టెన్త్‌లో 6 పేపర్లే.. ఈ విద్యాసంవత్సరం నుంచే అమలు

పదో తరగతి పరీక్షల్లో ప్రభుత్వం భారీ సంస్కరణలు తీసుకువచ్చింది. ఈ విద్యాసంవత్సరం నుంచి 11 పేపర్లను కుదించి, 6 పేపర్లకే పరీక్షలు నిర్వహించాలని నిర్ణయించింది.

• 80 మార్కులకు రాత పరీక్ష
• ఫార్మేటివ్‌ అసెస్‌మెంట్‌కు 20
• వ్యాసరూప ప్రశ్నల్లోనే చాయిస్‌
• సూక్ష్మరూప ప్రశ్నలకు ఉండదు
• సైన్స్‌ సబ్జెక్ట్‌లో ఫిజిక్స్‌కు 40
• జీవశాస్ర్తానికి 40 మార్కులు
• 9వ తరగతికీ ఇదే విధానం
• ఏప్రిల్‌ 3 నుంచి టెన్త్‌ ఎగ్జామ్స్‌

హైదరాబాద్‌, డిసెంబర్‌ 28 (నమస్తే తెలంగాణ) : పదో తరగతి పరీక్షల్లో ప్రభుత్వం భారీ సంస్కరణలు తీసుకువచ్చింది. ఈ విద్యాసంవత్సరం నుంచి 11 పేపర్లను కుదించి, 6 పేపర్లకే పరీక్షలు నిర్వహించాలని నిర్ణయించింది. ఒక్కో సబ్జెక్టులో 80 మార్కులకు పరీక్ష ఉంటుంది. మిగతా 20 మార్కుల్ని ఫార్మెటివ్‌ అసెసెమెంట్‌కు ఇచ్చారు. 9వ తరగతి విద్యార్థులకు కూడా ఇదే విధానం వర్తిస్తుంది. ఈ మేరకు బుధవారం విద్యాశాఖ కార్యదర్శి వాకాటి కరుణ జీవో 33 జారీ చేశారు. ఇదివరకు వ్యాసరూప, సూక్ష్మరూప ప్రశ్నలు రెండింటిలోనూ విద్యార్థులకు చాయిస్‌ ఇచ్చేవారు. కానీఇప్పుడు వ్యాసరూప ప్రశ్నల్లోనే చాయిస్‌ ఉంటుంది. సూక్ష్మ రూప ప్రశ్నలకు చాయిస్‌ వర్తించదు. మరోవైపు పదో తరగతి పరీక్షల షెడ్యూల్‌ కూడా విద్యాశాఖ ఖరారు చేసింది. పరీక్షలు వచ్చే ఏడాది ఏప్రిల్‌ 3న ప్రారంభమై, 13న ముగుస్తాయని తెలిపింది. పదోతరగతి పరీక్షల షెడ్యూల్‌ రూపకల్పనపై విద్యాశాఖ మంత్రి సబితా ఇంద్రారెడ్డి బుధవారం సమీక్షను నిర్వహించారు. ఈ ఏడాది నుంచి 100 శాతం సిలబస్‌తో పదో తరగతి పరీక్షలు నిర్వహిస్తామని మంత్రి తెలిపారు. గతంలో కరోనా ప్రభావంతో గత రెండేండ్లు 70శాతం సిలబస్‌కే పరీక్షలు నిర్వహించామని గుర్తుచేశారు. పరీక్షల దృష్ట్యా సెలవు రోజుల్లో కూడా విద్యార్థులకు ప్రత్యేక తరగతులు నిర్వహించాలని సూచించారు. మంత్రి మాట్లాడుతూ విద్యార్థులు ఏదైనా సబ్జెక్టుల్లో వెనుకబడి ఉంటే వారికి ప్రత్యేకంగా బోధించాలని తెలిపారు. ప్రైవేట్‌ స్కూళ్లకు దీటుగా సర్కారు బడులు వందశాతం ఉత్తీర్ణత సాధించేలా చర్యలు చేపట్టాలని పేర్కొన్నారు. ఫిబ్రవరి , మార్చి మాసాల్లో ఫ్రీ ఫైనల్‌ పరీక్షలు నిర్వహించనున్నట్టు వివరించారు. సమావేశంలో విద్యాశాఖ కార్యదర్శి వాకాటి కరుణ, పాఠశాల విద్యాశాఖ డైరెక్టర్‌ శ్రీదేవసేన, ప్రభుత్వ పరీక్షల విభాగం డైరెక్టర్‌ కృష్ణారావు తదితరులు ఈ సమీక్షలో పాల్గొన్నారు.

