పీజీఈసెట్‌ ఎంట్రెన్స్‌లో రీజనింగ్‌, అర్థమెటిక్‌

ఎంఈ, ఎంటెక్‌, ఎం ఫార్మసీ వంటి కోర్సుల్లో ప్రవేశాలకు నిర్వహించే పోస్ట్‌ గ్రాడ్యుయేట్‌ ఇంజినీరింగ్‌ కామన్‌ ఎంట్రెన్స్‌ ఎగ్జామ్‌(పీజీఈసెట్‌) పరీక్ష విధానం సమూలంగా మారనున్నది.

• కమ్యూనికేటివ్‌ ఇంగ్లిష్‌ కూడా.. 19 సబ్జెక్టులకు మూడు పరీక్షలు
• ఉన్నత విద్యామండలికి జేఎన్టీయూహెచ్‌ ప్రతిపాదనలు

హైదరాబాద్‌, జూన్‌ 5 (నమస్తే తెలంగాణ) : ఎంఈ, ఎంటెక్‌, ఎం ఫార్మసీ వంటి కోర్సుల్లో ప్రవేశాలకు నిర్వహించే పోస్ట్‌ గ్రాడ్యుయేట్‌ ఇంజినీరింగ్‌ కామన్‌ ఎంట్రెన్స్‌ ఎగ్జామ్‌(పీజీఈసెట్‌) పరీక్ష విధానం సమూలంగా మారనున్నది. కొత్తగా అర్థమెటిక్‌ రీజనింగ్‌, క్వాంటిటేటివ్‌ ఆప్టిట్యూడ్‌, కమ్యూనికేటివ్‌ ఇంగ్లిష్‌ సబ్జెక్టులను ఈ పరీక్షలో అంతర్భాగం చేయనున్నారు. పీజీఈసెట్‌ పరీక్ష రాసే వారంతా ఈ రెండు సబ్జెక్టులకు పరీక్షలు రాయాల్సిందే. ఒక్కో సబ్జెక్టుకు 25% చొప్పున వెయిటేజీ ఇవ్వనున్నారు.

సంబంధిత సబ్జెక్టులకు 50% వెయిటేజీ ఉంటుంది. పీజీఈసెట్‌ పరీక్షల్లో కీలక సంస్కరణలను ప్రతిపాదిస్తూ జేఎన్టీయూహెచ్‌ ఉన్నత విద్యామండలికి ప్రతిపాదనలు పంపించింది. ఇవి త్వరలోనే సర్కార్‌కు చేరుతాయి. ఈ ప్రతిపాదనలను సర్కార్‌ ఆమోదిస్తే 2027-28 విద్యాసంవత్సరంలో కొత్త విధానం అమల్లోకి వస్తుంది.

• పీజీఈసెట్‌లో మొత్తం 19 సబ్జెక్టులున్నాయి. ఈ సబ్జెక్టులను ఒకే గొడుగు కిందికి తీసుకొస్తారు. మూడు లేదా నాలుగు సబ్జెక్టులుగా విభజిస్తారు.
• సీఎస్‌ఈ, ఎలక్ట్రికల్‌, ఎలక్ట్రానిక్స్‌ ఇన్‌స్ట్రుమెంటేషన్‌ ఇంజినీరింగ్‌ సబ్జెక్టులను సర్క్యూట్‌ సబ్జెక్టులుగా పరిగణిస్తారు. వీటిల్లోని కామన్‌ సబ్జెక్టులకు పరీక్షలుంటాయి.
• మెకానికల్‌, సివిల్‌, కెమికల్‌, మెటలర్జీ వంటి సబ్జెక్టులను నాన్‌ సర్క్యూట్‌ బ్రాంచిలుగా పరిగణిస్తారు. వీటిల్లోని కామన్‌ సబ్జెక్టులకు ఒకే కామన్‌ ఎగ్జామ్‌ ఉంటుంది.
• ఎన్విరాన్‌మెంటల్‌ సైన్స్‌, బయోమెడికల్‌ సైన్స్‌ సహా సైన్స్‌ సబ్జెక్టులన్నింటికి ఒకే ఎగ్జామ్‌ ఉంటుంది. ఫార్మసీ విభాగానికి ప్రత్యేక పరీక్ష ఉంటుంది. పేపర్లను కుదించడం ద్వారా పీజీఈసెట్‌ పరీక్షలను రెండు రోజుల్లోనే పూర్తిచేయవచ్చని అధికారులు భావిస్తున్నారు.

పీజీఈసెట్‌లో మహిళల హవా

హైదరాబాద్‌, జూన్‌ 5 (నమస్తే తెలంగాణ) : ఎంఈ, ఎంటెక్‌, ఎం ఫార్మసీ కోర్సుల్లో ప్రవేశాలకు నిర్వహించిన టీజీ పీజీఈసెట్‌ ఫలితాలు విడుదలయ్యాయి. శుక్రవారం కూకట్‌పల్లిలోని జేఎన్టీయూహెచ్‌లో ఉన్నత విద్యామండలి చైర్మన్‌ ప్రొఫెసర్‌ వీ బాలకిష్టారెడ్డి, జేఎన్టీయూ వీసీ ప్రొఫెసర్‌ టీకేకే రెడ్డి ఫలితాలు విడుదల చేశారు. ఈ ఫలితాల్లో మహిళలు 13,468(94.31%) క్వాలిఫై అయ్యి సత్తాచాటారు. పురుషులు 10,169(91.02%) క్వాలిఫై అయ్యారు. ఈసారి ప్రాథమిక ‘కీ’ పై నాలుగు అభ్యంతరాలు రాగా, ఒక అభ్యంతరాన్ని పరిగణనలోకి తీసుకుని, ర్యాంకులు ఖరారుచేశారు. ఈ కార్యక్రమంలో మండలి వైస్‌ చైర్మన్లు ఎస్కే మహమూద్‌, ఇటికాల పురుషోత్తం, కార్యదర్శి శ్రీరాం వెంకటేశ్‌, జేఎన్టీయూ రెక్టార్‌ విజయ్‌కుమార్‌రెడ్డి, రిజిస్ట్రార్‌, పీజీఈసెట్‌ కన్వీనర్‌ కే వెంకటేశ్వర్‌రావు తదితరులు పాల్గొన్నారు.