కలెక్టరా.. కమిటీయా?

• ధరణి సమస్యల పరిష్కారంపై ముమ్మర కసరత్తు

హైదరాబాద్‌, జనవరి 19 (నమస్తే తెలంగాణ): ధరణిలో క్షేత్రస్థాయిలో ఎదురవుతున్న సమస్యల పరిష్కారంపై ముమ్మర కసరత్తు జరుగుతున్నది. క్యాబినెట్‌ సబ్‌కమిటీ ఇప్పటికే దాదాపు 20 సమస్యల పరిష్కారానికి ఏడు మాడ్యూల్స్‌ ప్రవేశపెట్టాలని ప్రతిపాదించినట్టు సమాచారం. ఇందులో నాలుగు అంశాలకు సంబంధించి తుది నిర్ణయాధికారం ఎవరికివ్వాలనే దానిపై చర్చ జరుగుతున్నట్టు తెలుస్తున్నది. ఇప్పటికే ధరణిలో భూసమస్యల పరిష్కారానికి ప్రభుత్వం అనేక మాడ్యూల్స్‌, ఆప్షన్లు ప్రవేశపెట్టిన సంగతి తెలిసిందే. ఆయా సమస్యల పరిష్కార బాధ్యతను కలెక్టర్లకు అప్పగించింది. ఈ మేరకు ఇప్పటికే రాష్ట్రవ్యాప్తంగా కలెక్టర్లు లక్షల దరఖాస్తులను పరిష్కరించారు. ఇప్పుడు 3-4 అంశాలకు సంబంధించిన నిర్ణయాధికారాన్ని కలెక్టర్లకు ఇవ్వాలా? లేక రాష్ట్ర స్థాయిలో ఒక ప్రత్యేక కమిటీని ఏర్పాటుచేసి దానికి ఇవ్వాలా? అని ఉన్నతాధికారులు చర్చిస్తున్నట్టు సమాచారం.

1. పట్టాదారు పేరు మార్పు
   కొన్నిచోట్ల అసలు భూ యజమాని పేరుకు బదులు వేరే వ్యక్తుల పేర్లు ధరణిలో నమోదైనట్టు ఫిర్యాదులు వస్తున్నాయి. అసలు పట్టాదారును ఎలా గుర్తించాలి? వేరే వ్యక్తుల పేరు మీద ఉన్న భూమిని మారిస్తే ఎలాంటి సమస్యలు వస్తాయి? ఈ అధికారం ఎవరికి ఇవ్వాలి? తదితర కోణాల్లో క్షుణ్ణంగా చర్చిస్తున్నారని సమాచారం.
2. విస్తీర్ణం మార్పు
   తమ వాస్తవ సాగుభూమికి, ధరణిలో నమోదైన విస్తీర్ణానికి మధ్య వ్యత్యాసం ఉన్నదని అనేక ఫిర్యాదులు వస్తున్నాయి. ఈ సమస్య పరిష్కారంపై తీవ్ర చర్చ జరుగుతున్నట్టు తెలిసింది.
3. నిషేధిత జాబితా సవరణ
   పట్టా భూములు నిషేధిత జాబితాలో చేరడం, స్వాతంత్య్ర సమరయోధులు, సైనికులకు ఇచ్చిన భూములను నిషేధిత జాబితా నుంచి తొలిగించే ప్రక్రియపై ఉన్నతాధికారులు దృష్టి సారించినట్టు సమాచారం. వీటిని సవరించే అధికారం ఎవరికి ఇవ్వాలి? అని అభిప్రాయాలు సేకరిస్తున్నట్టు తెలిసింది. సాధ్యాసాధ్యాలను పరిశీలించిన తర్వాత సమగ్ర నివేదిక రూపొందించి ప్రభుత్వానికి ఇవ్వనున్నట్టు సమాచారం. అనంతరం పరిష్కార బాధ్యత ఎవరికి అప్పగించాలో నిర్ణయించనున్నట్టు సమాచారం.