చిక్కుముళ్లు విప్పుతున్న ధరణి

• లక్షన్నరకుపైగా ‘భూ’ దరఖాస్తుల పరిష్కారం
• 90 శాతానికిపైగా సమస్యలకు ఆప్షన్లు
• 1.40 లక్షల పెండింగ్‌ మ్యుటేషన్లకు మోక్షం

హైదరాబాద్‌, ఆగస్టు 19 (నమస్తే తెలంగాణ): వ్యవసాయ భూములకు సంబంధించి ఏండ్లుగా ఉన్న చిక్కుముడులు ధరణి పోర్టల్‌ వేదికగా పరిష్కారం అవుతున్నాయి. భూ సమస్యలపై దరఖాస్తు చేసుకునేందుకు పోర్టల్‌లో ఉన్న అవకాశాలను ప్రజలు సద్వినియోగం చేసుకుంటున్నారు. ముఖ్యంగా సర్వే నంబర్లు కనిపించకపోవడం, పొరబాటున నిషేధిత జాబితాలో కనిపించడం, విస్తీర్ణం తక్కువగా నమోదుకావడం వంటి సమస్యలపై దరఖాస్తు చేసుకునేందుకు అందుబాటులోకి తెచ్చిన ‘గ్రీవెన్స్‌ ఆన్‌ స్పెసిఫిక్‌ ల్యాండ్‌ మ్యాటర్స్‌’కు పెద్ద ఎత్తున దరఖాస్తులు వస్తున్నాయి. అధికారులు వాటిని నిశితంగా పరిశీలించి పరిష్కరిస్తున్నారు. ప్రస్తుతం పోర్టల్‌లో 28 ట్రాన్సాక్షన్‌ మాడ్యూల్స్‌, 14 ఇన్పర్మేషన్‌ మాడ్యూల్స్‌ అందుబాటులో ఉన్నాయి.

• గ్రీవెన్స్‌ ల్యాండ్‌ మ్యాటర్స్‌లో ఇప్పటివరకు రాష్ట్రవ్యాప్తంగా సుమారు 1.47 లక్షల దరఖాస్తులు వచ్చాయి. ఇందులో 1.27 లక్షల దరఖాస్తులను పరిష్కరించారు. అన్నీ సవ్యంగా ఉన్నవాటిని అనుమతించగా, వివరాలు తప్పుగా ఉన్న దరఖాస్తులను తిరస్కరించారు. మొత్తంగా 86.4 శాతం దరఖాస్తులను పరిష్కరించినట్టు అధికారులు తెలిపారు.
• కంపెనీలకు పాస్‌బుక్‌లు ఇచ్చేందుకు ప్రత్యేక మాడ్యూల్‌ను అందుబాటులోకి తేగా.. దీనికింద ఇప్పటివరకు 1100కు పైగా రిజిస్ట్రేషన్లు జరిగాయి.
• ప్రభుత్వ అవసరాల నిమిత్తం రైతు నుంచి కొంత భూమిని సేకరిస్తే కొన్ని సందర్భాల్లో మిగతా భూమి సైతం నిషేధిత జాబితాలో కనిపిస్తున్నది. దీనిని పరిష్కరించేందుకు ‘స్వాధీనం చేసుకున్న భూములపై ఫిర్యాదు’ (గ్రీవెన్స్‌ రిలేటెడ్‌ టు ఇన్‌క్లూజన్‌ ఇన్‌ ప్రొహిబిటెడ్‌ ప్రాపర్టీ లిస్ట్‌) మాడ్యూల్‌ను అందుబాటులోకి తెచ్చింది. ఈ విభాగంలో ఇప్పటివరకు 18 వేలకుపైగా దరఖాస్తులు రాగా, వాటిలో దాదాపు 15 వేలను పరిష్కరించారు. దాదాపు 83.4 శాతం దరఖాస్తులకు మోక్షం లభించింది.
• ఆధార్‌ సీడింగ్‌కు సంబంధించి దాదాపు 11 వేల దరఖాస్తులను పరిష్కరించారు.
  పెండింగ్‌ మ్యుటేషన్‌ కోసం 1,41,481 లక్షల దరఖాస్తులు రాగా, 1,40,925 దరఖాస్తులను పరిష్కరించారు. కేవలం 556 దరఖాస్తులు మాత్రమే పెండింగ్‌లో ఉన్నాయి. 99.6 శాతం దరఖాస్తులు పరిష్కారం అయ్యాయి.
• వ్యవసాయ భూములకు సంబంధించి రైతులు ఎదుర్కొంటున్న ఇబ్బందుల్లో 90 శాతానికి పైగా సమస్యలకు ప్రస్తుతం ధరణిలో పరిష్కారం లభిస్తున్నది. మిగతా సమస్యలను సైతం పరిష్కరించేందుకు ప్రభుత్వం, అధికారులు తీవ్రంగా కృషి చేస్తున్నారు. త్వరలో మరో ఒకటి రెండు మాడ్యూల్స్‌ అందుబాటులోకి వచ్చే అవకాశం ఉందని తెలుస్తున్నది. ప్రతి సమస్యను పరిష్కరిస్తామని, ఇందుకు కాస్త సమయం పడుతుందని అధికారులు చెప్తున్నారు.