Dense Fog | పొగమంచులో ఓవర్‌టేక్‌ వద్దు.. తక్కువ వేగంతో వెళ్లడమే ఉత్తమం

రాష్ట్రవ్యాప్తంగా ఉదయం వేళల్లో దట్టమైన పొగమంచు కురుస్తున్నందున ఎదురుగా వచ్చే వాహనాలు కనిపించక రోడ్డు ప్రమాదాలు జరుగుతున్నాయి. తెలవారకముందే కొందరి బతుకులు తెల్లారిపోతుంటే.. మరికొందరి జీవితాలు అంధకారంలోకి జారుతున్నాయి.

• రోడ్లపై వాహనాల మధ్య దూరం పాటించండి
• లో-బీమ్‌లో హెడ్‌లైట్లను సెట్‌ చేయండి
• వాహనాలు తక్కువ వేగంతో వెళ్లడమే ఉత్తమ మార్గం
• ప్రమాదాల నివారణకు పోలీసుశాఖ సూచన

Dense Fog | హైదరాబాద్‌, డిసెంబర్‌ 28 (నమస్తే తెలంగాణ): రాష్ట్రవ్యాప్తంగా ఉదయం వేళల్లో దట్టమైన పొగమంచు కురుస్తున్నందున ఎదురుగా వచ్చే వాహనాలు కనిపించక రోడ్డు ప్రమాదాలు జరుగుతున్నాయి. తెలవారకముందే కొందరి బతుకులు తెల్లారిపోతుంటే.. మరికొందరి జీవితాలు అంధకారంలోకి జారుతున్నాయి. ప్రకృతికి అనుగుణంగానే వెళ్లాలే తప్ప.. వ్యతిరేకంగా వెళ్లవద్దని, అయినవాళ్లకు కన్నీరు మిగిల్చవద్దని తెలంగాణ పోలీసుశాఖ కోరుతున్నది. పొగమంచువేళ పౌరులు పాటించాల్సిన పలు జాగ్రత్తలను రైల్వే అండ్‌ రోడ్డుసేఫ్టీ ఏడీజీ కార్యాలయం విడుదల చేసింది. పొగమంచు వేళ వాహనాలను ఓవర్‌టేక్‌ చేయవద్దని పోలీసుశాఖ సూచించింది. ముఖ్యంగా తక్కువ స్పీడుతో వెళ్లడం, వాహనాల మధ్య దూరాన్ని పాటించడం వల్ల ప్రమాదాలను సాధ్యమైనంతవరకు నివారించవచ్చని తెలిపింది.

