సీఎం సభ అట్టర్ఫ్లాప్.. ఖాళీ కుర్చీలతోనే కాంగ్రెస్ బలప్రదర్శన
సీఎం రేవంత్రెడ్డి సిద్దిపేట పర్యటనపై కాంగ్రెస్ శ్రేణులు పెట్టుకొన్న ఆశలు ఆవిరయ్యాయి. భారీ జనసమీకరణతో ప్రతిష్ఠాత్మకంగా నిర్వహించాలనుకొన్న సభ అట్టర్ఫ్లాప్ అయింది.
- సీఎం రేవంత్రెడ్డి ప్రసంగిస్తుండగానే సభ నుంచి వెళ్లిపోయిన జనం
- 25నియోజకవర్గాల నుంచి బస్సులు అయినా నిండని సభా ప్రాంగణం
- జనసమీకరణకు రూ.500 నుంచి వెయ్యివరకు చెల్లించినట్టు ఆరోపణలు
- కాంగ్రెస్ వర్గపోరు..సభకు ముందే రేవంత్ కటౌట్లు, ఫ్లెక్సీల చించివేత
- మైనంపల్లి హనుమంతరావుకు వేదికపై చోటువిషయమై అవమానం
- కేసీఆర్, హరీశ్, కేటీఆర్పై విమర్శలకే ముఖ్యమంత్రి రేవంత్రెడ్డి పెద్దపీట
- సిద్దిపేటకు వరాలు, రద్దయిన 1,070 కోట్ల నిధులపై స్పష్టత కరువు
సిద్దిపేట, నవంబర్ 19 (నమస్తే తెలంగాణ ప్రతినిధి) : సీఎం రేవంత్రెడ్డి సిద్దిపేట పర్యటనపై కాంగ్రెస్ శ్రేణులు పెట్టుకొన్న ఆశలు ఆవిరయ్యాయి. భారీ జనసమీకరణతో ప్రతిష్ఠాత్మకంగా నిర్వహించాలనుకొన్న సభ అట్టర్ఫ్లాప్ అయింది. గురువారం సిద్దిపేట జిల్లా కేంద్రం లో ఏర్పాటుచేసిన కాంగ్రెస్ పార్టీ బహిరంగ సభలో రేవంత్రెడ్డి మాట్లాడుతుండగానే జనం వెళ్లిపోయారు సభకు జనాన్ని తరలించేందుకు దాదాపు 25 నియోజకవర్గాల నుంచి బస్సులు ఏర్పాటు చేసినా ఆశించిన స్థాయిలో స్పం దన కనిపించలేదు. సభాప్రాంగణం నిండుగా కనిపించేలా బయట నుంచి వచ్చిన జనంతో హడావుడి చేసినా, సీఎం వేదికపైకి చేరుకొనే సమయానికి వెనుక వైపు కుర్చీలు ఖాళీగా దర్శనమిచ్చాయి.
రేవంత్ ప్రసంగం ప్రారంభమైన తర్వాత సభ నుంచి జనం వెళ్లిపోవడం తో చివరకు ప్రాంగణంలో భారీగా ఖాళీ కుర్చీ లే మిగిలాయి. మొత్తంగా అధికార యంత్రాం గం, కాంగ్రెస్ నేతలు భారీ ఏర్పాట్లు చేసినప్పటికీ సభలో చివరి వరకు జనాన్ని నిలబెట్టుకోలేకపోయారు. బస్సులు, డబ్బుల టోకెన్లు, జనసమీకరణ, భారీ ప్రచారం ఒకవైపు ఉం టే.. మరోవైపు ఖాళీ కుర్చీలు, మధ్యలోనే సభ నుంచి వెళ్లిపోయిన మహిళలు, ఫ్లెక్సీల చింపివేత, నేతల మధ్య ఆధిపత్య పోరు వంటి పరిణామాలు సభలో చోటుచేసుకొన్నాయి. రూ. కోట్లు ఖర్చుచేసి ఏర్పాటు చేసిన ఈ సభతో సిద్దిపేట ప్రజలకు ఎలాంటి ప్రయోజనం కలుగలేదు. కనీసం అభివృద్ధి నిధులను కూడా మంజూరు చేయలేదు. బీఆర్ఎస్ ప్రభుత్వ హయాంలో మంజూరై వివిధ దశల్లో ఆగిన పనులకు నిధులను రద్దుచేసిన సీఎం.. వాటిని ఇప్పుడైనా విడుదల చేస్తారని ఆశించిన ప్రజలకు నిరాశే మిగిలింది.
