్డికే అదనపు బాధ్యతలు అప్పగించింది. ఒక్కరికే 5 చోట్ల అదనపు బాధ్యతలు అప్పగించింది.

అంతర్రాష్ట్ర జలవిభాగం.. అగమ్యగోచరం

• సాగునీటిశాఖ పరిధిలో అంతర్రాష్ట్ర జలవిభాగం అత్యంత కీలకమైంది. నీటి కేటాయింపులు, అనుమతుల సాధన, న్యాయ సంబంధిత సమస్యలు, వాటి పరిష్కారం, పొరుగు రాష్ర్టాలతో సంప్రదింపుల అంశాల్లో కీలకభూమిక పోషిస్తుంది. అత్యంత కీలకమైన ఈ విభాగాన్ని కాంగ్రెస్‌ ప్రభుత్వం పూర్తిగా విస్మరిస్తున్నది. అంతర్రాష్ట్ర జలవివాదాలను పూర్తిగా నిర్లక్ష్యం చేస్తున్నది.
• సాగునీటిశాఖకు, అంతర్రాష్ట్ర విభాగానికి సంబంధించి టెక్నికల్‌ అడ్వయిజరీ కమిటీ (టీఏసీ) అనేది అత్యంత కీలకం. రాష్ట్ర జలహక్కులను పరిరక్షించడం, అందుకు భంగం కలిగేలా పొరుగు రాష్ర్టాలు చేపట్టే ప్రాజెక్టులను నిలువరించేందుకు సలహాలు, సూచనలు ఇవ్వడంలో ఈ కమిటీ అత్యంత క్రియాశీలకంగా పనిచేస్తుంది. కాంగ్రెస్‌ ప్రభుత్వం ఇప్పటివరకు ఈ కమిటీని నియమించలేదంటే పరిస్థితి ఎంత దారుణంగా ఉన్నదో అర్థం చేసుకోవచ్చు.
• ఇంటర్‌స్టేట్‌ వ్యవహారాల్లో హైడ్రాలజీ నిపుణులు అత్యవసరం. కానీ ప్రభుత్వం ఇప్పటికీ నియమించలేదు.
• డీపీఆర్‌ల తయారీ, అనుమతుల సాధనకు, సీడబ్ల్యూసీ లేవనెత్తే అభ్యంతరాలకు సహేతుకమైన వివరణలు ఇచ్చేందుకు ఆ రంగంలో నిపుణుడు అత్యవసరం. బీఆర్‌ఎస్‌ హయాంలో అందుకోసం ప్రత్యేకంగా కన్సల్టెంట్‌ను నియమించింది. కానీ కాంగ్రెస్‌ వచ్చాక ఉన్న కన్సల్టెంట్‌ను తొలగించింది. కొత్తవారిని నియమించలేదు.
• ట్రిబ్యునల్‌ విచారణలు, సుప్రీం కోర్టు, ఎన్జీటీ తదితర కేసుల నేపథ్యంలో ఇంటర్‌స్టేట్‌ అధికారులు ఢిల్లీకి నిత్యం వెళ్లడం, రావడం పరిపాటిగా మారింది. రవాణా ఖర్చులు, అందుకు సంబంధించిన అనుమతులు ఈఎన్సీ నుంచి తీసుకోవడం ఆనవాయితీ. కానీ కాంగ్రెస్‌ ప్రభుత్వం ఈ బ్లాంకెట్‌ పర్మిషన్‌ను సెక్రటరీ నుంచి తీసుకోవాలని నిర్దేశించింది. ఇది అధికారులకు కష్టతరంగా మారింది. అదీగాక ట్రావెల్‌, డీఏకి సంబంధించిన బిల్లులు సకాలంలో రాక అనేక ఇబ్బందులు పడుతున్నారు. ఆగస్టుకు సంబంధించిన బిల్లులు కూడా ఇప్పటికీ ఇవ్వలేదంటే పరిస్థితి ఎలా ఉన్నదో అర్థం చేసుకోవచ్చు.
• రాష్ట్ర ప్రాజెక్టుల అనుమతుల సాధనలో భాగంగా కేంద్ర సంస్థలతో నిత్యం సంప్రదింపులు జరిపేందుకు గతంలో బీఆర్‌ఎస్‌ ప్రభుత్వం ఢిల్లీలో ప్రత్యేక కార్యాలయాన్ని ఏర్పాటు చేసింది. కొందరు ఇంజినీర్లను కూడా నియమించింది. కానీ కాంగ్రెస్‌ ప్రభుత్వం కార్యాలయాన్నే ఎత్తివేసింది. ట్రిబ్యునల్‌ విచారణ కొనసాగుతున్న నేపథ్యంలో ఢిల్లీలో కార్యాలయాన్ని ఏర్పాటు చేసి, ఒక ఎస్‌ఈ, ఈఈతో పాటు సపోర్టింగ్‌ స్టాఫ్‌ను అక్కడ నియమించాలని ప్రతిపాదనలు పంపినా ఇప్పటికీ పట్టించుకోని దుస్థితి నెలకొన్నది.

