Local Body Elections | రిజర్వేషన్లు ఆగమాగం

స్థానిక సంస్థల ఎన్నికల్లో రిజర్వేషన్ల కేటాయింపు రాష్ట్రవ్యాప్తంగా గందరగోళానికి దారితీస్తున్నది. ఒక్క బీసీ ఓటరు కూడా లేని తండాల్లో సర్పంచ్‌ స్థానం బీసీకి కేటాయించారు.

• ఎస్టీలే లేని గ్రామాల్లో ఎస్టీలకు రిజర్వేషన్ల
• ఒక్క బీసీ కూడా లేనిచోట బీసీకి..
• అంతా బీసీలున్న చోట ఎస్సీ, ఎస్టీలకు
• రిజర్వేషన్ల కేటాయింపులో ఇష్టారాజ్యం
• రిజర్వ్‌డ్‌ అభ్యర్థులు లేక గతంలో కొన్ని గ్రామాల్లో జరగని ఎన్నికలు
• ఇప్పుడు కూడా అవే పరిస్థితులు
• రాష్ట్రవ్యాప్తంగా ఇదే విచిత్ర తీరు

హైదరాబాద్‌, సెప్టెంబర్‌ 30 (నమస్తే తెలంగాణ): స్థానిక సంస్థల ఎన్నికల్లో (Local Body Elections) రిజర్వేషన్ల కేటాయింపు రాష్ట్రవ్యాప్తంగా గందరగోళానికి దారితీస్తున్నది. ఒక్క బీసీ ఓటరు కూడా లేని తండాల్లో సర్పంచ్‌ స్థానం బీసీకి కేటాయించారు. అలాగే ఒక్క ఎస్టీ ఓటరు కూడా లేని గ్రామంలో సర్పంచ్‌ పదవిని ఎస్టీకి రిజర్వ్‌ (Reservations) చేశారు. ఒక గ్రామంలో 100% ఓటర్లు బీసీలు ఉండగా, సర్పంచ్‌ స్థానాన్ని ఎస్టీకి కేటాయించారు. దీంతో ఆయా గ్రామాల్లో రిజర్వ్‌ క్యాటగిరీకి చెందిన అభ్యర్థిని ఎక్కడినుంచి తీసుకొస్తారనే ప్రశ్న తలెత్తుతున్నది. ఎస్టీ, ఎస్సీ రిజర్వేషన్ల కోసం 2011 జనాభా లెక్కలను, బీసీ రిజర్వేషన్ల కోసం 2024 కులగణన సర్వే లెక్కలను పరిగణనలోకి తీసుకున్నారు. సర్పంచ్‌ ఎన్నికల కోసం 2018 నాటి రిజర్వేషన్లను ప్రామాణికంగా తీసుకొని రొటేషన్‌ పద్ధతిని అనుసరించడం వల్ల కొన్నిచోట్ల ఇలాంటి పరిస్థితులు తలెత్తాయని పంచాయతీరాజ్‌ శాఖ అధికారులు చెప్తున్నారు. గతంలో ఆయా గ్రామాల్లో ఉన్న ఎస్టీ, ఎస్సీ, బీసీ కుటుంబాలు వలస వెళ్లిపోవడం కూడా ఇందుకు కారణమై ఉంటుందని అంటున్నారు. పదేండ్ల క్రితం నాటి జనాభా లెక్కలను పరిగణనలోకి తీసుకోవడం, రొటేషన్‌ పద్ధతి అమలుచేయడం వల్ల ఇలాంటి గందరగోళ, ఆగమాగం పరిస్థితులు వచ్చాయ ని చెప్తున్నారు. ఒక్కో జిల్లాలో, ఒక్కో గ్రా మంలో ఒక్కో విచిత్ర పరిస్థితిని సృష్టించారని ఆయా గ్రామాల ప్రజలు పేర్కొంటున్నారు.

• కామారెడ్డి జిల్లా నస్రుల్లాబాద్‌ మండలం అంకోల్‌ గ్రామ సర్పంచ్‌ స్థానాన్ని ఎస్టీకి రిజర్వ్‌ చేశారు. కానీ, గ్రామంలో 784 ఓట్లు ఉండగా, ఒక్క ఎస్టీ ఓటరు కూడా లేరు. అలాంటప్పుడు ఎస్టీలకు ఎలా రిజర్వ్‌ చేస్తారని గ్రామస్తులు ప్రశ్నిస్తున్నారు.
