Polytechnic | పాలిటెక్నిక్‌కు సర్కారు ఉరి?.. ఫీజులు పెంచి పూర్తి రీయింబర్స్‌మెంట్‌ ఇవ్వని రేవంత్‌ ప్రభుత్వం 

పాలిటెక్నిక్‌ కోర్సులకు రాష్ట్ర ప్రభుత్వం ఉరితాడు బిగిస్తున్నది. ఈ ఏడాది పాలిటెక్నిక్‌ కోర్సుల్లో జరిగిన అడ్మిషన్లే ఇందుకు నిదర్శనం. దశాబ్దకాలంగా ప్రైవే ట్‌ పాలిటెక్నిక్‌ కాలేజీల్లో రూ.14,900గా ఉన్న ట్యూషన్‌ ఫీజును ప్రభుత్వం ఈ ఏడాది రూ.39 వేలకు పెంచింది.

• కోర్సుల్లో చేరేందుకు విద్యార్థుల అనాసక్తి
• ఈ ఏడాది 12వేలకుపైగా మిగిలిన సీట్లు
• ఈ కారణాలతోనే డిప్లొమాకు తగ్గిన డిమాండ్‌

Polytechnic | హైదరాబాద్‌, ఆగస్టు 9 (నమస్తే తెలంగాణ): పాలిటెక్నిక్‌ కోర్సులకు రాష్ట్ర ప్రభుత్వం ఉరితాడు బిగిస్తున్నది. ఈ ఏడాది పాలిటెక్నిక్‌ కోర్సుల్లో జరిగిన అడ్మిషన్లే ఇందుకు నిదర్శనం. దశాబ్దకాలంగా ప్రైవే ట్‌ పాలిటెక్నిక్‌ కాలేజీల్లో రూ.14,900గా ఉన్న ట్యూషన్‌ ఫీజును ప్రభుత్వం ఈ ఏడాది రూ.39 వేలకు పెంచింది. గతంలో ఫీజు మొత్తాన్ని రీయింబర్స్‌ చేయగా, ఈ ఏడాది మాత్రం కేవలం రూ.14,900 మాత్రమే రీయింబర్స్‌మెంట్‌ ఇస్తామన్నది. దీంతో మిగిలిన రూ.24,100 మొత్తాన్ని విద్యార్థుల తల్లిదండ్రులే భరించాల్సి వచ్చింది.

ఈ భారాన్ని మోయలేక చాలా మంది విద్యార్థులు ఈ ఏడాది పాలిటెక్నిక్‌కు దూరమయ్యారు. పైగా ఈసారి నోటిఫికేషన్‌ నుంచి సీట్ల కేటాయింపు వరకు అంతా గందరగోళంగా మారడంతో అడ్మిషన్లు అమాంతం తగ్గిపోయాయి. ఏకంగా 12 వేలకుపైగా సీట్లు మిగిలాయి. ప్రైవేట్‌ కాలేజీల్లో మొత్తం సీట్లల్లో కేవలం 42% మాత్రమే భర్తీ అయ్యాయి.

ఇది పరిస్థితి..

• రాష్ట్రంలో 55 ప్రైవేట్‌ పాలిటెక్నిక్‌ కాలేజీలుండగా, 43కాలేజీల్లో ట్యూషన్‌ పీజు రూ. 39 వేలకు పెరిగింది. మిగిలిన 12 కాలేజీల్లో ఒక కాలేజీలో రూ. 14,900 ఫీజు మాత్రమే. 11 కాలేజీల్లో ఫీజులు రూ. 15వేల నుంచి 36 వేల మధ్యలో ఉన్నాయి. అంటే ఒక్కో విద్యార్థి గరిష్ఠంగా రూ. 24వేలు, కనిష్ఠంగా రూ. 10వేలు జేబులో నుంచి చెల్లించాల్సిన పరిస్థితి తలెత్తింది.
• ఓ కాలేజీలో సివిల్‌లో 28, మెకానికల్‌లో 28, ఎలక్ట్రికల్‌ అండ్‌ ఎలక్ట్రానిక్స్‌లో 22, ఈసీఈలో 22 సీట్లు మిగిలాయి.
• ఈసారి 115 కాలేజీల్లో మొత్తం 29, 449 సీట్లకు 16,458 సీట్లు (55.8%) మాత్రమే భర్తీ అయ్యాయి.
• 59 ప్రభుత్వ కాలేజీల్లో 14,209 సీట్లుండగా, ఈ ఏడాది 9,962(70%) సీట్లు నిండగా, 4,247 సీట్లు ఖాళీగా ఉన్నాయి.
• రాష్ట్రంలో 56 ప్రైవేట్‌ కాలేజీలుంటే వీటిల్లో 15,240 సీట్లుండగా.. వీటిలో కేవలం 6,496 సీట్లు(42.6%) మాత్రమే భర్తీ అయ్యాయి. ఏకంగా ఈ 56 కాలేజీల్లోనూ 8,744 సీట్లు ఖాళీగా ఉన్నాయి.
• ఈ సారి 12వేలకు పైగా సీట్లు భర్తీకాకపోగా, వీటిలో దాదాపు 9వేల సీట్లు ప్రైవేట్‌ కాలేజీల్లోనే భర్తీకాలేదు.