ఎన్‌బీఏ గుర్తింపు ఉంటేనే అఫిలియేషన్‌

ప్రైవేట్‌ ఇంజినీరింగ్‌ కాలేజీలకు అఖిలభారత సాంకేతిక విద్యామండలి (ఏఐసీటీఈ) షాకిచ్చింది. కాలేజీల్లో బోధించే 60 శాతం కోర్సులకు నేషనల్‌ బోర్డ్‌ ఆఫ్‌ అక్రెడిటేషన్‌ (ఎన్‌బీఏ)ను తప్పనిసరి చేసింది.

• 60 శాతం కోర్సులకు తప్పనిసరి
• రెండేండ్ల గడువు ఇచ్చిన ఏఐసీటీఈ

హైదరాబాద్‌, డిసెంబర్‌ 24 (నమస్తే తెలంగాణ): ప్రైవేట్‌ ఇంజినీరింగ్‌ కాలేజీలకు అఖిలభారత సాంకేతిక విద్యామండలి (ఏఐసీటీఈ) షాకిచ్చింది. కాలేజీల్లో బోధించే 60 శాతం కోర్సులకు నేషనల్‌ బోర్డ్‌ ఆఫ్‌ అక్రెడిటేషన్‌ (ఎన్‌బీఏ)ను తప్పనిసరి చేసింది. ఈ గుర్తింపు పొందేందుకు రెండేండ్లు గడువు విధించింది. ఈ మేరకు ఇంజినీరింగ్‌ కాలేజీలకు ఏఐసీటీఈ అప్రూవల్‌ బ్యూరో సలహాదారు ప్రొఫెసర్‌ రాజేంద్ర కాకడే ఇటీవల ఉత్తర్వులు జారీచేశారు. అక్రెడిటేషన్‌ పొందకుంటే ఎక్స్‌టెన్షన్‌ ఆఫ్‌ అప్రూవల్‌ (ఈవోఏ)ను జారీచేయబోమని.. అనుబంధ గుర్తింపును పొడగించలేని పరిస్థితులు తలెత్తుతాయని హెచ్చరించారు.

పరిగణనలోకి తీసుకునే అంశాలివే..

ఈ కోర్సులను బోధించే అధ్యాపకులు, ల్యాబ్‌లు, విద్యార్థుల ర్యాంకులు, బీటెక్‌లో ఉత్తీర్ణత, సగటు మార్కులు, క్యాంపస్‌ ప్లేస్‌మెంట్స్‌, ఉన్నత విద్యకు వెళ్లేవారి శాతం తదితర అంశాలను పరిగణనలోకి తీసుకొని అక్రెడిటేషన్‌ జారీచేస్తారు. బీటెక్‌తోపాటు మేనేజ్‌మెంట్‌, ఫార్మసీ, ఆర్కిటెక్చర్‌ తదితర కోర్సులకు ఎన్‌బీఏ గుర్తింపునిస్తున్నది. ఎన్‌బీఏ అక్రెడిటేషన్‌ గల కాలేజీల్లో బీటెక్‌లో చేరిన వారికి రాష్ట్రంలో అదనంగా రూ.5 వేలు ఫీజుగా వసూలు చేస్తున్నారు.

• ఎన్‌ఐటీ వరంగల్‌లో ఎలక్ట్రికల్‌ అండ్‌ ఎలక్ట్రానిక్స్‌, మెకానికల్‌, సివిల్‌ వంటి కోర్సులకు ఎన్‌బీఏ గుర్తింపు దక్కింది.
• ఈ విద్యాసంవత్సరంలో ఓయూ ఇంజినీరింగ్‌ కాలేజీలో సివిల్‌, కంప్యూటర్‌ సైన్స్‌, మెకానికల్‌, ఎలక్ట్రికల్‌, ఎలక్ట్రానిక్స్‌ అండ్‌ కమ్యూనికేషన్‌ కోర్సులకు మూడేండ్ల పాటు గుర్తింపు దక్కింది.
• మల్లారెడ్డి, సీఎమ్మార్‌, సీవీఆర్‌, గురునానక్‌, వర్ధమాన్‌ కాలేజీలోని పలు కోర్సులకు ఇటీవలే ఎన్‌బీఏ గుర్తింపు ఇచ్చింది.

ఇవీ ప్రయోజనాలు

• ఎన్‌బీఏ గుర్తింపు పొందిన కోర్సు.. సంస్థను అత్యధిక నాణ్యమైనదిగా పరిగణిస్తారు.
• ఈ కోర్సులకు ఉద్యోగాల కల్పనలో అత్యంత విలువనిస్తారు.
• అక్రెడిటేషన్‌ పొందే సంస్థలకు విద్యాసంస్థల బలాలు, బలహీనతలు తెలుసుకొనే అవకాశముంటుంది.
• ఈ గుర్తింపును దక్కించుకోవడం ద్వారా నిధులను రాబట్టవచ్చు.