1300 కోట్లతో ‘పీఎం ఉషా’ ప్రతిపాదనలు

రాష్ట్రంలో డిగ్రీ కళాశాలలు, వర్సిటీల్లో మౌలిక వసతుల కల్పనకు రాష్ట్ర ఉన్నత విద్యాశాఖ అధికారులు 1300 కోట్లకు ప్రతిపాదనలు సమర్పించారు.

హైదరాబాద్‌, నవంబర్‌ 18 (నమస్తే తెలంగాణ): రాష్ట్రంలో డిగ్రీ కళాశాలలు, వర్సిటీల్లో మౌలిక వసతుల కల్పనకు రాష్ట్ర ఉన్నత విద్యాశాఖ అధికారులు 1300 కోట్లకు ప్రతిపాదనలు సమర్పించారు. పీఎం ఉషా పథకం కింద 16 జిల్లాల్లో 60కి పైగా కాలేజీల అభివృద్ధి కోసం ఈ ప్రతిపాదనలు అందజేశారు. దీనికి ఆదివారం నాటితో గడువు ముగియనున్నది. ఉన్నత విద్యాసంస్థల్లో మౌలిక వసతుల కల్పన కోసం గతంలో ఉన్న రాష్ట్రీయ ఉచత్తర్‌ అభియాన్‌ (రూసా) పథకం పేరును ప్రధానమంత్రి ఉచత్తర్‌ శిక్షా అభియాన్‌ (పీఎం-ఉషా)గా ఇటీవలే కేంద్ర ప్రభుత్వం మార్చింది. డిసెంబర్‌ చివరి వారంలో పీఎం ఉషా ప్రాజెక్ట్‌ అప్రూవల్‌ బోర్డు సమావేశమై రాష్ర్టాల ప్రతిపాదనలకు ఆమోదం తెలుపనున్నది.

35 కోట్ల పెండింగ్‌ నిధులు విడుదల

రూసా పథకం కింద రాష్ర్టానికి రావాల్సిన పెండింగ్‌ నిధులను కేంద్రం ఇటీవలే విడుదల చేసింది. ఈ మేరకు రూసా-2లో 35 కోట్ల పెండింగ్‌ నిధులు విడుదలయ్యాయి. వీటికి గతంలోనే అనుమతి లభించడం, రూసా గడువు పూర్తికావడంతో ఈ నిధులు వస్తాయా లేదోనన్న అనుమానాలను తొలగిస్తూ ఎట్టకేలకు కేంద్రం వాటిని విడుదల చేసింది.