Minister Ponguleti | మౌనమేల మంత్రిగారూ!?.. కొత్త టేపులు తెచ్చి కొలుచుకోండంటివి.. 500 మీటర్ల నిబంధనపై మాట్లాడకపోతివి!

‘కొత్త టేపులు తెచ్చి కొలుచుకోండి.. నాది, నా తమ్ముడి ఇంటి నిర్మాణం హిమాయత్‌సాగర్‌ ఎఫ్‌టీఎల్‌, బఫర్‌జోన్‌ పరిధిలో ఉంటే కూల్చుకోండి’ అంటూ ఓపెన్‌ సవాల్‌ చేసి.. ఇప్పుడు మౌనం వహించారు మంత్రి పొంగులేటి శ్రీనివాస్‌రెడ్డి.

• ఎవరినీ వదిలిపెట్టబోం’ అన్న హైడ్రా ఆ వైపు కన్నెత్తి చూడదేమంటూ ప్రశ్నలు
• బ్యాలెన్స్‌ చేసేందుకు ఇదే అవకాశమంటూ సీఎం రేవంత్‌రెడ్డికి జనం సూచనలు

Minister Ponguleti | హైదరాబాద్‌ సిటీబ్యూరో ప్రధాన ప్రతినిధి, ఆగస్టు 26 (నమస్తే తెలంగాణ): ‘కొత్త టేపులు తెచ్చి కొలుచుకోండి.. నాది, నా తమ్ముడి ఇంటి నిర్మాణం హిమాయత్‌సాగర్‌ ఎఫ్‌టీఎల్‌, బఫర్‌జోన్‌ పరిధిలో ఉంటే కూల్చుకోండి’ అంటూ ఓపెన్‌ సవాల్‌ చేసి.. ఇప్పుడు మౌనం వహించారు మంత్రి పొంగులేటి శ్రీనివాస్‌రెడ్డి. 500 మీటర్ల నిబంధనపై ‘నమస్తే తెలంగాణ’ ప్రశ్నించినా చడీచప్పుడు లేదు. ప్రస్తుతం ఉన్న గూగుల్‌ మ్యాప్‌లో చూస్తే నీటి నిల్వకు ఆయన ఇంటి నిర్మాణాలు చాలా దూరంగా ఉన్నాయి కదా అన్నట్టు కనిపిస్తుంది. పైగా 100 ఫీట్ల బఫర్‌జోన్‌ నిబంధన మాత్రమే ఉందనే అంచనాతో ఆయన ఆ వ్యాఖ్యలు చేసి ఉండొచ్చు. కానీ 2007లోనే పురపాలక శాఖ ఇచ్చిన అర కిలోమీటరు నిబంధన మెమోను ‘నమస్తే తెలంగాణ’ వెలుగులోకి తెచ్చింది. 2012లో పురపాలక శాఖ భవన నిర్మాణ అనుమతులకు సంబంధించిన 168 జీవోను సైతం తెరపైకి తీసుకొచ్చింది. తాజాగా కొన్నేండ్ల కిందట మ్యాప్‌లను బేరీజు వేసి అసలు గుట్టురట్టు చేసింది. దీంతో మంత్రి పొంగులేటి సోదరుల నిర్మాణాలపై ప్రజల నుంచి ప్రశ్నలు వెల్లువెత్తుతున్నాయి. మరి వీటిపై సమాధానాలేవి?