ఒక్కరికే ఐదు అదనపు బాధ్యతలు

నాగర్‌కర్నూల్‌ సర్కిల్‌-1 ఎస్‌ఈ (సూపరింటెండెంట్‌ ఇంజినీర్‌)గా విధులు నిర్వర్తిస్తున్న ఎస్‌ఈ విజయభాస్కర్‌రెడ్డికే నాగర్‌కర్నూల్‌ సీఈగా తొలుత అదనపు బాధ్యతలను ప్రభుత్వం అప్పగించింది. ఆ పోస్టుతో అనుబంధంగా తెలంగాణ జలవనరుల అభివృద్ధి సంస్థ ఎండీగానూ ఆయననే నియమించింది. వనపర్తి సీఈ విరమణ పొందగా ఆ బాధ్యతను కూడా విజయభాస్కర్‌రెడ్డికే కట్టబెట్టింది. కాళేశ్వరం కమిషన్‌లో టెక్నికల్‌ సీఈగానూ విజయభాస్కర్‌రెడ్డినే నియమించింది. ఇటీవల ఆపరేషన్స్‌ అండ్‌ మెయింటెనెన్స్‌ (ఓఅండ్‌ఎం) ఈఎన్సీగానూ సదరు విజయభాస్కర్‌రెడ్డికే అదనపు బాధ్యతలు అప్పగించింది. ఇలా ప్రభుత్వం ఒక్కరికే 5 చోట్ల అదనపు బాధ్యతలు అప్పగించడం వెనుక మర్మమేమిటో మరి!

గాడితప్పిన పాలన..

ప్రమోషన్లు కల్పించకుండా ఖాళీ అయిన చోట్ల ఎక్కడికక్కడ ఇన్‌చార్జిలుగా నచ్చిన ఇంజినీర్లను ఇష్టారీతిన ప్రభుత్వం నియమిస్తుండడంతో సాగు నీటిపారుదల శాఖ పాలన మొత్తం గాడితప్పుతున్నదని సీనియర్‌ ఇంజినీర్లు ఆవేదన వ్యక్తం చేస్తున్నారు. అదనపు బాధ్యతల వల్ల కీలకస్థానాల్లో ఉన్న ఇంజినీర్లు సమావేశాలకు, ప్రధాన కార్యాలయాలకే పరిమితవ్వాల్సిన దుస్థితి నెలకొన్నదని, దీంతో క్షేత్రస్థాయిలో పనులను పర్యవేక్షించేవారే లేకుండా పోయారని చెప్తున్నారు. ఏ ఒక్కదానిపై పూర్తిస్థాయిలో దృష్టి పెట్టలేని పరిస్థితి నెలకొన్నది. ప్రస్తుతం కాలువల ద్వారా సాగునీటిని విడుదల చేస్తుండగా, ఎక్కడ ఏ మేరకు, ఎప్పుడు, ఎవరు విడుదల చేస్తున్నారో తెలియని దుస్థితి ఉన్నది. ఇక ఇంజినీర్ల మధ్య ఆహ్లాదకర వాతావరణం లేకుండా పోవడంతో పాటు గ్రూపులుగా విడిపోయిన దుస్థితి నెలకొన్నది. సర్కారు అనాలోచిత, అడ్డదిడ్డమైన చర్యలతో సీనియర్‌ వర్సెస్‌ జూనియర్‌ అన్నచందంగా తయారైంది. ఉన్నతస్థానాల్లో బాధ్యతలు నిర్వర్తిస్తున్న వారికి దిగువనున్న సీనియర్‌ ఇంజినీర్లు సహకరించని పరిస్థితి నెలకొనగా, పరోక్షంగా సహాయ నిరాకరణ పాటిస్తున్నారని పలువురు బాహాటంగానే వాపోతున్నారు. మరోవైపు అదనపు బాధ్యతలతో తీవ్ర పనిభారంతో సతమతమవుతున్నారని అధికారులు వాపోతున్నారు. వర్షాలు తగ్గిన క్రమంలో, పనులు చేసేందుకు ఇదే అనువైన సమయమని, అయితే అదనపు బాధ్యతలతో ఏ పనిపైనా దృష్టిసారించలేపోతున్నామని వివరిస్తున్నారు. ఇప్పటికైనా ప్రభుత్వం దృష్టి సారించి, కమిటీల పేరిట కాలయాపన చేయకుండా సత్వరమే ప్రమోషన్లు కల్పించి, పూర్తిస్థాయి అధికారులను నియమించి నీటిపారుదలశాఖను గాడిన పడేయాలని డిమాండ్‌ చేస్తున్నారు.