మాడల్‌ పేపర్లు విడుదల

పదో తరగతి పేపర్లను 6 పేపర్లకు కుదించిన నేపథ్యంలో మాడల్‌ పేపర్లను ఎస్సీఈఆర్టీ వెబ్‌సైట్‌లో అప్‌లోడ్‌ చేసినట్టు ఎస్సీఈఆర్టీ డైరెక్టర్‌ రాధారెడ్డి తెలిపారు. అన్ని సబ్జెక్టులకు సంబంధించిన మాడల్‌ పేపర్లను అందుబాటులో ఉంచామని చెప్పారు.

సైన్స్‌లో రెండు పేపర్లు

సైన్స్‌ సబ్జెక్టులో భౌతికశాస్త్రం, జీవశాస్త్రం పేపర్లకు 40 మార్కుల చొప్పున ఒకేరోజు పరీక్ష నిర్వహిస్తారు. సైన్స్‌ పేపర్‌కు పరీక్షా సమయం 3 : 20 నిమిషాలు కాగా, మిగతా సబ్జెక్టులకు 3 గంటల సమయం కేటాయించారు.

మార్గదర్శకాలు

• పదో తరగతి పరీక్షలను ఉదయం 9 : 30 గంటల నుంచి మధ్యాహ్నం 12 : 30 గంటల వరకు నిర్వహిస్తారు.
• కాంపోజిట్‌ కోర్సుల పరీక్షా సమయం మాత్రం 3 : 20 గంటలు ఉంటుంది. పార్ట్‌ -1లో తెలుగు, ఉర్దూ పేపర్లకు 2 గంటలు, పార్ట్‌ -2లో సంస్కృతం, అరబిక్‌, హిందీ పేపర్లకు గంట సమయమిస్తారు. ప్రశ్నపత్రాల మార్పిడి, జవాబుపత్రాల సేకరణకు 20 గంటల అదనపు సమయాన్ని కేటాయిస్తారు.
• ఒరియంటల్‌ సెకండరీ స్కూల్‌ సర్టిఫికెట్‌ స్కీమ్‌ ( ఓఎస్సెస్సీ ) విద్యార్థులకు సంస్కృతం, అరబిక్‌ పేపర్లకు 20 ఇంటర్నల్‌ మార్కులు, 80 మార్కుల చొప్పున పరీక్ష నిర్వహిస్తారు.
• వొకేషనల్‌ ఎడ్యుకేషన్‌ పరీక్షల్లో ఎలాంటి మార్పులేదు. గతంలో మాదిరిగానే పరీక్షలు నిర్వహిస్తారు.

సంస్కరణలు.. ఫలితాలిలా..

• ఇకనుంచి 6 పేపర్లకు పరీక్షల నిర్వహణతో విద్యార్థులపై భారం తగ్గి, ఆందోళన, ఒత్తిడి దరిచేరవు.
• కరోనాతో గత రెండేండ్లు 70 శాతం సిలబస్‌కు పరీక్షలుండగా, ఈ ఏడాది సాధారణ పరిస్థితులు నెలకొనడంతో 100శాతం సిలబస్‌కు పరీక్షలు నిర్వహిస్తారు.
• బట్టీ విధానానికి ముగింపు పలుకుతూ అప్లికేషన్‌ మెథడ్‌లో ప్రశ్నలిస్తారు. విద్యార్థి సమగ్ర అవగాహనను పరిశీలించేలా ప్రశ్నలుంటాయి.
• వారంలోనే పరీక్షలు పూర్తవుతుండటంతో మూల్యాంకనం త్వరగానే ముగుస్తుంది.

ట్రస్మా హర్షం

పదో తరగతి వార్షిక పరీక్షలను 11 పేపర్లకు బదులుగా ఆరు పేపర్లకే నిర్వహించాలని నిర్ణయించడాన్ని ట్రస్మా రాష్ట్ర అధ్యక్షుడు యాదగిరి శేఖర్‌రావు, ప్రధాన కార్యదర్శి సాదుల మధుసూదన్‌, కోశాధికారి ఐవీ రమణారావు స్వాగతించారు. మాడల్‌ పేపర్లను సైతం విడుదల చేయడం పట్ల వారు హర్షం వ్యక్తం చేశారు.