• బఫర్‌జోన్‌ వరకు మాత్రమే నిర్మాణాలు నిషిద్ధం అని చర్చ జరుగుతున్న సందర్భంలో పొంగులేటి కొత్త టేపులు తెచ్చి కొలుచుకోండి.. కూల్చుకోండి అంటూ ఆఫర్‌ ఇచ్చారు. అంతకుమించి నిబంధనలు ఉన్నాయని వెలుగులోకి వచ్చిన తర్వాత ఎందుకు స్పందించటం లేదు?
• చెరువులకు బఫర్‌జోన్‌ వరకు నిబంధన ఉంటుంది. కానీ జంట జలాశయాల అం శం వేరు. దీనిపై సుప్రీంకోర్టు దాకా దశాబ్దాలపాటు విస్తృత చర్చ జరిగింది. అనేక నిపుణుల కమిటీలు అధ్యయనం చేశా యి. అనేక జీవోలు, మె మోలు జారీ అయ్యాయి. కేవలం బఫర్‌ జోన్‌ను మా త్రమే పరిగణనలోకి తీసుకుంటే ఎట్ల? జంట జలాశయాలకు సంబంధించి గతంలో కాంగ్రెస్‌ ప్రభుత్వమే జారీ చేసిన ఉత్తర్వులను ఎందుకు విస్మరిస్తున్నారు?
• హైడ్రా తన పరిధి దాటి కూడా గండిపేట జలాశయం ఎఫ్‌టీఎల్‌లో నిర్మాణాలు కొన్నింటిని కూల్చివేసింది. మరి మిగతా వాటిని ఎందుకు వదిలిపెట్టినట్టు? నిబంధనల ప్రకారం తన నిర్మాణాలు లేనట్టయితే కూల్చుకోండి అని మంత్రి పొంగులేటి ఆఫర్‌ ఇచ్చినా హైడ్రా రంగంలోకి దిగేందుకు ఏ శక్తి అడ్డుకుంటున్నది?
• జలమండలి అధికారికంగా ఎఫ్‌టీఎల్‌, బఫర్‌జోన్‌, నిషిద్ధ జోన్లను ఎందుకు నిర్ధారించడం లేదు? నిజంగా మంత్రి పొంగులేటి నిర్మాణాలు ఆ పరిధిలోకి రానట్టయితే సర్వే చేసి నిర్ధారించి, బహిరంగ ప్రకటన చేయొచ్చు కదా?
• గీతానుసారమే హైడ్రా కూల్చివేతలని సెలవిచ్చిన సీఎం రేవంత్‌రెడ్డి, తన మిత్రులకూ జంట జలాశయాల పరిధిల్లో ఫాంహౌస్‌లు ఉన్నాయని ప్రకటించారు. ఆ నిర్మాణాల నుంచి వచ్చే మురుగునీరు అందులో కలిస్తే.. ఆ నీటిని నగరవాసులకు తాగునీటిగా వినియోగించడం ఎంత వరకు భావ్యం? అని అభిప్రాయపడ్డారు. మరి పొంగులేటి నిర్మాణాలపై నిజాలను నిగ్గు తేల్చండని హైడ్రాను ఎందుకు ఆదేశించడం లేదు?
• సామాన్యుడికి ఓ న్యాయం? పెద్దోళ్లకు మరో న్యాయమా? అనే సూటి ప్రశ్నలు తెలంగాణ సమాజం నుంచి వస్తున్న నేపథ్యంలో రేవంత్‌ సర్కారు జంట జలాశయాల పరిధిల్లోని నిర్మాణాలపై సర్వే చేసి, శ్వేతపత్రం విడుదల చేస్తే రాష్ట్ర ప్రభుత్వ చిత్తశుద్ధి ప్రజలకు తెలుస్తుంది కదా?

‘500 మీటర్లు’ ప్రశ్నపై నోరు మెదపరేం?
కాంగ్రెస్‌ ప్రభుత్వం (2007లో) అధికారంలో ఉండగానే పురపాలక శాఖ ఇచ్చిన 500 మీటర్ల నిబంధన మెమోను ఈ నెల 25న ‘నమస్తే తెలంగాణ’ వెలుగులోకి తెస్తే.. ఇప్పటిదాకా మంత్రి పొంగులేటి శ్రీనివాస్‌రెడ్డి నోరు మెదపలేదు. 2012లో పురపాలకశాఖ భవన నిర్మాణ అనుమతుల 168 జీవోనూ ‘నమస్తే తెలంగాణ’ తెరపైకి తెచ్చింది. దీనిపైనా సీఎం సహా మంత్రులెవరూ కిమ్మనలేదు. మరి 500 మీటర్లలోపు నిర్మాణాలు సక్రమమా? అక్రమమా? ఆ ఇండ్లు బఫర్‌ జోన్‌లో ఉన్నట్టా? లేనట్టా? ఎఫ్‌టీఎల్‌ పరిధిలో ఉన్నట్టా? లేనట్టా? నిర్మాణాలు సక్రమమైతే సర్వే చేసి నిర్ధారించి, బహిరంగ ప్రకటన చేయొచ్చుగా? అక్రమమైతే హైడ్రా రంగంలోకి దిగదెందుకు?