సర్కార్‌ బడుల్లో 1,005 అదనపు తరగతి గదులు

172 సర్కార్‌ బడుల్లో 1,005 అదనపు తరగతి గదుల నిర్మాణానికి విద్యాశాఖ అనుమతులిచ్చింది. ఇందుకు రూ.141.15 కోట్లు ఖర్చు చేయనున్నట్టు సమగ్రశిక్షా డైరెక్టర్‌ నవీన్‌ నికోలస్‌ స్పష్టంచేశారు.

హైదరాబాద్‌, నవంబర్‌ 9 (నమస్తే తెలంగాణ): 172 సర్కార్‌ బడుల్లో 1,005 అదనపు తరగతి గదుల నిర్మాణానికి విద్యాశాఖ అనుమతులిచ్చింది. ఇందుకు రూ.141.15 కోట్లు ఖర్చు చేయనున్నట్టు సమగ్రశిక్షా డైరెక్టర్‌ నవీన్‌ నికోలస్‌ స్పష్టంచేశారు. టీజీఈడబ్ల్యూఐడీసీకి నిర్మాణ బాధ్యతలు అప్పగించారు.

12న ఇన్‌సర్వీస్‌ టెట్‌ హాల్‌టికెట్ల విడుదల

హైదరాబాద్‌, నవంబర్‌ 9 (నమస్తే తెలంగాణ): తెలంగాణ ఇన్‌ సర్వీస్‌ టెట్‌ హాల్‌టికెట్లను 12న విడుదల చేయనున్నట్టు టెట్‌ కన్వీనర్‌ జీ రమేశ్‌ తెలిపారు. https:// schooledu.telangana.gov.in వెబ్‌సైట్‌ నుంచి హాల్‌టికెట్లు డౌన్‌లోడ్‌ చేసుకోవచ్చని సూచించారు. ఈనెల 19న టెట్‌ను రెండు సెషన్లల్లో ఆన్‌లైన్‌లో నిర్వహిస్తామని తెలిపారు.

బడుల్లోనే దివ్యాంగ పిల్లల స్క్రీనింగ్‌

హైదరాబాద్‌, నవంబర్‌ 9 (నమస్తే తెలంగాణ): రాష్ట్రంలో అంగవైకల్యంతో బాధపడుతున్న చిన్నారులను గుర్తించేందుకు పాఠశాల విద్యాశాఖ చర్యలు చేపట్టింది. ప్రైవేట్‌ బడుల్లో స్క్రీనింగ్‌ చేపట్టాలని ఆదేశించింది. 3-18 ఏండ్ల దివ్యాంగులను గుర్తించేందుకు ఉద్దేశించిన స్క్రీనింగ్‌ను పూర్తిచేయాలని పాఠశాల విద్యాశాఖ డైరెక్టర్‌ నవీన్‌ నికోలస్‌ సూచించారు.

1,138 సర్కార్‌ బడుల్లో గ్రంథాలయాలు

హైదరాబాద్‌, నవంబర్‌ 9 (నమస్తే తెలంగాణ): రాష్ట్రంలోని సర్కార్‌ బడుల్లో గ్రంథాలయాలు, రీడింగ్‌ రూమ్‌లు ఏర్పాటు కానున్నాయి. 1,138 ప్రభుత్వ బడుల్లో వీటిని నెలకొల్పనున్నారు. ఇందుకు రూ.1.70 కోట్ల నిధులు మంజూరయ్యాయి.

పాఠశాల విద్యాశాఖ ఆర్జేడీగా బీ వెంకటనర్సమ్మ

హైదరాబాద్‌, నవంబర్‌ 9 (నమస్తే తెలంగాణ): పాఠశాల విద్యాశాఖ వరంగల్‌ ఆర్జేడీగా బీ వెంకటనర్సమ్మకు ప్రభుత్వం అదనపు బాధ్యతలప్పగించింది. ఆమె ప్రస్తుతం డైరెక్టరేట్‌లో జేడీ సర్వీసెస్‌ హోదాలో ఉన్నారు. వరంగల్‌ ఆర్జేడీగా ఈ విజయలక్ష్మిని నియమించగా, ఆమె సెలవుపై వెళ్లారు. తొలుత సమగ్ర శిక్షా ఆర్జేడీ మధన్‌మోహన్‌కు అదనపు బాధ్యతలప్పగించారు. తాజాగా వెంకటనర్సమ్మకు అదనపు బాధ్యతలప్పగించారు.

గెస్ట్‌ ఫ్యాకల్టీ నియామకానికి షెడ్యూల్‌

హైదరాబాద్‌, నవంబర్‌ 9 (నమస్తే తెలంగాణ): రాష్ట్రంలోని ప్రభుత్వ డైట్‌ కాలేజీలు, కాలేజ్‌ ఆఫ్‌ టీచర్‌ ఎడ్యుకేషన్‌, ఇన్‌స్టిట్యూట్‌ ఆఫ్‌ అడ్వాన్స్‌డ్‌ స్టడీస్‌ ఇన్‌ ఎడ్యుకేషన్‌ కాలేజీల్లో గెస్ట్‌ ఫ్యాకల్టీ నియామకానికి విద్యాశాఖ అనుమతినిచ్చింది. ఖాళీగా ఉన్న టీచింగ్‌ పోస్టులను తాత్కాలిక ప్రాతిపదికన నియామకానికి ఉత్తర్వులిచ్చింది. ఈ నెల 12న ఖాళీలను ప్రకటిస్తారు. 13 నుంచి 16 వరకు ఆసక్తి గల వారి నుంచి దరఖాస్తులు స్వీకరిస్తారు. 19న డెమో, ఇంటర్వ్యూలను నిర్వహించి 20న ఎంపికను పూర్తిచేస్తారు.