రెన్యూవబుల్‌ ఎనర్జీలో దక్షిణాది టాప్‌

దేశంలో రెన్యూవబుల్‌ ఎనర్జీ (సౌర, పవన విద్యుత్తుతోపాటు బయోగ్యాస్‌, చెత్త నుంచి తయారయ్యే విద్యుత్తు) ఎక్కువగా దక్షిణాది రాష్ర్టాల్లోనే ఉత్పత్తి అవుతున్నది. ఉత్తరాదిలో రాజస్థాన్‌, గుజరాత్‌, మహారాష్ట్ర, మధ్యప్రదేశ్‌, ఉత్తరప్రదేశ్‌, బీహార్‌, పశ్చిమ బెంగాల్‌ లాంటి పెద్ద రాష్ర్టాలున్నప్పటికీ దక్షిణాదిలోని 5 రాష్ర్టాలైన తెలంగాణ, ఏపీ, కర్ణాటక, తమిళనాడు, కేరళ భాగస్వామ్యం ఎక్కువగా ఉన్నట్టు తాజా నివేదిక వెల్లడించింది.

• జోరుగా సౌర శక్తి, పవన, బయోగ్యాస్‌ విద్యుత్తు ఉత్పత్తి
• ఉత్తర, పశ్చిమ ప్రాంతాలకంటే దక్షిణాది ఎంతో నయం

హైదరాబాద్‌, జూలై 28 (నమస్తే తెలంగాణ): దేశంలో రెన్యూవబుల్‌ ఎనర్జీ (సౌర, పవన విద్యుత్తుతోపాటు బయోగ్యాస్‌, చెత్త నుంచి తయారయ్యే విద్యుత్తు) ఎక్కువగా దక్షిణాది రాష్ర్టాల్లోనే ఉత్పత్తి అవుతున్నది. ఉత్తరాదిలో రాజస్థాన్‌, గుజరాత్‌, మహారాష్ట్ర, మధ్యప్రదేశ్‌, ఉత్తరప్రదేశ్‌, బీహార్‌, పశ్చిమ బెంగాల్‌ లాంటి పెద్ద రాష్ర్టాలున్నప్పటికీ దక్షిణాదిలోని 5 రాష్ర్టాలైన తెలంగాణ, ఏపీ, కర్ణాటక, తమిళనాడు, కేరళ భాగస్వామ్యం ఎక్కువగా ఉన్నట్టు తాజా నివేదిక వెల్లడించింది. సెంట్రల్‌ ఎలక్ట్రిసిటీ అథారిటీ (సీఈఏ) ఆధ్వర్యంలోని రెన్యూవబుల్‌ ప్రాజెక్ట్‌ మానిటరింగ్‌ విభాగం విడుదల చేసిన ఈ నెలవారీ నివేదికలో 2023 ఏప్రిల్‌, మే నెలలతోపాటు 2022 ఏప్రిల్‌, మే నెలల్లో వివిధ ప్రాంతాలవారీగా ఉత్పత్తయిన రెన్యూవబుల్‌ ఎనర్జీ వివరాలను పొందుపర్చారు.

• ఉత్తర ప్రాంతం (నార్తర్న్‌ రీజియన్‌)లో రాజస్థాన్‌, పంజాబ్‌, ఉత్తరప్రదేశ్‌, హర్యానా, హిమాచల్‌ప్రదేశ్‌, చండీగఢ్‌ లాంటి రాష్ర్టాలుండగా.. వెస్ట్రన్‌ రీజియన్‌ (పశ్చిమ ప్రాంతం)లో గుజరాత్‌, మధ్యప్రదేశ్‌, మహారాష్ట్ర, ఛత్తీస్‌గఢ్‌ లాంటి పెద్ద రాష్ర్టాలున్నాయి.
• దక్షిణ ప్రాంతం (సదరన్‌ రీజియన్‌)లోని ఏపీ, తెలంగాణ, కర్ణాటక, కేరళ, తమిళనాడు, లక్షద్వీప్‌, పాండిచ్చేరిలో రెన్యూవబుల్‌ ఎనర్జీ ఎక్కువగా ఉత్పత్తి అవుతున్నట్టు గణాంకాలు స్పష్టం చేస్తున్నాయి.
• 2023 మే నెలలో ఉత్తరాది కంటే దక్షిణాదిలో దాదాపు 550 మిలియన్‌ యూనిట్ల విద్యుత్తు ఎక్కువగా ఉత్పత్తి అయ్యింది. ఆ నెలలో దేశవ్యాప్తంగా ఉత్పత్తి అయిన రెన్యూవబుల్‌ ఎనర్జీలో దక్షిణాది వాటా 32 శాతానికిపైగా ఉండటం గమనార్హం.
• 2022 మే నెలలోనూ ఉత్తర, పశ్చిమ ప్రాంతాలకంటే దక్షిణాదిలోనే ఎక్కువ రెన్యూవబుల్‌ ఎనర్జీ ఉత్పత్తి అయింది. ఈ నెలలో ఉత్తరాది నుంచి 5,318.88 మిలియన్‌ యూనిట్లు, పశ్చిమ ప్రాంతం నుంచి 6,944.80 మిలియన్‌ యూనిట్ల విద్యుత్తు ఉత్పత్తి కాగా.. దక్షిణాదిలో ఏకంగా 8,300.11 మిలియన్‌ యూనిట్లు ఉత్పత్తి అయ్యింది. ఈస్ట్రన్‌, నార్త్‌-ఈస్ట్రన్‌ రీజియన్లు కేవలం రెండు, మూడు వందల మిలియన్‌ యూనిట్లలోపే ఉత్పత్తి చేయడం గమనార్హం.
• 2023 ఏప్రిల్‌, మే నెలల్లో ఉత్తరాది కంటే 410 మిలియన్‌ యూనిట్లు అధికంగా రెన్యూవబుల్‌ ఎనర్జీని ఉత్పత్తి చేసిన దక్షిణ భారతావని.. పశ్చిమ ప్రాంతం కంటే కేవలం 130 మిలియన్‌ యూనిట్లు మాత్రమే వెనకబడింది.
• 2022 ఏప్రిల్‌, మే నెలల్లో దక్షిణ భారతావని ఉత్తరాది కంటే దాదాపు 3,500 మిలియన్‌ యూనిట్లు.. వెస్ట్రన్‌ రీజియన్‌ కంటే 1,500 మిలియన్‌ యూనిట్లు ఎక్కువగా రెన్యూవబుల్‌ ఎనర్జీని ఉత్పత్తి చేసింది. ఈ రెండు మాసాల్లో దేశవ్యాప్తంగా 35,989.83 మిలియన్‌ యూనిట్ల రెన్యూవబుల్‌ ఎనర్జీ ఉత్పత్తి కాగా.. అందులో 37.42 శాతం (13,469.02 మిలియన్‌ యూనిట్లు) దక్షిణాదిలో ఉత్పత్తి అయింది.