పంట సాయానికి ధరణి మోక్షం

• పెండింగ్‌ మ్యుటేషన్ల యాజమాన్య హక్కుల బదిలీ
• గ్రీవెన్స్‌ మాడ్యూల్‌తో పార్ట్‌-బీ నుంచి పార్ట్‌-ఏలోకి
• కొత్తగా భూ హక్కు పొందినవారికి రైతుబంధు

హైదరాబాద్‌, జూన్‌ 11 (నమస్తే తెలంగాణ): వివిధ కారణాలతో పంటసాయం అందని భూములకు ధరణి మోక్షం కలిగించింది. ధరణి పోర్టల్‌లో గ్రీవెన్స్‌ మాడ్యూల్‌ ప్రవేశపెట్టి పెండింగ్‌ సమస్యలను పరిష్కరించడంతో ఆయా భూములను సాగుచేసుకుంటున్న రైతులు కూడా పంటసాయం పొందనున్నారు. రాష్ట్రంలో ఈనెల 15 నుంచి వానకాలం రైతుబంధు పంపిణీ చేయనున్నట్టు సీఎం కేసీఆర్‌ ఇటీవల ప్రకటించిన విషయం తెలిసిందే. ఈ ఏడాది జూన్‌ 10వ తేదీ వరకు కటాఫ్‌గా నిర్ణయించి రైతుబంధుకు అర్హులైన రైతుల జాబితా తయారుచేయాలని ఆదేశించారు. ఈ మేరకు జాబితా తయారీ తుదిదశకు చేరుకున్నది. గత యాసంగి జాబితాతో పోల్చితే ఈసారి సుమారు రెండు లక్షల మంది కొత్తగా రైతుబంధు సాయం అందుకొనే అవకాశాలున్నాయి.

• పెండింగ్‌ మ్యుటేషన్ల పరిష్కారానికి ధరణి పోర్టల్‌లో గతేడాది నవంబర్‌లో ఆప్షన్‌ ఇచ్చారు. ఇప్పటివరకు సుమారు 1.45 లక్షల దరఖాస్తులు వచ్చాయి. ఇందులో దాదాపు 1.40 లక్షల మ్యుటేషన్లను పూర్తిచేశారు. వీరంతా కొత్తగా రైతుబంధు అందుకోబోతున్నారు.
• పార్ట్‌-బీ నుంచి పార్ట్‌-ఏ లోకి వచ్చిన భూములకు సైతం రైతుబంధు ఇవ్వాలని ప్రభుత్వం నిర్ణయించింది. భూ సమస్యలపై వినతులు సమర్పించేందుకు ధరణిలో ఈ ఏడాది మార్చిలో ‘గ్రివెన్స్‌ మాడ్యూల్‌’ ప్రవేశపెట్టారు. దీనిని రైతులు సద్వినియోగం చేసుకున్నారు. పోర్టల్‌ ద్వారా ఇప్పటివరకు సుమారు 66,500 దరఖాస్తులు వచ్చాయి. ఇందులో 38 వేలకుపైగా సమస్యలను పరిష్కరించినట్టు అధికారవర్గాలు తెలిపాయి. పలువురు కోర్టు కేసుల్లో నెగ్గడంతో భూమిని నిషేధిత జాబితా నుంచి తొలిగించారు. వీరందరికీ ఈసారి రైతుబంధు అందనున్నది.
• ఆధార్‌ అనుసంధానం లేక గతేడాది పలువురు రైతులు సాయాన్ని అందుకోలేకపోయారు. ప్రభుత్వం ప్రత్యేక మాడ్యూల్‌ను ప్రవేశపెట్టడంతో సుమారు 6 వేల మంది దరఖాస్తు చేసుకున్నారు. ఇందులో 5,500 సమస్యలను అధికారులు పరిష్కరించారు. వీరుకూడా రైతుబంధు అర్హుల జాబితాలోకి రానున్నారు.
• ఈ ఏడాది జనవరి 1వ తేదీ నుంచి జూన్‌ 10వ తేదీ నాటికి ధరణి పోర్టల్‌ ద్వారా 3,16,431 రిజిస్ట్రేషన్లు జరిగాయి. ఇందులో అనేకమంది కొత్తగా భూములు కొనుగోలు చేసినవారు ఉన్నారు. వారందరికీ రైతుబంధు సాయం అందనున్నది. ఈ విధంగా గతేడాది యాసంగితో పోల్చితే ఈ వానకాలం సీజన్‌లో సుమారు 2 లక్షల మంది రైతులకు పంట పెట్టుబడి సాయం అందనున్నది.