SSC Memo | మొత్తం మార్కుల్లేకుండా పది మెమోలు.. గందరగోళంగా ప్రభుత్వ నిర్ణయాలు

పదో తరగతి మెమోల విషయంపై ప్రభుత్వ నిర్ణయం వివాదాస్పదమయ్యే అవకాశం కనిపిస్తున్నది. అనేక సమస్యలు తెచ్చిపెట్టే అవకాశాలున్నాయి. ఈ సారి పదో తరగతి మెమోలను మొత్తం మార్కుల్లేకుండానే ముద్రిస్తున్నారు.

• సీజీపీఏ కూడా ముద్రించని ఎస్సెస్సీ బోర్డు
• దీంతో మెరిట్‌ను తేల్చడం కష్టమే
• సమస్యలొస్తాయంటున్న టీచర్లు
• షార్ట్‌, లాంగ్‌ మెమోలోనైనా స్పష్టత ఇవ్వాలని విజ్ఞప్తి

SSC Memo | హైదరాబాద్‌, మే 1 (నమస్తే తెలంగాణ) : పదో తరగతి మెమోల విషయంపై ప్రభుత్వ నిర్ణయం వివాదాస్పదమయ్యే అవకాశం కనిపిస్తున్నది. అనేక సమస్యలు తెచ్చిపెట్టే అవకాశాలున్నాయి. ఈ సారి పదో తరగతి మెమోలను మొత్తం మార్కుల్లేకుండానే ముద్రిస్తున్నారు. అంతేకాదు.. మొత్తం కుమ్యులేటివ్‌ గ్రేడ్‌ పాయింట్‌ యావరేజ్‌ (సీజీపీఏ)ను కూడా ముద్రించలేదు. కేవలం సబ్జెక్టులవారీగా సాధించిన మార్కులు, సబ్జెక్టులవారీగా గ్రేడ్లు మాత్రమే కేటాయించారు.

మొదటి నుంచి గందరగోళమే..

పదో తరగతి విషయంలో సర్కారు నిర్ణయాలు మొదటి నుంచి వివాదాస్పదమవుతున్నాయి. మొదట ఇంటర్నల్స్‌ను రద్దు చేశారు. గ్రేడ్లు ఉండవు మార్కులు మాత్రమే ఇస్తామన్నారు. విద్యాసంవత్సరం మధ్యలో ఈ నిర్ణయం తీసుకోవడం.. అప్పటికే కొన్ని ఇంటర్నల్స్‌ పరీక్షలు నిర్వహించడంతో అప్పటికప్పుడు నిర్ణయం మార్చుకుని 2024-25కు ఇంటర్నల్స్‌ ఉంటాయి.. గ్రేడ్లు ఉండవు.. కేవలం మార్కులే కేటాయిస్తామన్నారు. మెమోలను ఎలా ముద్రించాలన్న అంశంపైనా తేల్చలేదు. ఫలితాలకు రెండు రోజుల ముందే స్పష్టత ఇచ్చారు. మళ్లీ గ్రేడ్లు ఉంటాయని సెలవిచ్చారు. ఇప్పుడు మొత్తం మార్కులు, టోటల్‌ సీజీపీఏను ముద్రించలేదు. మొత్తం మార్కులను ఎప్పుడైనా కూడుకోవచ్చు. కానీ సీజీపీఏను కూడటం చాలా సమస్యగా మారే అవకాశముంది. ఇదే విషయంపై ప్రభుత్వ పరీక్షల విభాగం డైరెక్టర్‌ కృష్ణారావును ఆరా తీయగా, ‘మెమోలపై మొత్తం మార్కులు, మొత్తం సీజీపీఏను తాము ముద్రించడం లేదు. ప్రభుత్వం ఇచ్చిన ఆదేశాల ఆధారంగానే మెమోలను మేం తయారుచేస్తున్నాం. మొత్తం మార్కులు కావాల్సినప్పుడు కూడి ఎన్ని మార్కులొచ్చాయో తెలుసుకోవచ్చు’ అంటూ వివరణ ఇచ్చారు.