• పెద్దకొడప్‌గల్‌ మండలం చావునితండా పంచాయతీని ఎస్సీలకు రిజర్వ్‌ చేశారు. కానీ ఇక్కడ ఎస్సీలు ఒక్కరూ లేరు.
• మాచారెడ్డి మండలం వడ్డెరగూడెం తండాలో అంతా వడ్డెర కులానికి చెందిన బీసీలే జీవనం సాగిస్తున్నారు. సర్పంచ్‌ పదవిని మాత్రం ఎస్టీకి రిజర్వ్‌ చేశారు.
• నాగర్‌కర్నూల్‌ జిల్లా అమ్రాబాద్‌ మండలం కుమ్మరోనిపల్లిలో గతంలో సర్పంచ్‌ సీటు ఎస్టీకి రిజర్వ్‌ అయింది. గ్రామంలో ఎస్టీలు ఎవరూ లేకపోవడంతో సర్పంచ్‌ ఎన్నికలు జరగలేదు. ప్రత్యేక అధికారుల పాలన నడిచింది. ఇప్పుడు కూడా ఎస్టీలు లేనిచోట ఎస్టీ రిజర్వు కావడంతో గ్రామస్తులు ఆందోళన వ్యక్తంచేస్తున్నారు.
• నల్లగొండ జిల్లా చింతపల్లి మండలం తకెళ్లపల్లిలో ఎస్టీ ఓట్లు రెండే ఉన్నాయి. కానీ, ఎంపీటీసీ స్థానాన్ని, మరో రెండు వార్డులను ఎస్టీకి రిజర్వ్‌ చేశారు. దీనిపై తీవ్ర అభ్యంతరం తెలుపుతూ కలెక్టర్‌కు గ్రామస్తులు ఫిర్యాదు చేశారు. -ఆదిలాబాద్‌ జిల్లా ఆదిలాబాద్‌ రూరల్‌ మండలం చిట్యాల బోరి గ్రామంలో జనాభా మొత్తం గిరిజనులు కాగా, బీసీ జనరల్‌కు రిజర్వ్‌ చేశారు.
• భీంపూర్‌ మండలం సావర్గం గ్రామంలో అందరూ బీసీలే. కానీ, సర్పంచ్‌ స్థానం ఎస్టీకి రిజర్వ్‌ చేశారు.
• నేరడిగొండ మండలం పీచర, ఆరేపల్లి గ్రామాల్లో జనాభా మొత్తం గిరిజనులే. కానీ, సర్పంచ్‌ పదవి బీసీ జనరల్‌గా మారింది.
• ఇచ్చోడ మండలం దేవుళ్లనాయక్‌ తండాలో మొత్తం గిరిజనులే కానీ, రిజర్వేషన్‌ మాత్రం బీసీ జనరల్‌గా మారింది.
• నిర్మల్‌ జిల్లా పెంబి మండలం వేణునగర్‌లో వందశాతం ఎస్టీ జనాభా ఉన్నారు. కానీ, సర్పంచ్‌ స్థానాన్ని బీసీ జనరల్‌గా రిజర్వ్‌ చేశారు. ఆరు వార్డుల్లో ఎస్సీ జనరల్‌కు 2, ఎస్టీ మహిళకు 1, జనరల్‌ మహిళకు 1, జనరల్‌ క్యాటగిరీలో 2 స్థానాల చొప్పున కేటాయించారు.
• మామడ మండలం లింగాపూర్‌, రాసిమెట్ల, సారంగాపూర్‌ మండలం ఇప్పచెల్మ, పెండల్‌ ధరి గ్రామాల్లోనూ దాదాపు ఇదే పరిస్థితి నెలకొన్నది.
• కుభీర్‌ మండలం ఫకీర్‌నాయక్‌ తండాల్లో వందశాతం ఎస్టీ జనాభా ఉన్నప్పటికీ సర్పంచ్‌, పలు వార్డుల స్థానాల
  రిజర్వేషన్లు ఇతర సామాజికవర్గాలకు కేటాయించారు.
• రాజన్న సిరిసిల్ల జిల్లా వీర్నపల్లి మండలం మద్దిమల్లతండాలో ఓటర్లు అందరూ ఎస్టీలే ఉండగా, సర్పంచ్‌ స్థానాన్ని మాత్రం బీసీ మహిళకు కేటాయించారు.
