సర్దుబాటు పేరిట స్కూళ్లకు సమాధి… 23 వేల ప్రభుత్వ పాఠశాలల మూసివేత దిశగా సర్కార్‌ అడుగులు

ఎన్నికల సమయంలో ఆయా వర్గాలకు ఇచ్చిన హామీలను తుంగలో తొక్కడంలో ఆరితేరిన కాంగ్రెస్‌ సర్కార్‌, మరో వంచనకు సిద్ధమైంది. టీచర్ల సర్దుబాటు పేరిట స్కూళ్ల మూసివేతకు రంగం సిద్ధం చేసింది. విద్యారంగ ప్రక్షాళన మాట పక్కన పెట్టి ప్రభుత్వ విద్యకు సమాధి కట్టే ప్రణాళికలను అమలు చేస్తున్నది.

• టీచర్ల సర్దుబాటు ప్రక్రియ షురూ
• సర్కార్‌ నిర్ణయంపై సంఘాల గుర్రు
• అనాలోచిత చర్యగా టీచర్ల ఆగ్రహం
• జూలైలో సర్దుబాటుకు డిమాండ్‌

హైదరాబాద్‌, జూన్‌ 26 (నమస్తే తెలంగాణ) : ఎన్నికల సమయంలో ఆయా వర్గాలకు ఇచ్చిన హామీలను తుంగలో తొక్కడంలో ఆరితేరిన కాంగ్రెస్‌ సర్కార్‌, మరో వంచనకు సిద్ధమైంది. టీచర్ల సర్దుబాటు పేరిట స్కూళ్ల మూసివేతకు రంగం సిద్ధం చేసింది. విద్యారంగ ప్రక్షాళన మాట పక్కన పెట్టి ప్రభుత్వ విద్యకు సమాధి కట్టే ప్రణాళికలను అమలు చేస్తున్నది. 27వేల సర్కార్‌ స్కూళ్లను 4వేలకు కుదిస్తామని సీఎం రేవంత్‌రెడ్డి ఇటీవల ప్రకటించగా, ఈ మాటలను ఆచరణలో పెట్టే దిశగా విద్యాశాఖ అడుగులేస్తున్నది. మిగులు టీచర్ల సర్దుబాటు ప్రక్రియను చేపట్టింది. దీనిని ఉపాధ్యాయ సంఘాలు వ్యతిరేకిస్తున్నాయి. మరోవైపు కటాఫ్‌ తేదీని జూలై 31కి పొడిగించాలని టీచర్లు డిమాండ్‌ చేస్తున్నారు.

మిగులు టీచర్ల సర్దుబాటు..

పాఠశాలల్లో మిగులు టీచర్ల సర్దుబాటుకు ఇటీవలే పాఠశాల విద్యాశాఖ పచ్చజెండా ఊపింది. జిల్లా యూనిట్‌ విద్యార్థుల సంఖ్యను బట్టి మిగులు టీచర్లను తేల్చి వారిని సర్దుబాటు చేయాలని ఆదేశాలు జారీ చేసింది. జూన్‌ 20వ తేదీ నాటికి విద్యార్థుల ఎన్‌రోల్‌మెంట్‌ను బట్టి మిగులు టీచర్లు తేలితే ఇతర పాఠశాలల్లో సర్దుబాటు చేయాలని ఉత్తర్వులిచ్చింది. గతంలో వర్క్‌ అడ్జస్ట్‌మెంట్‌ కింద డిప్యుటేషన్‌పై వచ్చిన టీచర్లను ఏప్రిల్‌లో రిలీవ్‌ చేయలేదు. అంటే గతంలో సర్దుబాటు కింద పంపిన టీచర్లు అదే బడుల్లో కొనసాగుతున్నారు. తాజాగా మళ్లీ సర్దుబాటు ఉత్తర్వులిచ్చింది. మొత్తంగా విద్యాశాఖ జారీచేసిన ఉత్తర్వులు వివాదాస్పదమవుతున్నాయి. ప్రభుత్వ నిర్ణయాన్ని మెజారిటీ ఉపాధ్యాయ సంఘాలు తప్పుబడుతున్నాయి. ప్రాథమిక బడులను మూసివేయబోతున్నారని టీచర్లు వాపోతున్నారు. ఇప్పటికే రాష్ట్రంలో 2వేలకు పైగా జీరో ఎన్‌రోల్‌మెంట్‌ బడులు ఉండగా, 1400 పైచిలుకు బడులను విద్యాశాఖ మూసివేసింది. ఆ తర్వాత మిగిలిన బడుల మూసివేత ప్రక్రియకు రంగం సిద్ధం చేసిందని మండిపడుతున్నారు.

సగం బడులు ఖతం..

