ఐదేండ్లు దాటిన హెచ్‌ఎంల బదిలీ!

ఒకే పాఠశాలలో ఐదేండ్లు పనిచేసిన ప్రధానోపాధ్యాయులను తప్పనిసరిగా బదిలీ చేయనున్నారు. ఒకే స్కూళ్లో ఎనిమిదేండ్లు పనిచేసిన టీచర్లకు తప్పనిసరిగా స్థాన చలనం కల్పించనున్నారు.

• ఉపాధ్యాయులకు గరిష్ఠంగా 8 ఏండ్లు
• మూడేండ్లలో రిటైరయ్యేవారికి మినహాయింపు.. కటాఫ్‌ ఫిబ్రవరి 1
• విద్యాశాఖ మార్గదర్శకాలు సిద్ధం.. త్వరలో అధికారికంగా విడుదల

హైదరాబాద్‌, జనవరి 24 (నమస్తే తెలంగాణ): ఒకే పాఠశాలలో ఐదేండ్లు పనిచేసిన ప్రధానోపాధ్యాయులను తప్పనిసరిగా బదిలీ చేయనున్నారు. ఒకే స్కూళ్లో ఎనిమిదేండ్లు పనిచేసిన టీచర్లకు తప్పనిసరిగా స్థాన చలనం కల్పించనున్నారు. అయితే, మూడు సంవత్సరాల్లో పదవీ విరమణ పొందనున్నవారికి బదిలీ నుంచి మినహాయింపునిచ్చారు. ఒకవేళ వారు కోరుకుంటే మాత్రం బదిలీ చేస్తారు. రాష్ట్రంలో ఉపాధ్యాయుల బదిలీలకు సంబంధించిన మార్గదర్శకాలను విద్యాశాఖ సిద్ధం చేసింది. రాష్ట్రంలో ఉపాధ్యాయ బదిలీలు, పదోన్నతుల ప్రక్రియకు ఫిబ్రవరి 1ని కటాఫ్‌ తేదీగా నిర్ణయించింది. నిర్దిష్ట సర్వీసును ఫిబ్రవరి 1లోపు పూర్తిచేసిన వారిని మాత్రమే పరిగణనలోనికి తీసుకోనున్నారు. ఈ లెక్కన ఫిబ్రవరి 1 నాటికి ఒక పాఠశాలలో రెండేండ్ల సర్వీసు పూర్తిచేసినవారు బదిలీ కోసం దరఖాస్తు చేసుకోవడానికి అర్హులు. బదిలీలు, పదోన్నతుల ప్రక్రియను పూర్తిగా ఆన్‌లైన్‌లో వెబ్‌ కౌన్సెలింగ్‌ ద్వారా నిర్వహిస్తారు. ఎన్‌సీసీ ఆఫీసర్స్‌కు మాత్రం మాన్యువల్‌ కౌన్సెలింగ్‌ ఉంటుంది. బాలికల పాఠశాలల్లో మహిళా టీచర్లు లేని సందర్భంలో 50 ఏండ్లు నిండిన పురుష ఉపాధ్యాయులకు అనుమతిస్తారు. ఈ మార్గదర్శకాలను ఉన్నతాధికారుల సూచనల మేరకు సవరించడం లేదా యథావిధిగా ఖరారుచేస్తూ త్వరలోనే అధికారికంగా విడుదల చేయనున్నారు.

పాయింట్ల కేటాయింపు ఇలా..

• 17%, 13%, 11% హెచ్‌ఆర్‌ఏ ప్రకారం క్యాటగిరీ 1,2,3గా పాయింట్లు కేటాయించారు.
• స్పౌజ్‌, అవివాహిత మహిళలకు 10 అదనపు పాయింట్లు కేటాయించారు. వీటిని ఎనిమిదేండ్లలో ఒకసారి మాత్రమే వినియోగించుకోవాలి.
• కేంద్ర, రాష్ట్ర ప్రభుత్వ ఉద్యోగులు, ప్రభుత్వరంగ సంస్థలు, స్థానిక సంస్థల ఉద్యోగులకు స్పౌజ్‌ నిబంధనలు వర్తింపజేస్తారు.
• ఓడీ ఉన్న సంఘాలు, గుర్తింపు పొందిన ఉపాధ్యాయ సంఘాల జిల్లా, రాష్ట్ర అధ్యక్ష, ప్రధాన కార్యదర్శులకు 10 అదనపు పాయింట్లు కేటాయిస్తారు.
• ట్రాన్స్‌ఫర్‌ ఆర్డర్‌ పొందిన ఉపాధ్యాయులంతా ఈ విద్యా సంవత్సరం(2022-23) చివరి పనిదినం రోజు మాత్రమే ప్రస్తుత స్థానం నుంచి రిలీవ్‌ కావాలి.
• భార్యాభర్తలు ఇద్దరూ ఉపాధ్యాయులే అయితే స్పెషల్‌ క్యాటగిరీ పాయింట్లు, ప్రిఫరెన్షియల్‌ క్యాటగిరీ పాయింట్లు ఇద్దరిలో ఒకరు మాత్రమే వాడుకోవాలి.
• ఒకే జిల్లాలో పనిచేస్తున్న వారికి మాత్రమే స్పౌజ్‌ పాయింట్లు వర్తిస్తాయి.

