అటకెక్కిన ‘ఆయుష్మాన్‌’.. రూ.1.21 లక్షల కోట్ల మేర పెండింగ్‌ బకాయిలు

‘ఆయుష్మాన్‌ భారత్‌ (పీఎంజేఏవై)’ ఆరోగ్య పథకం కింద లక్షలాది పేద, మధ్య తరగతి ప్రజలకు ఉచితంగా ఆరోగ్య సేవలను అందిస్తున్నామంటూ ప్రధాని నరేంద్ర మోదీ నేతృత్వంలోని ఎన్డీయే ప్రభుత్వం ఊదరగొడుతున్నది.

• నిధుల విడుదలలో మోదీ సర్కారు తీవ్ర అలసత్వం
• రోగులకు సేవలను నిరాకరిస్తున్న ప్రైవేటు దవాఖానలు
• బీజేపీ పాలిత హర్యానాలో ఇప్పటికే సేవలు బంద్‌
• 16 నుంచి మణిపూర్‌లోనూ సర్వీసులు నిలిపివేత
• వైద్యం అందక పేద, మధ్యతరగతి రోగుల ఇబ్బందులు
• ఎన్నికల్లో ప్రచారానికే స్కీమ్‌ను వాడుకొంటున్న బీజేపీ
• అక్రమాలకు అడ్డాగా ఆయుష్మాన్‌ భారత్‌: కాగ్‌ నివేదిక(స్పెషల్‌ టాస్క్‌ బ్యూరో)

హైదరాబాద్‌, ఆగస్టు 9 (నమస్తే తెలంగాణ): ‘ఆయుష్మాన్‌ భారత్‌ (పీఎంజేఏవై)’ ఆరోగ్య పథకం కింద లక్షలాది పేద, మధ్య తరగతి ప్రజలకు ఉచితంగా ఆరోగ్య సేవలను అందిస్తున్నామంటూ ప్రధాని నరేంద్ర మోదీ నేతృత్వంలోని ఎన్డీయే ప్రభుత్వం ఊదరగొడుతున్నది. దేశంలో ఎక్కడ ఎన్నికలు జరిగినా.. ఈ మాటలనే వల్లె వేస్తున్నది. అయితే, మోదీ ప్రభుత్వం చేస్తున్న ఈ ప్రచారమంతా ఉత్తదేనని తేలింది. ‘ఆయుష్మాన్‌ భారత్‌’ కింద విడుదల చేయాల్సిన బకాయిలు అంతకంతకూ పేరుకుపోతున్నాయని, దీంతో ప్రైవేటు దవాఖానల్లో పేద రోగులకు సేవలు దూరమవుతున్నాయని తెలిసింది. నేషనల్‌ హెల్త్‌ అథారిటీకి.. ఇండియన్‌ మెడికల్‌ అసోసియేషన్‌ (ఐఎంఏ) ఇటీవల సమర్పించిన శ్వేత పత్రంలోనూ ఇదే విషయం తేలింది. ఆయుష్మాన్‌ భారత్‌ పథకం కింద చెల్లింపులు ఆలస్యమవుతున్నాయని, దేశవ్యాప్తంగా ప్రైవేటు దవాఖానలకు కేంద్ర ప్రభుత్వం చెల్లించాల్సిన సొమ్ము రూ.1.21 లక్షల కోట్ల మేర పేరుకుపోయినట్టు ఐఎంసీ తెలిపింది. బకాయిలు పేరుకుపోవడంతో పలు ప్రైవేటు దవాఖానలు పేద, మధ్య తరగతి రోగులను చేర్చుకోవడం లేదని, మరికొన్ని చోట్ల రోగుల నుంచే డబ్బులను వసూలు చేస్తున్నాయని హక్కుల కార్యకర్తలు ఆరోపిస్తున్నారు. మొత్తంగా మోదీ ప్రభుత్వం తీసుకొచ్చిన ‘ఆయుష్మాన్‌ భారత్‌’ ఫలాలు అటకెక్కాయని, అయినప్పటికీ కేంద్ర ప్రభుత్వం ఎంతమాత్రం పట్టించుకోవట్లేదని విమర్శలు వ్యక్తమవుతున్నాయి.

హర్యానాలో అలా.. మణిపూర్‌లో ఇలా..
బకాయిలు చెల్లించలేదన్న కారణంతో బీజేపీ పాలిత హర్యానాలో దాదాపు 650 ప్రైవేటు దవాఖానలు ఆయుష్మాన్‌ భారత్‌ సేవలను నిలిపేశాయి. రూ. 490 కోట్ల బిల్లులను విడుదల చేయాల్సి ఉండగా, ప్రభుత్వం ఒక్క పైసా కూడా ఇవ్వలేదని ఐఎంఏ హర్యానా కార్యదర్శి ధీరేందర్‌ కే సోనీ ఆరోపించారు. పెండింగ్‌ బిల్లులను విడుదల చేయకపోతే ఆగస్టు 16 నుంచి మణిపూర్‌లోని ప్రైవేటు దవాఖానల్లో ఆయుష్మాన్‌ సేవలను నిలిపే యనున్నట్టు ఆ రాష్ట్ర ఐఎంఏ ప్రతిని ధులు హెచ్చరించారు. ప్రభుత్వ దవాఖానల్లో వసతులు లేకపోవడంతో ఆయుష్మాన్‌ లబ్ధిదారులు ప్రైవేటు దవాఖానలకు వెళ్తున్నారు. అయితే, ఇప్పుడు అక్కడ కూడా సేవలను నిలిపేస్తుండటంతో ప్రభుత్వ తీరుపై మండిపడుతున్నారు.

