ఫిబ్రవరి 5న సమతామూర్తి ఆవిష్కరణ

• 13న బంగారుమూర్తి ప్రతిష్ఠాపన
• రామానుజాచార్య సహస్రాబ్ది వేడుకల షెడ్యూల్‌ విడుదల
• 2 నుంచి 14 వరకు నిర్వహణ

హైదరాబాద్‌, జనవరి 13 : రంగారెడ్డి జిల్లా శంషాబాద్‌ మండలం ముచ్చింతల్‌లోని త్రిదండి చినజీయర్‌ స్వామి ఆశ్రమంలో రూ.1,000 కోట్లతో నిర్మించిన 216 అడుగుల సమతామూర్తి విగ్రహాన్ని (భగవద్రామానుజ పంచలోహ విగ్రహం) ఫిబ్రవరి 5న ఆవిష్కరించనున్నారు. అదే నెల 13న రామానుజాచార్య బంగారుమూర్తి విగ్రహాన్ని కూడా ప్రతిష్ఠించనున్నారు. ఆయా కార్యక్రమాలకు ప్రధాని నరేంద్రమోదీ, రాష్ట్రపతి రామ్‌నాథ్‌కోవింద్‌ హాజరుకానున్నట్టు సమాచారం. ఫిబ్రవరి 2 నుంచి 14 వరకు నిర్వహించనున్న భగవద్రామానుజ సహస్రాబ్ది వేడుకల షెడ్యూల్‌ను నిర్వాహకులు విడుదల చేశారు. ఈ వేడుకలకు రాష్ట్రపతి, ప్రధానితోపాటు ముఖ్యమంత్రి కేసీఆర్‌, ఉప రాష్ట్రపతి వెంకయ్యనాయుడు, సుప్రీంకోర్టు ప్రధాన న్యాయమూర్తి జస్టిస్‌ ఎన్వీ రమణ, వివిధ రాష్ర్టాల గవర్నర్లు, ముఖ్యమంత్రులు, మంత్రులు, వివిధ హైకోర్టుల న్యాయమూర్తులు, ఇతర ప్రముఖులు హాజరుకానున్నారు. ఈ మహాకార్యాన్ని ఐదు వేల మంది రుత్వికులతో నిర్వహించనున్నారు. మొత్తం 1,035 హోమగుండాలను ఏర్పాటు చేయనున్నారు. హోమంలో రెండు లక్షల కేజీల ఆవు నెయ్యిని వినియోగించనున్నారు.

సమతామూర్తి స్ఫూర్తి కేంద్రం విశిష్ఠతలు

• స్ఫూర్తి కేంద్రం విస్తీర్ణం: 200 ఎకరాలు
• ప్రాజెక్టు వ్యయం: రూ.1,000 కోట్లు
• సమతామూర్తి విగ్రహం ఎత్తు: 216 అడుగులు
• రామానుజ విగ్రహం ఎత్తు: 108 అడుగులు
• వినియోగించిన పంచలోహాల పరిమాణం: 1,800 టన్నులు
• రామానుజ విగ్రహానికి వినియోగించిన బంగారం: 120 కేజీలు
• భద్రవేది ఎత్తు : 54 అడుగులు
• పద్మపీఠం ఎత్తు : 27 అడుగులు
• త్రిదండం ఎత్తు : 135 అడుగులు
• భద్రవేదిలో ఏర్పాటుచేసిన పద్మాల సంఖ్య: 54
• పద్మం కింద ఏర్పాటుచేసిన ఏనుగుల సంఖ్య: 36
• శంఖుచక్రాల సంఖ్య 18+18= 36
• రామానుజాచార్యుల జీవిత విశేషాలను తెలిపే గ్యాలరీ
• వేదాల సారాన్ని అందించే లైబ్రరీ
• పండితసభల కోసం ఆడిటోరియం
• వివిధ ప్రదర్శనల కోసం ఓమ్నీ మాక్స్‌ థియేటర్‌
• రామానుజాచార్యులకు అభిషేకం నిర్వహించేలా మ్యూజికల్‌ ఫౌంటెన్‌ ఏర్పాటు

• ప్రధాన కార్యక్రమాల వివరాలు
• ఫిబ్రవరి 3: అగ్ని ప్రతిష్ఠ, అష్టాక్షరి జపం
• ఫిబ్రవరి 5 (వసంత పంచమి) : సమతామూర్తి విగ్రహం ఆవిష్కరణ. ముఖ్య అతిథిగా ప్రధానమంత్రి రాక
• ఫిబ్రవరి 8 (రథసప్తమి): ఆదిత్యహృదయం పారాయణం
• ఫిబ్రవరి 11: సామూహిక ఉపనయనం
• ఫిబ్రవరి 12 (భీష్మ ఏకాదశి): విష్ణు సహస్రనామ పారాయణం
• ఫిబ్రవరి 13: రామానుజాచార్య బంగారుమూర్తి విగ్రహం ఆవిష్కరణ. ముఖ్య అతిథిగా రాష్ట్రపతి రాక
• ఫిబ్రవరి 14: మహాపూర్ణాహుతి