• మహబూబాబాద్‌ జిల్లా మహబూబాబాద్‌ మండలం బామండ్లపల్లి లక్ష్మీపురంలో బీసీ కుటుంబాలు ఐదు ఉన్నాయి. అకడ ఎస్టీ జనాభా ఎకువ. కానీ, సర్పంచ్‌ పదవిని బీసీ మహిళకు
  కేటాయించారు.
• చిన్నకిస్తాపురంలో 550 ఓట్లు ఉన్న ఎస్టీని కాదని, 30 ఓట్లు ఉన్న బీసీ మహిళకు సర్పంచ్‌ స్థానం కేటాయించారు.
• మరిపెడ మండలం అజ్మీరతండా, వెంకటయ్యతండా, ధరావత్‌తండా, నేతావత్‌తండాల సర్పంచ్‌ స్థానాలను బీసీలకు కేటాయించారు. ఈ గ్రామాల్లో 100% జనాభా ఎస్టీలే ఉన్నారు.
• కురవి మండలం లింగ్యాతండాను బీసీకి రిజర్వ్‌ చేశారు. ఇకడ బీసీ ఓట్లు రెండు మాత్రమే ఉన్నాయి.
• డోర్నకల్‌ మండలం చాంప్లాతండా, రాము తండాల్లో సర్పంచ్‌ స్థానం బీసీకి రిజర్వ్‌ చేశారు. ఇకడ కూడా బీసీలు కుటుంబాలు రెండు మాత్రమే ఉన్నాయి.
• వరంగల్‌ జిల్లా సంగెం మండలం ఆశాలపల్లి గ్రామ సర్పంచ్‌ స్థానం ఎస్సీ మహిళకు కేటాయించారు. దీంతో గ్రామంలో ఉన్న ఒకే ఒక్క ఎస్సీ మహిళ సర్పంచ్‌గా ఏకగ్రీవంగా కాకున్నారు.
• సంగెం మండలం వంజరుపల్లి గ్రామ పంచాయతీ పరిధిలో 373 మంది ఓటర్లుండగా.. అందులో ఒక ఎస్టీ ఓటరు కూడా లేరు. అయినప్పటికీ, సర్పంచ్‌ స్థానాన్ని ఎస్టీకే రిజర్వ్‌ చేశారు.
• జనగామ జిల్లా జఫర్‌గఢ్‌ మండలం రామారం నుంచి కొంగర మల్లమ్మ, వెంకటయ్య దంపతులు పడేండ్ల క్రితం బతుకుదెరువు కోసం పాలేరు పనికి ఆశాలపల్లికి వచ్చారు. గ్రామంలో మల్లమ్మ, వెంకటయ్య ఇద్దరే ఎస్సీ ఓటర్లుగా నమోదయ్యారు. మూడు నెలల క్రితం వెంకటయ్య మృతి చెందాడు. మల్లమ్మ ఒకరే ఉన్నారు. ఇప్పుడు ఆశాలపల్లి సర్పంచ్‌ పదవి ఎస్సీ మహిళకు రిజర్వ్‌ అయింది. దీంతో ఇక్కడ కూడా రిజర్వేషన్‌ మార్చాలని గ్రామస్తులు కోరుతున్నారు. ఒకసారి రిజర్వేషన్‌ ప్రకటించిన తర్వాత మార్చడానికి వీలు లేదని, మల్లమ్మ ఏకగ్రీవ సర్పంచ్‌ కావడం ఖాయమని గ్రామస్తులు చర్చించుకుంటున్నారు. 2011 జనాభా లెకల ప్రకారం ఆశాలపల్లి గ్రామ జనాభా 1,807 కాగా, 350 మంది ఎస్సీలు ఉన్నట్టు అధికారులు లెకలు తేల్చారు. కానీ, వాస్తవంగా ఆ గ్రామంలో ఎస్సీలు లేరు. అధికారులు ఆ లెకలను సరిచేయకపోవడంతోనే రిజర్వేషన్‌ ఎస్సీ మహిళకు వచ్చినట్టు స్థానికులు చెప్తున్నారు.
• మంచిర్యాల జిల్లా నేన్నేల మండలం మెట్‌పల్లి గ్రామపంచాయతీలో అత్యధికంగా ఎస్సీ జనాభా ఉండగా సర్పంచ్‌ సీటు బీసీలకు రిజర్వ్‌ చేశారు.