ఈ సర్దుబాటులో రాష్ట్రంలోని సగం బడులు ఖతం అవుతాయని టీచర్లు ఆందోళన వ్యక్తంచేస్తున్నారు. దాదాపు 10వేలకు పైగా ప్రాథమిక బడులు జీరోఎన్‌రోల్‌మెంట్‌ బడులయ్యి.. ఆ తర్వాత మూతబడుతాయని వాపోతున్నారు. ప్రాథమిక పాఠశాలలకు తరగతికి ఒక టీచర్‌కు ఇవ్వకుండా లక్ష సంస్కరణలు చేసినా వృథానేనని పేర్కొంటున్నారు.

ఉపాధ్యాయ సంఘాల వాదనలు..

• రాష్ట్రంలో అడ్మిషన్ల కటాఫ్‌ తేదీ సెప్టెంబర్‌ 30. అప్పటి దాకా బడుల్లో అడ్మిషన్లు తీసుకుంటారు. విద్యార్థులు చేరుతారు. మరి జూన్‌ 20వ తేదీని కటాఫ్‌గా ఎలా నిర్ణయిస్తారు.?
• ఒక స్కూళ్లో టీచర్‌ను మరో స్కూల్‌ను బదిలీచేసిన తర్వాత విద్యార్థుల సంఖ్య పెరిగితే ఆ విద్యార్థులకు పాఠాలెవరు చెబుతారు..?
• హైస్కూళ్లో 10 -20 మంది విద్యార్థులున్నా సబ్జెక్టుకు ఒక టీచర్‌ ఉంటారు. ప్రైమరీలోనేమో 1-5 తరగతులకు ఒకరిద్దరు టీచర్లను పరిమితం చేయడం సబబేనా..?
• ప్రాథమిక బడుల్లో 1-5 తరగతులకు మొత్తం 18 సబ్జెక్టులుంటాయి. ఒక టీచర్‌ ఈ 18 సబ్జెక్టులను ఎలా బోధిస్తారు.. ? విద్యార్థులకు నాణ్యమైన చదువులు ఎలా అందుతాయి..?

జూన్‌లోనే సర్దుబాటు సరికాదు

బడిబాట కార్యక్రమంతో విద్యార్థులు సర్కార్‌ బడుల్లో చేరేందుకు ముందుకొస్తున్నారు. మేం ఇంటింటికీ తిరిగి పిల్లల నమోదును పెంచేందుకు ప్రయత్నిస్తుంటే అధికారులేమో బడుల్లో టీచర్లు లేకుండా చేస్తున్నారు. పిల్లలు చేరిన తర్వాత బడుల్లో టీచర్లు లేకపోతే ఎలా..? జూన్‌లోనే టీచర్ల సర్దుబాటు చేయడం సరికాదు. మేం దీనిని తీవ్రంగా వ్యతిరేకిస్తున్నాం.

– మహిపాల్‌రెడ్డి, సెకండరీ గ్రేడ్‌

టీచర్స్‌ యూనియన్‌, రాష్ట్ర అధ్యక్షుడు

• జూలై 31 తర్వాతే సర్దుబాటు చేయాలి

సర్కార్‌ బడుల్లో సెప్టెంబర్‌ దాకా ఎన్‌రోల్‌మెంట్‌ నమోదవుతున్నది. అడ్మిషన్లు పెరుగుతుంటాయి. అడ్మిషన్లు పెరిగిన తర్వాత టీచర్లు లేకపోతే ప్రభుత్వ బడులపై నమ్మకం పోతుంది. విద్యాశాఖ మంత్రి లేకపోవడంతో మేం ఎవరికి చెప్పుకోవాలో తెలియడం లేదు. స్వయంగా సీఎం విద్యాశాఖను తన వద్ద పెట్టుకొని ఇలా ప్రక్షాళన పేరిట మార్పులు చేయడం దారుణం.

-రోహిత్‌నాయక్‌, తెలంగాణ స్టేట్‌ ప్రైమరీ టీచర్స్‌ అసోసియేషన్‌, రాష్ట్ర ప్రధాన కార్యదర్శి

ఇది అనాలోచిత చర్య

టీచర్ల సర్దుబాటు ప్రక్రియను ఇప్పుడు చేపట్టడం అనాలోచిత చర్య. ఈ విషయంపై సర్కార్‌ పునరాలోచించాలి. ఇచ్చిన ఉత్తర్వులను తక్షణమే సవరించాలి. జూలై 31 తర్వాతే సర్దుబాటును చేపట్టాలి. ఇప్పటికే అనేక బడులు టీచర్ల కొరతతో ఇబ్బందిపడుతున్నాయి. టీచర్ల ను సర్దుబాటు చేస్తే పాఠశాలలు మరింత బలహీనపడుతాయి. విద్యార్థుల సంఖ్యను పెంచేందుకు టీచర్లు కష్టపడుతుంటే టీచర్ల సంఖ్యను తగ్గించే చర్యలు గర్హనీయం.

-ఎం చెన్నయ్య, పీఆర్టీయూ రాష్ట్ర అధ్యక్షుడు