EHS Scheme | ఈహెచ్‌ఎస్‌ కన్నా..ప్రైవేట్‌ పాలసీయే మిన్న!..ఈహెచ్‌ఎస్‌ పథకంపై ఉద్యోగుల్లో అనుమానాలు

ఉద్యోగుల హెల్త్‌ స్కీమ్‌ కన్నా ప్రైవేట్‌ హెల్త్‌ పాలసీలే మిన్న! ఈ పథకం కోసం 1.5 శాతం వాటా మేం ఎందుకివ్వాలి? మా వాటా ఉన్నప్పుడు ఉచితమెట్లవుతుంది? ట్రస్టు ఏర్పాటు చేయడం, డబ్బులు జమచేయడం.

• మా వాటా ఉన్నప్పుడు.. ఉచితంఎట్లవుతుంది?
• మా బెనిఫిట్స్‌ ఇవ్వనోళ్లు..హెల్త్‌స్కీమ్‌ పైసలిస్తరా?
• ఈహెచ్‌ఎస్‌ పథకంపై ఉద్యోగుల్లో అనుమానాలు
• 1.5 శాతం వాటా ఎందుకు ఇవ్వాలంటూ ప్రశ్నలు
• ఉద్యోగ సంఘాల నేతలపైనా పోస్టులు హల్‌చల్‌
• డీఏలు, పీఆర్సీలు ఇప్పిస్తే పాలసీ మేమే చెల్లిస్తం!
• ఉద్యోగులు, ఉపాధ్యాయవర్గాలు, పెన్షనర్ల గగ్గోలు

హైదరాబాద్‌, ఫిబ్రవరి 14 (నమస్తే తెలంగాణ): ఉద్యోగుల హెల్త్‌ స్కీమ్‌ కన్నా ప్రైవేట్‌ హెల్త్‌ పాలసీలే మిన్న! ఈ పథకం కోసం 1.5 శాతం వాటా మేం ఎందుకివ్వాలి? మా వాటా ఉన్నప్పుడు ఉచితమెట్లవుతుంది? ట్రస్టు ఏర్పాటు చేయడం, డబ్బులు జమచేయడం.. దవాఖానలు క్లెయిమ్‌ చేసుకొనే విధానం సక్రమంగా అమలయ్యేనా? మేము దాచుకున్న డబ్బులు మాకివ్వనోళ్లు హెల్త్‌స్కీమ్‌ ప్రీమియం పైసలిస్తరా? బిల్లులు చెల్లిస్తారా? అంటూ ఉద్యోగ వర్గాల నుంచి అభ్యంతరాలు వ్యక్తమవుతున్నాయి. సర్కార్‌ తాజాగా అమల్లోకి తెచ్చిన ఉద్యోగుల ఆరోగ్య పథకం (ఈహెచ్‌ఎస్‌)పై ఆ వర్గాల నుంచి అనేక ప్రశ్నలు ఎదురవుతున్నాయి. ఈహెచ్‌ఎస్‌ స్కీమ్‌పై గురువారం (ఈ నెల 12న) ఉద్యోగ సంఘాల నేతలతో సర్కార్‌ కీలక సమావేశాన్ని నిర్వహించింది. కొన్ని విధివిధానాలను ఖరారు చేసింది.

ఈ పథకం అమలు కోసం ప్రతినెలా ఉద్యోగుల మూల వేతనం నుంచి 1.5 శాతం కోత పెడతారు. సర్కార్‌ కూడా అంతే మొత్తాన్ని కాంట్రిబ్యూషన్‌గా సమకూరుస్తుంది. ఈ మొత్తం అంతా ఈహెచ్‌ఎస్‌ ట్రస్టులో జమవుతుంది. ఈ ట్రస్టులో ప్రభుత్వ ప్రతినిధులు, ఉద్యోగ సంఘాల నుంచి ఆరుగురు, పెన్షనర్ల నుంచి ఒకరు సభ్యులుగా ఉంటారు. ఉద్యోగులకు హెల్త్‌కార్డులు జారీచేసి, ట్రస్టులో జమ అయిన మొత్తం నుంచి చికిత్స పొందిన దవాఖానలకు బిల్లులు చెల్తిస్తారు. ఈ పథకంపై ఉద్యోగుల్లో అనేక సందేహాలు, అపోహలు ఉన్నాయి. త్వరలో తీసుకొచ్చే రాష్ట్ర బడ్జెట్‌లో ఈ స్కీమ్‌ను ప్రభుత్వం ప్రకటించే అవకాశాలు ఉన్నాయి. ఈ పథకం మార్గదర్శకాలు కూడా త్వరలో ఖరారు కానున్నాయి. ఈ దశలో తమ అభ్యంతరాలను పరిగణనలోకి తీసుకోవాలని ఉద్యోగ వర్గాలు ప్రభుత్వాన్ని కోరుతున్నాయి.

