Goup 2 Exams | కఠినంగా గ్రూప్‌-2.. ప్రశ్నల నిడివి పెద్దవిగా ఉండటంతో సరిపోని సమయం

గ్రూప్‌-2 పరీక్షలు ఆదివారం ప్రారంభమయ్యాయి. ఉద యం, మధ్యాహ్నం రెండు సెషన్లల్లోనూ ప్రశ్నలు అత్యంత కఠినంగా వచ్చాయి. స్టేట్‌మెంట్‌ ఆధారమైనవి ఎక్కువగా ఉండటం, ప్రశ్నలు పెద్దవిగా ఉండటంతో అభ్యర్థులకు సమయం సరిపోలేదు. జనరల్‌ స్టడీస్‌ పేపర్‌ అత్యంత కఠినంగా ఇచ్చారు.

• ఏకంగా ఆస్కార్‌ పరిజ్ఞానంపై ప్రశ్నలు
• 54% అభ్యర్థుల డుమ్మా
• ఆర్‌ఆర్‌బీ పరీక్ష కారణంగా పెరిగిన గైర్హాజరు శాతం

Goup 2 Exams | హైదరాబాద్‌, డిసెంబర్‌ 15 (నమస్తే తెలంగాణ): గ్రూప్‌-2 పరీక్షలు ఆదివారం ప్రారంభమయ్యాయి. ఉద యం, మధ్యాహ్నం రెండు సెషన్లల్లోనూ ప్రశ్నలు అత్యంత కఠినంగా వచ్చాయి. స్టేట్‌మెంట్‌ ఆధారమైనవి ఎక్కువగా ఉండటం, ప్రశ్నలు పెద్దవిగా ఉండటంతో అభ్యర్థులకు సమయం సరిపోలేదు. జనరల్‌ స్టడీస్‌ పేపర్‌ అత్యంత కఠినంగా ఇచ్చారు.

చాలాకాలంగా ప్రిపేరవుతున్న వారు సైతం 150కి 70-90కిపైగా స్కోర్‌చేయలేని విధంగా ప్రశ్నలు ఇచ్చారు. పేపర్‌-2లో చరిత్రలో ప్రశ్నలు అత్యంత కఠినంగా ఉన్నాయి. జనరల్‌ స్టడీస్‌లో తెలంగాణ పాలసీలు, కేంద్ర ప్రభుత్వ విధానాలు, తెలంగాణ అసెంబ్లీ ఎన్నికలు, పలు రాష్ర్టాల్లో అసెంబ్లీ స్థానాలు, ఆస్కార్‌, చలనచిత్ర అవార్డులపై ప్రశ్నలొచ్చాయి. గ్రూప్‌-2 పరీక్షలు సోమవారం సైతం జరగనున్నాయి. ఉదయం పేపర్‌-3, మధ్యాహ్నం పేపర్‌-4కు పరీక్షలు జరగనున్నాయి.

అభ్యర్థుల అభ్యంతరాలిలా..

• గ్రాంధీక భాషను వాడటంతో ఒకటికి రెండుసార్లు ప్రశ్నలు చదవాల్సి వచ్చింది.
• జతపరచడం, సరైనవి ఏవీ. సరికానివి ఏవీ అన్న ప్రశ్నలే అధికంగా ఇవ్వడంతో సమయం సరిపోలేదు.
• స్టేట్‌మెంట్లు, క్రోనాలజీ ఆర్డర్‌కు సంబంధించిన ప్రశ్నలు ఎక్కువగా ఇచ్చారు.తెలంగాణ చరిత్ర, దేశ చరిత్ర
• ప్రశ్నలు ఎక్కడినుంచి వచ్చాయో తెలియక అభ్యర్థులు టెన్షన్‌ పడ్డారు.
• ఇంగ్లిష్‌లో ఇచ్చిన 20 ప్రశ్నలకు లోతైన పరిజ్ఞానం ఉంటే తప్ప ఆన్సర్‌ చేయలేని పరిస్థితి.
  నామమాత్రంగానే సెంటర్ల తనిఖీలు
• జనగామ జిల్లాలో సెయింట్‌మేరీస్‌, సెయింట్‌ మారి యా పాఠశాలలు పక్కపక్కనే ఉండగా, ఓ మహిళా అభ్యర్థి ఒక సెంటర్‌కు బదులు మరో సెంటర్‌కు వెళ్లింది. పొరపాటు జరిగిందని తెలుసుకుని పక్క సెంటర్‌కు వెళ్లే వరకు సమయం మించిపోవడంతో ఆ అభ్యర్థి పరీక్ష రాసే అవకాశం కోల్పోయింది.
• సంగారెడ్డిలో 15 మంది, కరీంనగర్‌లో 14, సిద్దిపేటలో 12 మంది ఆలస్యంగా రావడంతో అనుమతించలేదు. సికింద్రాబాద్‌ పీజీ కాలేజీ వద్ద ఓ మహిళా అభ్యర్థి ఆలస్యంగా చేరుకుంది. అదే సమయంలో టీజీపీఎస్సీ చైర్మన్‌ బీ వెంకటేశం తనిఖీకి రాగా, ఆయన్ను వేడుకున్నా ఫలితంలేకుండా పోయింది.
• వికారాబాద్‌ జిల్లా శ్రీసాయి డెంటల్‌ కాలేజీ సెంటర్‌లో ఓ అభ్యర్థి ఫోల్డెడ్‌ సెల్‌ఫోన్‌తో పరీక్షకు హాజరయ్యాడు. మధ్యలో గుర్తించిన అధికారులు అభ్యర్థిని పోలీసులకు అప్పగించి మాల్‌ ప్రాక్టీస్‌ కేసు నమోదుచేశారు.

46 శాతం మాత్రమే హాజరు

పేపర్‌-1 జనరల్‌ స్టడీస్‌ అండ్‌ జనరల్‌ ఎబిలిటీస్‌కు 46.75 శాతం, పేపర్‌-2 పాలిటీ, హిస్టరీ సోషియోకల్చర్‌కు 46.30 శాతం మంది మాత్రమే హాజరయ్యారు. ఈ పరీక్షకు 5,51,855 మంది దరఖాస్తు చేసుకున్నారు. వీరిలో పేపర్‌-1ను 2,57,981 మంది, పేపర్‌-2ను 2,55,490 మంది రాశారు. గతానికి భిన్నంగా గ్రూప్‌-2 పరీక్ష రాసేందుకు అభ్యర్థులు నిరాసక్తత కనబరిచారు.