• వేమనపల్లి మండలం రాజారం గ్రామపంచాయతీని 2019లో ఎస్సీలకు
  రిజర్వ్‌ చేశారు. ఇకడ ఎస్సీ ఓటర్లు ఎవరూ లేకపోవడంతో ఎన్నిక జరగలేదు. ఈసారి కూడా అదే సామాజిక
  వర్గానికి రిజర్వ్‌ చేశారు.
• కల్లంపల్లి గ్రామపంచాయతీని 2019లో ఎస్టీలకు రిజర్వ్‌ చేయగా, ఇప్పుడు బీసీలకు రిజర్వ్‌ చేశారు. ఇకడ బీసీ ఓటర్లు లే రు. ఎస్సీ, ఎస్టీ జనాభా మాత్రమే ఉన్నది.
• ఖమ్మం జిల్లా తిరుమలాయపాలెం మండలం బచ్చోడుతండా గ్రామపంచాయతీని బీసీకి రిజర్వ్‌ చేశారు. కానీ, ఈ పంచాయతీలో బీసీ ఓటర్లు పది మందే ఉన్నారు. ఇస్లావత్‌తండా గ్రామపంచాయతీ కూడా బీసీలకు రిజర్వ్‌ అయ్యింది. ఇక్కడ మూడు కుటుంబాలు ఉండగా.. మొత్తం ఎనిమిది ఓట్లు ఉన్నాయి.
• పాతర్లపాడు ఎంపీటీసీ స్థానం ఎస్టీ జనరల్‌కు రిజర్వ్‌ అయ్యింది. ఇక్కడ 20 మంది ఎస్టీ ఓటర్లు మాత్రమే ఉన్నారు.
• నిజామాబాద్‌ జిల్లా నిజామాబాద్‌ రూరల్‌ మండలం మల్కాపూర్‌ తండాలో అత్యధికంగా గిరిజన జనాభా ఉన్నది. ఇక్కడ బీసీ సామాజిక వర్గానికి చెందిన ఒ కే కుటుంబం నివాసం ఉంటుంది. కానీ, ఈ స్థానాన్ని బీసీలకు రిజర్వ్‌ చేశారు.
• సిద్దిపేట జిల్లా కొమురవెల్లి మండలం లెనిన్‌నగర్‌లో ఓటర్లు అందరూ ఎస్సీలు కాగా, దీనిని జనరల్‌ స్థానంగా ప్రకటించారు.
• సిద్దిపేట జిల్లా చేర్యాల మండలం ముస్త్యాల గ్రామంలో 77 దళిత కుటుంబాలు, 500కు పైగా ఓటర్లు ఉన్నప్పటికీ సర్పంచ్‌ పదవిని ఎస్సీలకు రిజర్వ్‌ చేయలేదని దళితులు ఆందోళన వ్యక్తంచేస్తున్నారు.

ఏజెన్సీలో గిరిజనేతర రిజర్వేషన్‌ ఆపేయాలి:టీఏజీఎస్‌
ఐదో షెడ్యూల్‌ ప్రాంతంలో గిరిజనేతర రిజర్వేషన్‌ అమలుచేయొద్దని, ఆ ప్రాంతాల్లోని జడ్పీటీసీ, ఎంపీటీసీ స్థానాలు అన్నీ గిరిజనులకే రిజర్వేషన్‌ చేయాలని తెలంగాణ ఆదివాసీ గిరిజన సంఘం (టీఏజీఎస్‌) రాష్ట్ర కమిటీ ఒక ప్రకటనలో డిమాండ్‌ చేసింది. ఏజెన్సీ బయట ఉన్న ప్రాంతంలో మిగిలిన క్యాటగిరీలకు కేటాయించుకోవాలని కోరింది. ఐదో షెడ్యూల్‌ ప్రాంతంలో గిరిజనేతరులకు అవకాశం ఇచ్చే రొటేషన్‌ పద్ధతిని ఆపాలని సంఘం రాష్ట్ర అధ్యక్షుడు, మాజీ ఎంపీ డాక్టర్‌ మీడియం బాబురావు, రాష్ట్ర ప్రధాన కార్యదర్శి పూసమ్‌ సచిన్‌ డిమాండ్‌ చేశారు.