Telangana | ఇంటర్‌లో ఇష్టారీతిన ఆన్‌డ్యూటీలు.. కరీంనగర్‌లో పోస్ట్‌.. ములుగులో ఓడీ

ఎక్కడి ఖమ్మం.. ఎక్కడి కందుకూరు(రంగారెడ్డి జిల్లా) వీటి మధ్య దూరం దాదాపు 250 కిలోమీటర్లు. ఎక్కడి కరీంనగర్‌ ఎక్కడి వెంకటాపురం(ములుగు) వీటి మధ్య దూరం 200 కిలోమీటర్లు. పోస్టింగేమో ఖమ్మం, కరీంనగర్‌.. పని చేయాల్సిందేమో కందుకూరు, ములుగు వెంకటాపురంలో. ఇది ప్రభుత్వ జూనియర్‌ కాలేజీల్లో కొత్తగా నియమితులైన లెక్చరర్ల పరిస్థితి.

• రెండింటి మధ్య 200 కిలో మీటర్లు
• జీతాలు ఓ చోట.. క్లాస్‌లు మరోచోట
• కొత్త జేఎల్స్‌కు శాపంగా ఆన్‌డ్యూటీ
• ఆందోళనలో జూనియర్‌ అధ్యాపకులు

Telangana | హైదరాబాద్‌, మే 29 (నమస్తే తెలంగాణ) : ఎక్కడి ఖమ్మం.. ఎక్కడి కందుకూరు(రంగారెడ్డి జిల్లా) వీటి మధ్య దూరం దాదాపు 250 కిలోమీటర్లు. ఎక్కడి కరీంనగర్‌ ఎక్కడి వెంకటాపురం(ములుగు) వీటి మధ్య దూరం 200 కిలోమీటర్లు. పోస్టింగేమో ఖమ్మం, కరీంనగర్‌.. పని చేయాల్సిందేమో కందుకూరు, ములుగు వెంకటాపురంలో. ఇది ప్రభుత్వ జూనియర్‌ కాలేజీల్లో కొత్తగా నియమితులైన లెక్చరర్ల పరిస్థితి. ఇంటర్‌ విద్యలో లెక్చరర్లను ఇష్టారీతిన ఆన్‌డ్యూటీ(ఓడీ)పై కేటాయించారు. దగ్గరా.. దూరం అని చూడకుండా కేటాయించారు. దీంతో వీరి అవస్థలు వర్ణణాతీతంగా మారాయి. ఇలాంటి వారు 300 మంది వరకు ఉంటారని బాధితులు వాపోతున్నారు.

పోస్టింగ్‌ ఓ చోట.. డిప్యూటేషన్‌ మరోచోట

రాష్ట్రంలో జేఎల్‌ నోటిఫికేషన్‌ 14 ఏండ్ల తర్వాత విడుదలైంది. కేసీఆర్‌ సర్కారు ఇంటర్‌ విద్య చరిత్రలో ఒకేసారి 1,392 పోస్టుల భర్తీ కోసం 2022 డిసెంబర్‌ 9న నోటిఫికేషన్‌ జారీచేసింది. 2023 సెప్టెంబర్‌ 12 నుంచి అక్టోబర్‌ 3 వరకు పరీక్షలు నిర్వహించారు. 2024 ఆగస్టు 5 నుంచి సెప్టెంబర్‌ 11 వరకు సర్టిఫికెట్‌ వెరిఫికేషన్‌ జరిపారు. 100 పోస్టులు బ్యాక్‌లాగ్‌ అయ్యాయి. 1,292 కొత్త అధ్యాపకులకు కౌన్సెలింగ్‌ నిర్వహించి మార్చి 12న అపాయింట్‌మెంట్‌ ఇచ్చారు. ఈ అపాయింట్‌మెంట్స్‌ ఇచ్చే సమయంలోనే కొందరు లెక్చరర్లను ఆన్‌డ్యూటీపై ఇతర కాలేజీలకు కేటాయించారు. దీంతో ఆన్‌డ్యూటీ కేటాయించిన వారి పరిస్థితి అగమ్యగోచరంగా తయారయ్యింది. జీతాలు తీసుకునేది ఓచోట.. క్లాసులు చెప్పేది మరోచోట అన్నట్టుగా మారింది. కొందరు మార్చి 13న కాలేజీల్లో ప్రిన్సిపాళ్లకు రిపోర్ట్‌చేయగానే.. సదరు అధ్యాపకులను ఆన్‌డ్యూటీ కేటాయించిన కాలేజీలకు పంపాలని ఆదేశించారు. మరికొందరినేమో జూన్‌ 2 నుంచి కాలేజీలు పునఃప్రారంభమమయ్యే సమయంలో రిపోర్ట్‌ చేయాలని సూచించారు. దీంతో బాధితులంతా గగ్గోలు పెడుతున్నారు.