సీఎం సిద్దిపేట సభలో ఇదీ పరిస్థితి
ప్రతిపక్ష నేతలను తిట్టేందుకు ప్రభుత్వ ఖర్చుతో సభలు పెడుతున్న సీఎం రేవంత్రెడ్డికి సిద్దిపేట గట్టి జవాబిచ్చింది. ముఖ్యమంత్రి అరుపులే తప్ప ప్రజలనుంచి స్పందన కనిపించలేదు. స్థానికులెవరూ సభపై ఆసక్తి చూపకపోవడంతో ఇతర నియోజకవర్గాలనుంచి ప్రజల్ని తరలించేందుకు కాంగ్రెస్ నాయకులు ప్రయాస పడ్డారు. ఒక్కొక్కరికి రూ.500 నుంచి వెయ్యి రూపాయలు ఇచ్చి తరలించినట్టు ఆరోపణలున్నాయి. వచ్చిన కొద్దిమంది కూడా తిట్ల కార్యక్రమం మొదలవగానే సభా ప్రాంగణం నుంచి బయటకు వెళ్లిపోయారు. పోలీసు బందోబస్తు కూడా వారిని నిలువరించలేకపోయింది.
ఏర్పాట్లు ఘనం.. కరువైన స్పందన
సిద్దిపేట సభను విజయవంతం చేయాలనే లక్ష్యంతో అధికార కాంగ్రెస్ భారీగా ఏర్పాట్లు చేసింది. దాదాపు 25 నియోజకవర్గాల నుంచి బస్సులను ఏర్పాటుచేసి ప్రజలను తరలించేందుకు ప్లాన్ చేశారు. వాటిలో చాలా బస్సులు జనాలు లేకుండానే ఖాళీగా రావడం, వచ్చిన బస్సుల్లోనూ మహిళా సంఘాల సభ్యులే కనిపించడం గమనార్హం. మహిళా సంఘాలకు టార్గెట్లు పెట్టి, ఒకొకరికీ రూ.500 నుంచి రూ.వెయ్యి వరకు ఇస్తామని చెప్పి మహిళలను తరలించారని ప్రచారం. బ్యాంకు రుణా లు ఇస్తామని చెప్పి తీసుకొచ్చారని కొందరు మహిళలు చెప్పారు. పట్టణ ప్రాంతాల్లో సభకు వచ్చే వారికి టోకెన్లు ఇచ్చి, సభ ముగిసిన తర్వాత డబ్బులు తీసుకోవాలని చెప్పారని తెలిసింది. తమకు చెప్పినంతగా డబ్బులు ఇవ్వలేదని కొందరు మహిళలు అసహనం వ్యక్తంచేస్తూ సభ నుంచి వెనుదిరిగారు.
కేసీఆర్, కేటీఆర్, హరీశ్రావును ఉద్దేశించి సీఎం చేసిన విమర్శలపై కూడా మహిళలు తమ అసంతృప్తిని వ్యక్తంచేస్తూ బయటకు వెళ్లిపోయారు. తిట్టడం తప్ప ఇంకేం మాట్లాడరా? ఇందుకేనా సభ పెట్టింది.. అంటూ మహిళలు ఆగ్రహం వ్యక్తంచేశారు. సిద్దిపేట అభివృద్ధి, స్థానిక సమస్యలు, ప్రభుత్వ హామీల అమలు, సంక్షేమ పథకాలపై సీఎం మాట్లాడుతారని ఆశించిన ప్రజలకు నిరాశే మిగిలింది. రాజకీ య విమర్శలకే ఎకువ సమయం కేటాయించారని మహిళలు మండిపడ్డారు. బీఆర్ఎస్ పాలనే బాగున్నదని, ప్రస్తుత కాంగ్రెస్ ప్ర భుత్వం అధికారంలోకి వచ్చి మూడేండ్లు కావస్తున్నా తమ జీవితాల్లో ఆశించిన మార్పు కనిపించడం లేదని పలువురు మహిళలు వ్యా ఖ్యానించారు. కేసీఆర్ పాలనలో అందిన సంక్షేమ పథకాలు, ప్రస్తుతం ఎదురొంటున్న సమస్యలను పోల్చుతూ చెప్పారు.