వీరికి ప్రిఫరెన్షియల్‌ పాయింట్లు

70% వైకల్యం కలిగిన దివ్యాంగులు, వితంతువులు, విడాకులు పొంది ఒంటరిగా జీవిస్తున్న మహిళలు, ప్రధానోపాధ్యాయులు/ ఉపాధ్యాయులు లేదా వారి జీవిత భాగస్వామి(స్పౌజ్‌) క్యాన్సర్‌, బోన్‌ టీబీ, బైపాస్‌ సర్జరీ, కిడ్నీ, లివర్‌ ట్రాన్స్‌ప్లాంటేషన్‌, న్యూరోసర్జరీతోపాటు కొత్తగా మస్యులర్‌ డిస్ట్రోఫీ, డయాలసిస్‌ కేసులను ప్రిఫరెన్షియల్‌ క్యాటగిరీ కింద అనుమతించారు. డయాబెటిస్‌, మానసిక వైకల్యం, హృద్రోగం గల పిల్లల తల్లిదండ్రులు ప్రిఫరెన్షియల్‌ క్యాటగిరీ వాడుకోవచ్చు. వీరు జనవరి 1కి ముందు గల తేదీలతో జిల్లా మెడికల్‌ బోర్డు నుంచి సర్టిఫికెట్‌ పొంది ఉండాలి.

కమిటీల ఏర్పాటు ఇలా..

• మల్టీజోన్‌ స్థాయిలో డీఎస్‌ఈ ద్వారా నామినేటైన జాయింట్‌ డైరెక్టర్‌ స్థాయి సీనియర్‌ అధికారి చైర్మన్‌గా, ఆర్జేడీ సెక్రటరీగా, సంబంధిత డీఈవో సభ్యునిగా కౌన్సెలింగ్‌ కమిటీ ఉంటుంది.
• జిల్లాస్థాయిలో కలెక్టర్‌ చైర్మన్‌, జాయింట్‌ కలెక్టర్‌ వైస్‌ చైర్మన్‌, జడ్పీ సీఈవో సభ్యుని గా, డీఈవో సెక్రటరీగా కమిటీ ఉంటుంది.
• జిల్లాస్థాయిలో జడ్పీ, మండల పరిషత్తు టీచర్లకు జడ్పీ చైర్‌పర్సన్‌ చైర్మన్‌గా, కలెక్టర్‌ వైస్‌చైర్మన్‌గా, జాయింట్‌ కలెక్టర్‌ సీఈవోగా, డీఈవో కార్యదర్శిగా కమిటీ పనిచేస్తుంది.
• సూల్‌ అసిస్టెంట్లు, ఎస్జీటీలకు డీఈవో, గెజిటెడ్‌ ప్రధానోపాధ్యాయులకు ఆర్జేడీ బదిలీ అధికారిగా వ్యవహరిస్తారు.

టీచర్లకు సెలవులివ్వొద్దు

• డీఈవోలకు విద్యాశాఖ ఆదేశం

రాష్ట్రంలోని ప్రభుత్వ టీచర్లకు సెలవులు ఇవ్వొద్దని పాఠశాల విద్యాశాఖ ఆదేశించింది. మంగళవారం హైదరాబాద్‌లో నిర్వహించిన సమావేశంలో డీఈవోలకు ఈ మేరకు సూచించింది. టీచర్ల పదోన్నతులు, బదిలీల నేపథ్యంలో హెచ్‌ఎంలు, టీచర్లకు సెలవులివ్వొద్దని తెలిపింది. ఈ ఆదేశాలను ఉల్లంఘిస్తే సీసీఏ రూల్‌ 1991 ప్రకారం చర్యలు తీసుకొంటామని హెచ్చరించింది.

బదిలీల్లో జీరో సర్వీసును పరిగణించండి

• సర్కారుకు పీఆర్డీయూ టీఎస్‌ విజ్ఞప్తి

టీచర్ల బదిలీల్లో జీరో సర్వీసును పరిగణనలోకి తీసుకోవాలని పీఆర్టీయూ తెలంగాణ ప్రభుత్వాన్ని కోరింది. రెండేండ్ల సర్వీసు స్థానంలో జీరో సర్వీసును చేర్చాలని సంఘం రాష్ట్ర అధ్యక్షుడు ఎం చెన్నయ్య, ప్రధానకార్యదర్శి మారెడ్డి అంజిరెడ్డి విజ్ఞప్తి చేశారు. గ్రేడ్‌ -2 హెచ్‌ఎంల పదోన్నతులను ఆఫ్‌లైన్‌లో నిర్వహించాలని, వెబ్‌ ఆప్షన్లలో నాట్‌ విల్లింగ్‌ను చేర్చాలని వారు కోరారు.