ఫోన్‌ట్యాపింగ్‌ కేసు విచారణ 14కు వాయిదా

ఫోన్‌ట్యాపింగ్‌ కేసులో ప్రధాన నిందితుడు మాజీ ఇంటెలిజెన్స్‌ చీఫ్‌ ప్రభాకర్‌రావు ముందస్తు బెయిల్‌ను రద్దు చేయాలని కోరుతూ తెలంగాణ ప్రభుత్వం దాఖలు చేసిన పిటిషన్‌పై విచారణను సుప్రీంకోర్టు 14వ తేదీకి వాయిదా వేసింది.

హైదరాబాద్‌, అక్టోబర్‌ 8 (నమస్తే తెలంగాణ) : ఫోన్‌ట్యాపింగ్‌ కేసులో ప్రధాన నిందితుడు మాజీ ఇంటెలిజెన్స్‌ చీఫ్‌ ప్రభాకర్‌రావు ముందస్తు బెయిల్‌ను రద్దు చేయాలని కోరుతూ తెలంగాణ ప్రభుత్వం దాఖలు చేసిన పిటిషన్‌పై విచారణను సుప్రీంకోర్టు 14వ తేదీకి వాయిదా వేసింది. ఆ పిటిషన్‌పై జస్టిస్‌ బీవీ నాగరత్న, జస్టిస్‌ మహదేవన్‌ ధర్మాసనం బుధవారం విచారణ జరిపింది.

ఈ సందర్భంగా ప్రభుత్వం తరపున అడిషనల్‌ సొలిసిటర్‌ జనరల్‌ తుషార్‌మెహతా వాదనలు వినిపించారు. ఫోన్‌ట్యాపింగ్‌ కేసులో ఎఫ్‌ఎస్‌ఎల్‌ నివేదిక వచ్చిందని, అందులో కీలకమైన ఆధారాలు లభించాయని వివరించారు. ఈ నేపథ్యంలో ప్రభాకర్‌రావు ముందస్తు బెయిల్‌ను రద్దుచేయాలని విన్నవించారు. ఇదిలాఉండగా తెలంగాణ ప్రభుత్వం తరపున తుషార్‌మెహతా వాదనలు చేయడం చర్చనీయాంశంగా మారింది. అదనపు సొలిసిటర్‌ జనరల్‌ పోస్టును కేంద్ర హోంశాఖ భర్తీ చేస్తుంది. ఆ స్థానంలో ఉన్న ఆయన రాష్ట్రంలో కాంగ్రెస్‌ సర్కారు తరపున వాదనలు వినిపించడం చర్చనీయమైంది.