అక్రమాలకు అడ్డా..
పెండింగ్‌ బిల్లులే కాదు.. అవకతవకలకు అడ్డాగా, అక్రమార్కులకు ఆదాయ వనరుగా ‘ఆయుష్మాన్‌ భారత్‌’ పథకం మారింది. వాడుకలో లేని ఒకే ఫోన్‌ నంబర్‌పై (9999999999) ఈ పథకం కింద ఏకంగా 9,85,166 రిజిస్ట్రేషన్లు జరిగాయంటే స్కీమ్‌ అమలులో ఎన్ని లోటుపాట్లు జరుగు తున్నాయో అర్థమవుతున్నది. ఈ మేరకు 2023లో కాగ్‌ పార్లమెంట్‌లో ఓ నివేదికను సమర్పించింది. పథక లబ్ధిదారుల జాబితాలో అవాస్తవిక పేర్లు, తప్పుడు పుట్టిన తేదీలు, డూప్లికేట్‌ పీఎంజేడీవై ఐడీలు, కుటుంబ సభ్యుల సంఖ్యలో తేడాలు గుర్తించినట్టు కాగ్‌ తెలిపింది.

కాగ్‌ నివేదిక-2023 ప్రకారం ఈ పథకంలో అక్రమాలు ఇలా..

• ఆయుష్మాన్‌ భారత్‌ లబ్ధిదారుల జాబితాలో అవాస్తవిక పేర్లు, తప్పుడు పుట్టిన తేదీలు, డూప్లికేట్‌ ఐడీలు, కుటుంబ సభ్యుల సంఖ్యలో తేడాలు గుర్తించారు.
• ఒకే ఆధార్‌ నంబర్‌తో వేర్వేరు రోగుల పేర్లతో రిజిస్ట్రేషన్‌ జరిగింది. తమిళనా డులో ఏడు ఆధార్‌ కార్డు నంబర్లతో ఏకంగా 4,761 రిజిస్ట్రేషన్లు జరిగాయి.
• ఒకే ఫోన్‌ నంబర్‌ (9999999999)తో 7,49,820 లక్షల మంది లబ్ధిదారులు రిజిస్టరయ్యారు.
• అప్పటికే చనిపోయిన 88,760 మంది రోగులకు చికిత్స చేయాలంటూ నకిలీ రిజిస్ట్రేషన్లు నమోదయ్యాయి. ఛత్తీస్‌గఢ్‌, హర్యానా, జార్ఖండ్‌, కేరళ, మధ్యప్ర దేశ్‌లో ఈ తరహా కేసులు ఎక్కువగా కనిపించాయి.
• మౌలిక సదుపాయాలు, డాక్టర్లు లేని దవాఖానలను కూడా పథకంలోకి ఉద్దేశ పూర్వకంగా చేర్చారు. పథకం మార్గదర్శ కాలు సంతృప్తిపరిచేలా లేవు.
• దవాఖాన నుంచి రోగులు డిశ్చార్జి అయి న తర్వాత.. వారికి సర్జరీలు చేసినట్టు కొన్ని దవాఖానలు తప్పుడు రికార్డులు నమోదు చేయడం గుర్తించారు. ఇలా డాక్యుమెంట్లు సరిగా లేని కేసులు 2,25,827 వరకు ఉన్నాయి.
• ఒకే రోగి, ఒకే సమయంలో వేర్వేరు దవాఖానల్లో పేరును రిజిస్ట్రేషన్‌ చేసుకొ న్నప్పటికీ బెనిఫిషరీ ఐడెంటిఫికేషన్‌ సిస్టమ్‌ (బీఐఎస్‌) ఆ పొరపాట్లను గుర్తించలేదు.
• కొన్ని దవాఖానలు లబ్ధిదారుల నుంచి డబ్బు వసూళ్లకు పాల్పడ్డాయి.
• ఆంధ్రప్రదేశ్‌, మధ్యప్రదేశ్‌, పంజాబ్‌, తమిళనాడులోని పలు దవాఖానలు అ స్కీమ్‌ పేరిట రూ. 57.53 కోట్లు అదనం గా వసూలు చేశాయి.

ఇదీ ఆయుష్మాన్‌ స్వరూపం

• ప్రారంభం: సెప్టెంబర్‌ 23, 2018
• కవరేజీ: ఏడాదికి రూ.5 లక్షలు (కుటుంబానికి)
• మొత్తం కార్డులు: 41,07,92,296
• స్కీమ్‌లోని దవాఖానలు: 31,987 (ప్రైవేటు 14,534, ప్రభుత్వ 17,453)
• దవాఖానల్లో మొత్తం అడ్మిషన్లు: 9,56,73,955
• బకాయిలు: రూ. 1.21 లక్షల కోట్లు (ప్రైవేటుకు)అక్రమాలకు అడ్డా..
• అప్పటికే చనిపోయిన వారికి చికిత్స చేసిన కేసులు: 88,760
• డిశ్చార్జీ అయ్యాక సర్జరీ చేసినట్టు సృష్టించిన కేసులు: 2,25,827
• కేవలం మూడు ఫోన్‌ నంబర్లతో రిజిస్టర్‌ అయిన కేసులు: 18,31,032

ఆధారం: కాగ్‌ నివేదిక-2023 ఒక్క ఫోన్‌ నంబర్‌తో ఎన్ని రిజిస్ట్రేషన్లంటే మొబైల్‌ నంబర్‌ రిజిస్ట్రేషన్ల సంఖ్య

• 9999999999 9,85,166
• 8888888888 7,49,820
• 9000000000 96,046
• ఆధారం: కాగ్‌ నివేదిక-2023