ఏదో ఒకటి ముద్రించాలి

పదో తరగతి మెమోలపై మొత్తం మార్కులో లేక.. మొత్తం సీజీపీఏలో ఏదో ఒకటి ముద్రించాలని ఉపాధ్యాయ సంఘాల నేతలు కోరుతున్నారు. మార్కులు, సీజీపీఏ ముద్రించకపోవడంతో అస్పష్టత నెలకొన్నదని, గందరగోళ పరిస్థితులున్నాయని రాష్ట్ర భాషోపాధ్యాయ సంస్థ రాష్ట్ర అధ్యక్షుడు చక్రవర్తుల శ్రీనివాస్‌ ఆందోళన వ్యక్తంచేశారు. భవిష్యత్తులో అనేక సమస్యలొచ్చే అవకాశముందని, ఇంటర్‌, డిగ్రీ మెమోలపై ప్రథమ శ్రేణి, ద్వితీయ శ్రేణి మార్కులు ముద్రిస్తున్నప్పుడు పదో తరగతి మెమోలపై ఎందుకు ముద్రించడం లేదని ప్రశ్నించారు. ఇప్పటికైనా తప్పును దిద్దుకునే అవకాశముందని, షార్ట్‌ మెమోలు, లాంగ్‌ మెమోలు ముద్రించేలోపు నిర్ణయం తీసుకోవాలని పాఠశాల ప్రధానోపాధ్యాయుడు రాజభాను చంద్రప్రకాశ్‌ కోరారు.

భవిష్యత్తులో ఎదురయ్యే సమస్యలు

• పోస్టల్‌శాఖలో డాక్‌సేవక్‌, అసిస్టెంట్‌ బ్రాంచి పోస్ట్‌ మాస్టర్‌ పోస్టులను రాత పరీక్ష లేకుండా కేవలం పదో తరగతి మెరిట్‌ను బట్టే భర్తీచేస్తున్నారు. మొత్తం మార్కుల్లేకపోతే ఎవరు ప్రతిభావంతులో తేల్చడం ఎలా.. ?
• బాసర ఆర్జీయూకేటీలో సీట్లను ఇంత కాలం సీజీపీఏ ఆధారంగా భర్తీచేశారు. సర్కారు బడుల్లో చదువుకున్న వారికి 0.4శాతం సీజీపీఏ కలపడంతో సీట్లన్నీ సర్కారు బడుల్లోని వారే సొంతం చేసుకున్నారు. మొత్తం సీజీపీఏ ముద్రించకపోవడంతో 0.4శాతం సీజీపీఏను దేనికి కలపాలి?
• అంగన్‌వాడీ టీచర్‌ పోస్టులకు పదో తరగతి మెరిట్‌యే ఆధారం. మెరిట్‌ తేల్చాలంటే కుస్తీపట్టాల్సిందేనా?
• ఆర్టీసీలో కండక్టర్‌ పోస్టులను సైతం ఇది వరకు పదో తరగతిలో సాధించిన మార్కులను బట్టే ఉద్యోగాలిస్తున్నారు.
• ఆర్మీలోని కొన్ని క్యాటగిరీ పోస్టులకు సైతం పదో తరగతి మార్కులే ప్రమాణికం. రాత పరీక్షలను నిర్వహించిన కూడా పదో తరగతి మార్కులకు ప్రాధాన్యం ఇస్తారు.
• కోర్టుల్లో కిందిస్థాయి పోస్టులను పదో తరగతి మెరిట్‌, చిన్నపాటి పరీక్ష ఆధారంగా భర్తీచేస్తున్నారు.
• ఉద్యోగాల భర్తీ లేక ఉద్యోగావకాశాలకు ప్రస్తుతం, భవిష్యత్తులో పదో తరగతిలో ప్రథమ శ్రేణిలో ఉత్తీర్ణులైన వారే అర్హులంటే తేల్చడం సమస్యగా మారనున్నది.