ఉద్యోగ వర్గాల అపోహలు

• నెలకు రూ.లక్ష జీతం తీసుకునే ఉద్యోగి ప్రతి నెలా రూ.1,500, ప్రభుత్వం రూ.1,500 చొప్పున నెలకు రూ.3,000 చొప్పున చెల్లించాలి. అంటే ఏడాదికి రూ.36 వేలు అవుతుంది. అదే రూ.50 వేల బేసిక్‌ పే ఉన్న ఉద్యోగి నెలకు రూ750, ప్రభుత్వం రూ.750 చొప్పన చెల్లిస్తే రూ.18 వేలు అవుతుంది. ఈ మొత్తానికి ప్రైవేట్‌లో ఉత్తమ హెల్త్‌ పాలసీలు ఉన్నాయి. మరీ ఈహెచ్‌ఎస్‌లో గొప్పేమున్నది.
• నెలనెలా ఉద్యోగుల జీతాల నుంచి జీపీఎఫ్‌, టీఎస్‌ జీఎల్‌టీ వంటివి కట్‌ చేస్తున్నారు. కానీ సకాలంలో జీపీఎఫ్‌ ఇవ్వడమే లేదు. అవసరానికి వీటిపై రుణాలు తీసుకునే అవకాశమూ లేదు. చేతిలో చిల్లిగవ్వ పెట్టరు. మరీ హెల్త్‌కార్డుల మొత్తాన్ని ఇస్తారన్న నమ్మకమేంటి?
• రిటైర్మెంట్‌ బెనిఫిట్లు ఇవ్వడం లేదు. ఇప్పటివరకు 50 మంది పెన్షనర్లు చనిపోయా రు. ఇవి కూడా ఇస్తారన్న గ్యారెంటీ ఏంటి?
• పెండింగ్‌ బిల్లుల జారీకి, టోకెన్లు జారీ అయిన వాటికి మంజూరయ్యేందుకు పర్సెంటేజీల దందా నడుస్తున్నది. 10 నుంచి 30శాతం కమీషన్లు పుచ్చుకుంటున్న ఉదంతాలు ఉన్నాయి. రేపు వీటి చెల్లింపులకు కూడా పర్సెంటేజీలు సమర్పించుకోవాల్సిందేనా?
• ఆరోగ్యశ్రీ పథకం బిల్లులు చెల్లించకపోవడంతో దవాఖానలు ఈ పథకం సేవలను నిలిపివేస్తున్నాయి. రేపు ఈ బిల్లులు చెల్లించకపోతే సేవలను నిలిపివేస్తే మేం ఎవరికి చెప్పుకోవాలి? ఎక్కడికెళ్లాలి?
• హెల్త్‌కార్డు ఉన్నది కదా అని దవాఖానలో చికిత్స తర్వాత.. బిల్లులు చెల్లించేటప్పుడు నిధులు లేవంటే మా పరిస్థితి ఏమిటి?
• ఉద్యోగుల డబ్బును, సీపీఎస్‌ ఉద్యోగుల కాంట్రిబ్యూషన్‌ను ప్రాన్‌ అకౌంట్లలో వేయకుండా మళ్లిస్తున్నారు. ఇతర పథకాలకు వాడుకుంటున్నారు. భవిష్యత్తులో వందల కోట్లు జమయ్యాక. ఈ డబ్బులు మళ్లించరన్న గ్యారెంటీ ఏమిటి?
  ఉద్యోగులు సంధించే ప్రశ్నలివే..
• అయ్యా ఉద్యోగసంఘాల నాయకులారా! మాకు ఏదైనా కొత్తది ఇప్పించేందుకు పోటీపడండి. అంతేగానీ మా జీతాల నుంచి కోతలు పెట్టేందుకు సిద్ధంకాకండి సుమా!
• జీతం నుంచి కోతలు పెట్టేందుకు ఉన్న తొందర.. మాకు రావాల్సినవి ఇప్పించేందుకు లేదెందుకో? డీఏలు, పీఆర్సీలు ఇప్పించే శక్తిలేని సంఘాలకు హెల్త్‌స్కీమ్‌ కోసం జీతం నుంచి కోత విధించడానికి ఒప్పుకొనే శక్తి ఎలా ఉంటుంది?
• మీరు చెప్పే నమ్మలేని ఖాతాల్లో జమచేసే ప్రభుత్వ పథకం కంటే.. సొంతంగా తీసుకొనే ప్రైవేట్‌ ఆరోగ్య బీమాలే వెయ్యిరెట్లు నయం!
• మా జీతం నుంచి నెలానెలా కట్‌చేసి ఇచ్చేదానికి కూడా ఎవరో దయతలచి ఉచితంగా ఇస్తున్నట్టు.. దానం చేస్తున్నట్టు.. మాత్రం బిల్డప్‌ ఇవ్వకండి!
• నో పీఆర్సీ, నో డీఏ, నో ఎరియర్స్‌, నో ఆస్కింగ్‌, నో క్వశ్చనింగ్‌.. ఓన్లీ గివింగ్‌ అవర్‌ మనీ.. ఇది సాధించిన గొప్ప ఘనకార్యం.
• మా డీఏలు, ఎరియర్స్‌, పీఆర్సీలు, పెండింగ్‌ బిల్లులు, రిటైర్మెంట్‌ బెనిఫిట్లు సకాలంలో ఇప్పిస్తే మా హెల్త్‌ పాలసీ మేమే కట్టుకుంటాం.. మా బాధలు మేం పడుతాం!
• ప్రతి నెలా చందాలు కట్టించుకొనే హెల్త్‌పాలసీ క్యాష్‌లెస్‌ ట్రీట్‌మెంట్‌ ఎలా అవుతుంది?
•  3 శాతం డీఏను ఇచ్చినట్టే ఇచ్చి.. 1.5 శాతాన్ని లాక్కుంటున్నారు.