వాహనదారులు పాటించాల్సిన జాగ్రత్తలు

• వాహనం ఏదైనా లో-బీమ్‌లో హెడ్‌లైట్లను సెట్‌ చేసుకోవాలి. హై-బీమ్‌లో ఉండటం వల్ల రోడ్డు కనిపించదు. హెడ్‌లైట్‌ కిందికి ఉండటం వల్ల రోడ్డుపై ఉన్న మలుపులు, గుంతలు, స్పీడ్‌ బ్రేకర్లు సులువుగా కనిపిస్తాయి. విజిబిలిటీ వందమీటర్ల కంటే తక్కువగా ఉంటే ఫాగ్‌ ల్యాంప్‌ను ఆన్‌ చేయడం మంచిది.
• పొగమంచులో విజిబిలిటీ తక్కువగా ఉంటుంది కాబట్టి వేగాన్ని తగ్గించాలి. వేగంగా వెళ్తే.. పరిస్థితులను అంచనావేయడం కష్టం. లిమిటెడ్‌ స్పీడ్‌లో వెళ్లడం వల్ల రోడ్డుపై నడిచేవారి నుంచి, చిన్నచిన్న వాహనాల రాకపోకలు తెలుస్తాయి. పొగమంచులో వేగంగా వెళ్లడం వల్ల ఏదైనా ప్రమాదం జరిగినా అది తీవ్రంగా ఉంటుంది. పరిమిత వేగంలో వెళ్లడమే ఉత్తమం.
• పొగమంచు వేళ ఎదురుగా ఉన్న వాహనాలను చూడలేం కాబట్టి.. హారన్‌ ద్వారా వాటి దూరాన్ని అంచనా వేయవచ్చు. దట్టమైన పొగమంచులో ప్రయాణం చేస్తున్నప్పుడు అనుమానం ఉన్నప్పుడల్లా హారన్‌ కొట్టడం శ్రేయస్కరం. ముఖ్యంగా మ్యూజిక్‌/పాటలు వినడాన్ని పూర్తిగా మానుకోండి. అప్పుడే రోడ్డుపై వచ్చే వాహనాల దూరాన్ని అంచనా వేయొచ్చు.
• విజిబిలిటీ తక్కువగా ఉన్నప్పుడు రోడ్డుపై ఉండే లైన్లను తప్పనిసరిగా ఫాలో కావాలి. వాటి ద్వారా మలుపులను సులువుగా గుర్తించవచ్చు.
• పొగమంచులో ప్రయాణం చేస్తున్నప్పుడు ఎక్కడైనా మలుపులు తిరిగే దగ్గర పది సెకన్లపాటు సిగ్నల్స్‌ ఇవ్వడం మర్చిపోవద్దు. దీనివల్ల వెనుక నుంచి వచ్చే వాహనదారులకు మీరు వెళ్లే రూటుపై అవగాహన ఉంటుంది.
• మంచు ఎక్కువగా కురుస్తుంటే వాహనాన్ని రోడ్డు పక్కన ఆపి.. అద్దాలను శుభ్రంగా తుడ్చుకోవడానికి ప్రయత్నించండి. బయటి నుంచి వైపర్‌ మంచును క్లీన్‌ చేసినా.. లోపలి అద్దానికి చెమ్మ దిగుతూనే ఉంటుంది. అదికూడా మీకు ఇబ్బంది కలిగించొచ్చు. డ్రైవింగ్‌ చేస్తూ.. అద్దాలను క్లీన్‌ చేయడం మంచి పద్ధతి కాదు. ప్రమాదాలకు అవకాశం ఎక్కువగా ఉంటుంది.
• మంచులో ప్రయాణం చేస్తుంటే.. మీ వాహనంలో హీటర్‌ను తప్పనిసరిగా ఆన్‌ చేసుకోండి. దీనివల్ల గ్లాసెస్‌ను తరచూ తూడ్చే అవకాశం ఉండదు.
• దట్టమైన మంచు పడుతున్న వేళ ప్రయాణం చేస్తున్నప్పుడు వాహనాలను ఓవర్‌టేక్‌ చేసే ఆలోచన మానుకోవాలి. కనిపించని రోడ్డులో డివైడర్‌, స్పీడ్‌బ్రేకర్‌, గుంతలు, మలుపులు ఎక్కడ ఉంటాయో మనకు కనిపించకపోవచ్చు. చాలా ప్రమాదాలు ఓవర్‌టేక్‌ జరుగుతున్నాయని నివేదికలు చెప్తున్నాయి.
• వాతావరణ పరిస్థితులు అనుకూలంగా లేనప్పుడు కచ్చితంగా వాహనాల మధ్య దూరాన్ని పాటించాలి. దీనివల్ల ప్రమాదాలు జరిగే అవకాశం తక్కువగా ఉంటుంది. మన ముందున్న వాహనానికి ఏదైనా ప్రమాదం జరిగినా.. ఆ తీవ్రత మన వరకు రాకపోవచ్చు.
• ప్రయాణం ఏదైనా సరే.. పరధ్యానంగా ఉండొద్దు. అనుక్షణం అప్రమత్తంగా ఉండాలి. డ్రైవింగ్‌ చేస్తున్నప్పుడు రోడ్డుపైనే దృష్టిసారించడం వల్ల ఎలాంటి తప్పు జరిగే అవకాశం ఉండదు. ఏ చిన్న తప్పు జరిగినా.. మనతోపాటు మనవారంతా జీవితాంతం బాధపడాల్సి రావొచ్చు.