ఉదాహరణలివిగో..

• ఓ జువాలజీ లెక్చరర్‌కు తొలుత ఆలియా కాలేజీ (హైదరాబాద్‌)లో పోస్టింగ్‌ ఇచ్చారు. ఏమయ్యిందో ఏమో అక్కడి నుంచి వికారాబాద్‌ జిల్లాలోని జూనియర్‌ కాలేజీకి పంపించారు. బొల్లారంలో పోస్టింగ్‌ ఇచ్చిన మరో లెక్చరర్‌ను నల్లగొండ జిల్లా కనగల్‌ కాలేజీలో ఇష్టారీతిన ఆన్‌డ్యూటీపై వేశారు.
• సిద్దిపేట జిల్లా మద్దూరు కాలేజీలో పనిచేస్తున్న చరిత్ర అధ్యాపకుడిని ఆదిలాబాద్‌ కాలేజీకి, కరీంనగర్‌ కాలేజీలో పనిచేస్తున్న మరో చరిత్ర అధ్యాపకుడిని ములుగు కాలేజీకి కేటాయించారు.
• సివిక్స్‌ లెక్చరర్‌ ఒకరికి తొలుత కరీంనగర్‌ జిల్లాలో పోస్టింగ్‌ ఇచ్చారు. ఆ తర్వాత మంచిర్యాల జిల్లా బెల్లంపల్లి, ఖమ్మం జిల్లాకు చెందిన మరో లెక్చరర్‌ను కందుకూరుకు బదిలీచేశారు.
• నిజామాబాద్‌ జిల్లాకు చెందిన మహిళ లెక్చరర్‌ను బూర్గంపాడు కాలేజీలో పనిచేయాలని సూచించారు.
• హనుమకొండలో పనిచేస్తున్న కెమిస్ట్రీ లెక్చరర్‌ను కందుకూరు, నిర్మల్‌లో పనిచేస్తున్న మరో కెమిస్ట్రీ లెక్చరర్‌ను తాండూరుకు వేశారు.
• జువాలజీ లెక్చరర్‌ ఒకరికి కరీంనగర్‌లో పోస్టింగ్‌ ఇవ్వగా భూపాలపల్లి కాలేజీకి, సిద్దిపేట నుంచి ఓ లెక్చరర్‌ను కామారెడ్డికి ఆన్‌డ్యూటీపై వేశారు.
• ఇంగ్లిష్‌ లెక్చరర్‌కు తొలుత జడ్చర్లలో పోస్టింగ్‌ ఇవ్వగా, తాజాగా వికారాబాద్‌ జిల్లా బోంరాస్‌పేటకు, నారాయణపేట కాలేజీలోని అధ్యాపకుడిని బషీరాబాద్‌కు పంపించారు.
• హనుకొండ కాలేజీలో పోస్టింగ్‌ ఇచ్చిన తెలుగు లెక్చరర్‌ను ఖమ్మం జిల్లా కూసుమంచికి, హనుమకొండ జిల్లాలోని మ రో తెలుగు లెక్చరర్‌ను వెంకటాపురం-ములుగుకు ఆన్‌డ్యూటీపై పంపించారు.
• సికింద్రాబాద్‌ ఎస్పీరోడ్‌లోని కాలేజీలో కామర్స్‌ లెక్చరర్‌గా పనిచేస్తున్న అధ్యాపకుడిని వికారాబాద్‌ జిల్లా హకీంపేటకు, సితాఫల్‌మండీలో పనిచేస్తున్న మరో కామర్స్‌ అధ్యాపకుడిని బోంరాస్‌పేటకు వేశారు.
• హైదరాబాద్‌ బోరబండ కాలేజీలో పోస్టింగ్‌ ఇచ్చిన హిందీ లెక్చరర్‌ను జోగులాంబ గద్వాల జిల్లా మల్దకల్‌ కాలేజీకి కేటాయించారు. మాగనూరు కాలేజీలోని హిందీ లెక్చరర్‌ను మహమ్మదాబాద్‌లో ఆన్‌డ్యూటీపై వేశారు.