SSC Exams | పదో తరగతి ఎగ్జామ్‌ సెంటర్‌లో క్లాత్‌తో కిటికీల మూసివేత

SSC Exams | పదోతరగతి పరీక్షలపై అధికారులు ప్రత్యేక దృష్టిసారించారు. ప్రశ్నపత్రాలు బయటికి రాకుండా విద్యాశాఖ అధికారులు పలు ఆదేశాలు జారీ చేశారు. పరీక్షాకేంద్రాల కిటికీలను గ్రీన్‌ క్లాత్‌తో మూసివేయాలని చెప్పారు. పరీక్షాకేంద్రాలకు ప్రహరీలు లేకపోయినా, ఎత్తు తక్కువగా ఉన్నా జాగ్రత్తలు తీసుకోవాలని సూచించారు.

SSC Exams | హైదరాబాద్‌, ఏప్రిల్‌ 8 (నమస్తే తెలంగాణ) : పదోతరగతి పరీక్షలపై అధికారులు ప్రత్యేక దృష్టిసారించారు. ప్రశ్నపత్రాలు బయటికి రాకుండా విద్యాశాఖ అధికారులు పలు ఆదేశాలు జారీ చేశారు. పరీక్షాకేంద్రాల కిటికీలను గ్రీన్‌ క్లాత్‌తో మూసివేయాలని చెప్పారు. పరీక్షాకేంద్రాలకు ప్రహరీలు లేకపోయినా, ఎత్తు తక్కువగా ఉన్నా జాగ్రత్తలు తీసుకోవాలని సూచించారు. ఇటీవలే హనుమకొండ జిల్లా కమలాపూర్‌లో హిందీ పరీక్ష జరుగుతున్న సమయంలో గుర్తుతెలియని వ్యక్తులు పరీక్షాకేంద్రంలోకి ప్రవేశించి ప్రశ్నపత్రాలను ఫొటోలు తీసి వాట్సాప్‌లో పంపించిన విషయం తెలిసిందే.

ఆదేశాలిలా

• సైన్స్‌, సోషల్‌ స్టడీస్‌ పేపర్లకు ఎగ్జామ్స్‌ రోజున ఆయా సబ్జెక్టులు బోధించే స్కూల్‌ అసిస్టెంట్స్‌ ఎట్టి పరిస్థితుల్లో పరీక్షాకేంద్రాల్లో ఉండొద్దు. అయితే సీఎస్‌డీవోలు మాత్రం ఉండొచ్చు.
• పరీక్షలు పూర్తయ్యాక, ఆయా పేపర్ల బండిల్స్‌ బయటికి వెళ్లే వరకు 1-9 తరగతుల విద్యార్థులను బడిలోకి అనుమతించొద్దు. మధ్యాహ్న భోజనం వడ్డించొద్దు.
• చీఫ్‌ సూపరింటెండెంట్లు, డిపార్ట్‌మెంటల్‌ అధికారులు కూర్చొనే గదుల్లో కంప్యూటర్లు, ప్రింటర్లు, జిరాక్స్‌ మిషన్లు ఉండకుండా జాగ్రత్తలు పాటించాలి.
• సాధ్యమైనంత వరకు రెగ్యులర్‌ టీచర్లకే ఇన్విజిలేటర్‌ విధులను కేటాయించాలి.

పది పరీక్షలకు 99.63% హాజరు

పదో తరగతి వార్షిక పరీక్షలు సజావుగా కొనసాగుతున్నాయి. శనివారం గణితం పరీక్ష జరుగగా, 99.63 శాతం విద్యార్థులు రాశారు. జయశంకర్‌ భూపాలపల్లి జిల్లా రేగొండ జడ్పీహెచ్‌ఎస్‌లో విధి నిర్వహణలో నిర్లక్ష్యంగా వ్యవహరించిన ఇద్దరు ఇన్విజిలేటర్లను విధుల నుంచి తొలగించారు.