RTI | లోపించిన పారదర్శకత.. సర్కారు వద్ద సమాచారం లేదట!

రాష్ట్ర ప్రభుత్వంలో పారదర్శకత లోపించింది. ప్రభుత్వాన్ని ఆర్టీఐ ద్వారా ఏ సమాచారం అడిగినా ‘లేదు’ అనే సమాధానం వస్తున్నది. ప్రజా సంక్షేమ కార్యక్రమాలు, వాటికి కేటాయించిన నిధులపై కూడా సమాచారాన్ని దాచిపెడుతున్నది.

• ఏది అడిగినా అదే సమాధానం
• ఆర్టీఐ దరఖాస్తునూ పట్టించుకోరు

RTI | హైదరాబాద్‌, ఆగస్టు 23 (నమస్తే తెలంగాణ): రాష్ట్ర ప్రభుత్వంలో పారదర్శకత లోపించింది. ప్రభుత్వాన్ని ఆర్టీఐ ద్వారా ఏ సమాచారం అడిగినా ‘లేదు’ అనే సమాధానం వస్తున్నది. ప్రజా సంక్షేమ కార్యక్రమాలు, వాటికి కేటాయించిన నిధులపై కూడా సమాచారాన్ని దాచిపెడుతున్నది. రాష్ట్రంలో కాంగ్రెస్‌ ప్రభుత్వం ఏర్పాటైన తరువాత పథకాల ప్రచారానికి, ప్రభుత్వ ప్రచారానికి ఎన్ని నిధులు కేటాయించారు? ఎంత ఖర్చు చేశారు? అంటే సమాధానం లేదు. పాలనాపగ్గాలు చేపట్టిన నాటి నుంచి ముఖ్యమంత్రి రేవంత్‌రెడ్డి ఇప్పటివరకు హస్తినకు 20 సార్లు వెళ్లారు.

ఒక్కసారి సీఎం బృందం ఢిల్లీ పర్యటనకు ఎంతవుతున్నది? ఇప్పటివరకు ఎంతయింది? అంటే రాష్ట్ర ప్రభుత్వం నుంచి మౌనమే సమాధానం. ప్రభుత్వ కార్యాలయాలు, సంస్థల నుంచి సమాచారాన్ని అడిగి తీసుకొనే అధికారం సమాచార హకు చట్టం (ఆర్టీఐ) కల్పించింది. కానీ, ఆర్టీఐ కింద దరఖాస్తు చేసినా రేవంత్‌ సర్కారు సమాచారం దాటవేస్తున్నది. ఆర్టీఐ కింద సమాచారం కోరినా అధికారులు ఇవ్వడం లేదు. కొన్ని తప్పనిసరి సందర్భాల్లో ఇచ్చినా సమాచారం అరకొరగానే ఉంటున్నది. అధికారం చేపట్టిన ఎనిమిది నెలల్లో అనేక ఆర్టీఐ దరఖాస్తులు అధికారుల వద్ద పెండింగ్‌లో ఉన్నాయి.

ఆర్టీఐ నుంచి సమాధానం దొరకని ప్రశ్నలు

• ముఖ్యమంత్రి రేవంత్‌రెడ్డి బృందం ఢిల్లీ పర్యటనకు ఎన్నిసార్లు వెళ్లింది? ఏ పని మీద వెళ్లింది? వారి పర్యటనకు ఎంత ఖర్చయింది?
• 2023 డిసెంబర్‌ నుంచి 2024 జనవరి వరకు ఎంతమంది రాష్ట్ర మంత్రులు విదేశాలకు వెళ్లారు? ఏ పని నిమిత్తం వెళ్లారు? వారి విదేశీ పర్యటన ఖర్చు ఎంత?
• ముఖ్యమంత్రి రేవంత్‌రెడ్డితో ఎంతమంది ప్రభుత్వ అధికారులు, నాయకులు దావోస్‌ పర్యటనకు వెళ్లారు? ఎన్ని రోజులు, ఎన్ని ప్రాంతాల్లో పర్యటించారు. వారి పర్యటన ఖర్చు ఎంత?
• రాష్ట్రంలో ప్రజాపాలన దరఖాస్తుల కార్యక్రమానికి ప్రభుత్వం ఎంత ఖర్చు చేసింది? ప్రచారానికి ఎంత ఖర్చు చేసింది? దరఖాస్తు ఫారాలు ఎన్ని ప్రింట్‌ చేశారు? వాటి ఖర్చు ఎంత?
• 2023 డిసెంబర్‌ 7 నుంచి డిసెంబర్‌ 31 వరకు తెలంగాణ ప్రభుత్వ నీటి పారుదలశాఖలో ఎంతమంది కాంట్రాక్టర్లకు ఎన్ని కోట్ల పెండింగ్‌ బిల్లులు చెల్లించారు? వాటి వివరాలు వెల్లడించండి?
• రాష్ట్రంలో ప్రైవేట్‌ స్కూళ్ల అధిక ఫీజుల నియంత్రణపై తెలంగాణ ప్రభుత్వం ఎలాంటి చర్యలు తీసుకున్నది? రాష్ట్రంలో డీఈవోలు, ఎంఈవోలు ప్రైవేటు స్కూళ్ల ఫీజుల నియంత్రణకు ఇప్పటివరకు వాళ్ల పరిధిలో ఎన్ని పాఠశాలల్లో తనిఖీలు చేపట్టారు? వాటి వివరాలు ఏమిటి?
• రాష్ట్ర ప్రభుత్వం ప్రారంభించిన ప్రజాపాలన కార్యక్రమానికి ఇప్పటివరకు మొత్తం ఎన్ని ఫిర్యాదులు వచ్చాయి? అందులో ఎన్ని పరిషరించారు? ప్రజాపాలన మెయింట్‌నెన్స్‌ కోసం ఎంత ఖర్చు చేశారు? వాటి వివరాలు ఇవ్వండి?
• 2024 జూన్‌ 2న నిర్వహించిన రాష్ట్ర అవతరణ దినోత్సవాలకు తెలంగాణ ప్రభుత్వం జిల్లాలవారీగా ఎన్ని నిధులు విడుదల చేసింది? హైదరాబాద్‌ నగరంలో ఎంత ఖర్చు చేశారు? దీనికి సమాధానంగా హైదరాబాద్‌ మెట్రోపాలిటన్‌ డెవలప్‌మెంట్‌ అథారిటీ (హెచ్‌ఎండీఏ) రూ.3 కోట్లు విడుదల చేసినట్టు తెలిపింది. జిల్లాల సమాచారం తమ వద్ద అందుబాటులో లేదని పేర్కొన్నారు.

జవాబుదారీతనం కరువైంది

రాష్ట్ర ప్రభుత్వంలో జవాబుదారీతనం కనిపించడం లేదు. కాంగ్రెస్‌ ప్రభుత్వం అధికారంలోకి ఎనిమిది నెలలైనా సమాచార కమిషన్ల నియామకం లేదు. సమాచారం అడిగితే దాపరికం ఎందుకు చేస్తున్నారో అర్థం కావడం లేదు. ప్రజాస్వామ్య దేశంలో పౌరుల ప్రశ్నలకు ప్రభుత్వం సమాధానం ఇవ్వాలి. అప్పడే పాలనలో పారదర్శకత, జవాబుదారీతనం ఉన్నట్టు. రహస్యం, దాపరికం ఉంటే అది ప్రజాస్వామ్య మనుగడకే ప్రమాదం.

-రాజేంద్ర, ఫౌండర్‌ యూత్‌ ఫర్‌ యాంటీ కరప్షన్‌