కాంగ్రెస్ గ్రూపు తగాదాలు బట్టబయలు
సీఎం సభకు ముందు నుంచే కాంగ్రెస్లో ఉన్న అంతర్గత విభేదాలు బయటపడ్డాయి. సభా ప్రాంగణంతోపాటు పట్టణంలోని పలు ప్రాంతాల్లో ఏర్పాటు చేసిన సీఎం రేవంత్రెడ్డి కటౌట్లు, ఫ్లెక్సీల విషయంలో వివాదాలు తలెత్తాయి. కొన్నిచోట్ల ఫ్లెక్సీలను రాత్రికి రాత్రే చించివేసిన ఘటనలు కలకలం రేపాయి. వేదికపైకి వెళ్లేందుకు వచ్చిన మాజీ ఎమ్మెల్యే మైనంపల్లి హనుమంతరావుకు తొలుత అవమానం జరిగింది. వేదికపైకి అనుమతి లభించకపోవడంతో ఆయన కొద్దిసేపు కిందే నిలబడాల్సి వచ్చింది. చివరకు ముఖ్య నాయకులు వచ్చి ఆయన్ను వేదికపైకి తీసుకెళ్లి కూర్చోబెట్టారు. సీఎం సభకు ముందు నిర్వహించిన ర్యాలీలో జరిగిన తోపులాటలో మైనంపల్లి కిందపడ్డారు. ఇంటి దగ్గర మగవాళ్లు బెల్ట్ షాప్ దాకా పోయి వచ్చే లోపల మీటింగ్ చూసి వస్తామని చెప్పి అకాచెల్లెళ్లు వచ్చారంటూ సీఎం చేసిన వ్యాఖ్యలపై మహిళల నుంచి తీవ్ర వ్యతిరేకత వ్యక్తమైంది.
ఎప్పటిలాగే వ్యక్తిగత విమర్శలే..
సీఎం రేవంత్రెడ్డి తన ప్రసంగంలో రాజకీయ ప్రత్యర్థులపై ఎప్పటిలాగే వ్యక్తిగత విమర్శలకు దిగారు. కేసీఆర్, కేటీఆర్, హరీశ్రావు ను ఉద్దేశించి తీవ్ర పదజాలాన్ని ఉపయోగించారు. సిద్దిపేట నియోజకవర్గంలో గతంలో రద్దు చేసిన రూ.1,070 కోట్ల అభివృద్ధి పనులపై సీఎం రేవంత్రెడ్డి నుంచి ప్రజలకు ఎలాం టి స్పష్టత రాలేదు. ఆ నిధులను ఎందుకు నిలిపివేశారు? వాటికి బదులుగా ప్రభుత్వం ఎన్ని నిధులు కేటాయించింది? ఏయే పనులను తిరిగి ప్రారంభించబోతున్నది? అనే ప్రశ్నలకు సమాధానం ఆశించిన ప్రజలకు సీఎం ప్రసంగంలో ఎక్కడా స్పష్టత లేదు.
జేజేలు కొట్టించుకున్న సీఎం రేవంత్రెడ్డి
సభా ప్రాంగణంలో జనసమీకరణను చూపించేందుకు కాంగ్రెస్ నాయకులు ప్రత్యేక ఏర్పాట్లు చేశారు. ముందువరుసల్లో కాంగ్రెస్ ఎమ్మెల్యేల నియోజకవర్గాల నుంచి వచ్చిన వారిని కూర్చోబెట్టగా, మరోవైపు పార్టీ కార్యకర్తలను ప్రత్యేకంగా ఏర్పాటుచేసి వారి చేత నినాదాలు చేయించారు. వేదికపై నాయకులు ప్రసంగిస్తున్న సమయంలో ముందువరుసల్లో కార్యకర్తలు జేజేలు పలుకుతూ హడావుడి చేసినప్పటికీ, వెనుక భాగంలో ఖాళీ కుర్చీలే కనిపించడం సభలోని వాస్తవ పరిస్థితిని బయటపెట్టింది.సభ విజయవంతమైందని చూపించేందుకు ముందు భాగంలో జనసందడి ఉండేలా ఏర్పాట్లు చేసినా, అది బెడిసికొట్టింది.
Read Today's Latest Telangana News in Telugu and Telugu News
RELATED ARTICLES
తాజా వార్తలు
ట్రెండింగ్ వార్తలు
Vande Bharat Train | బంధువులను సాగనంపేందుకు వందే భారత్ రైలు ఎక్కిన 12 మంది.. తర్వాత ఏం జరిగిందంటే?
Watch: హాస్పిటల్ యజమానిని బెదిరించి రూ.10 లక్షలు వసూలు.. కాంగ్రెస్ నేత అరెస్ట్, పార్టీ నుంచి బహిష్కరణ
Watch: ‘బ్యాగ్లో గంజాయి పెడతా.. డ్రగ్స్ కేసులో ఇరికిస్తా’.. జంటను బెదిరించిన పోలీస్ అధికారి
Migratory birds | చిలికా సరస్సుకు ప్రత్యేక అతిథులు.. ఏకంగా 80 జాతుల వలసపక్షుల సందడి.. Video
China flies electric plane | 19 సీట్ల ఎలక్ట్రిక్ విమానం.. విజయవంతంగా నడిపి పరీక్షించిన చైనా