ఉద్యోగసంఘాల నేతలపై ఫైర్‌
ఈహెచ్‌ఎస్‌ పథకంలో ఉద్యోగుల వాటా 1.5 శాతంపై ఉద్యోగ సంఘాల నేతలు అంగీకరించడంపై సాధారణ ఉద్యోగులు మండిపడుతున్నారు. ఇంత మొత్తానికి ఎందుకు అంగీకరించారు? అంటూ ఆగ్రహం వ్యక్తంచేస్తున్నారు. సోషల్‌ మీడియాలో ముఖ్యంగా వాట్సాప్‌ గ్రూపుల్లో సంఘాల నేతలకు ప్రశ్నల వర్షం కురిపిస్తున్నారు. కొందరైతే ఫోన్లు చేసి మరీ ప్రశ్నలు సంధిస్తున్నారు. మరికొందరు సోషల్‌ మీడియా వేదికల్లో అక్షింతలేస్తున్నారు. ఉద్యోగుల వాటా ఎంత? అన్న అంశంపై గతంలో అనేక చర్చలు జరిగాయి. తొలుత ప్రతినెలా రూ.500 ఉద్యోగుల వాటాగా చెల్లించాలన్న ప్రతిపాదన వచ్చింది. ఆ తర్వాత చర్చల్లో ప్రతినెలా రూ.1,000కి పెంచారు.

కానీ గురువారం ఉద్యోగ సంఘాల నేతలతో జరిపిన చర్చల్లో 1.5 శాతం వాటాకు నేతలు అంగీకరించారు. కొందరు ఉద్యోగ సంఘాల నేతలు కూడా పర్సంటేజీ వద్దు.. నెలకు రూ.1,000 సరిపోతుందని సర్కార్‌కు చెప్పినా ఫలితం దక్కలేదని తెలుస్తున్నది. మొత్తంగా 1.5శాతం వాటాకు అంగీకారం కుదిరింది. దీనిపై తీవ్ర అభ్యంతరాలు వ్యక్తమవుతున్నాయి. దీనిని నమ్మితే నట్టేట మునిగినట్టే.. అంటూ ఉద్యోగుల్లో చర్చలు నడుస్తున్నాయి.