అప్రకటిత విద్యుత్తు కోతలు

పగలు, రాత్రి అన్న తేడాల్లేకుండా రాష్ట్రంలో విద్యుత్తు కోతలు సాధారణమయ్యాయి. పల్లె, పట్నం అన్న భేదం లేకుండా అనధికారింగా కోతలు అమలవుతున్నాయి. దీంతో జనాలకు అవస్థలు తప్పడంలేదు.

• పెరిగిన ఉష్ణోగ్రతలతో అవస్థలు
• మధ్యాహ్నం, రాత్రి సమయాల్లో పలు దఫాలుగా కరెంట్‌ కట్‌

హైదరాబాద్‌, మే 20 (నమస్తే తెలంగాణ): పగలు, రాత్రి అన్న తేడాల్లేకుండా రాష్ట్రంలో విద్యుత్తు కోతలు సాధారణమయ్యాయి. పల్లె, పట్నం అన్న భేదం లేకుండా అనధికారింగా కోతలు అమలవుతున్నాయి. దీంతో జనాలకు అవస్థలు తప్పడంలేదు. ఒకవైపు ఎండలు మండుతుండగా, మరోవైపు విద్యుత్తు కటకటతో జనం అల్లాడుతున్నారు. ప్రత్యేకించి ఈ వారంలో కోతలు మరింత ఎక్కువయ్యాయి. రాష్ట్రంలో వరి పంటకోతలు పూర్తయి.. వ్యవసాయానికి విద్యుత్తు వినియోగం గణనీయంగా తగ్గింది. అయినప్పటికీ గృహ, పారిశ్రామిక రంగాలకు రాష్ట్ర ప్రభుత్వం విద్యుత్తును సక్రమంగా అందించలేకపోతున్నది. ఎక్కడైనా వీఐపీ కార్యక్రమాలుంటే డిస్కంల అధికారులు అప్రమత్తమవుతున్నారు. ఆయా ప్రాంతాల్లో కోతల్లేకుండా చూస్తున్నారు. జనాలను మాత్రం గాలికొదిలేశారు.

క్షేత్రస్థాయిలో పరిస్థితులిలా..

• ధర్మపురి నియోజకవర్గంలోని ల్యాగలమర్రిలో సోమవారం మధ్యాహ్నం రెండుసార్లు కరెంట్‌ పోయింది. మధ్యాహ్నం 1:30 గంటల నుంచి 2:30 గంటల మధ్యలో రెండుసార్లు కరెంట్‌ పోయింది. మిట్టమధ్యాహ్నం కరెంట్‌ కట్‌ కావడంతో జనం ముప్పుతిప్పలు పడ్డారు.
• చొప్పదండి నియోజకవర్గంలోని గుమ్లాపూర్‌లో ఆదివారం ఒక్కరోజే మూడుసార్లు కరెంట్‌పోయింది. 10-15 నిమిషాల వ్యవధిలో కరెంట్‌ పోవడం, మళ్లీ రావడం జరిగాయి. రాత్రి 11 గంటలకు కూడా ఈ గ్రామంలో కరెంట్‌ నిలిపివేశారు.
• సోమవారం కరీంనగర్‌ జిల్లా నుస్తులాపూర్‌లో రాత్రి 7:35 గంటలకు కరెంట్‌ కట్‌ అయ్యింది. మళ్లీ రాత్రి 8:05 గంటల ప్రాంతంలో కరెంట్‌ పునరుద్ధరించారు. కరెంట్‌ లేకఅవస్థలు పడ్డారు.
• నాలుగు రోజుల క్రితం మంత్రి కొండా సురేఖ వరంగల్‌లో ప్రెస్‌మీట్‌లో మాట్లాడుతుండగా కరెంట్‌ పోయింది. నాలుగు నిమిషాల పాటు కరెంట్‌ పోగా, మంత్రి చీకట్లోనే మాట్లాడాల్సి వచ్చింది.
• గ్రేటర్‌లోని చంపాపేట డివిజన్‌ పరిధిలో శనివారం ఉదయం 9:30 గంటల నుంచి 11 గంటల వరకు కరెంట్‌ కట్‌ అయ్యింది. శ్రీనివాసనగర్‌లో మధ్యాహ్నం 3:30గంటల నుంచి 5గంటల వరకు కరెంట్‌ పోయింది.
• జగిత్యాల జిల్లా కొడిమ్యాల మండలంలో ఓ సభలో బీఆర్‌ఎస్‌ మాజీ ఎంపీ వినోద్‌కుమార్‌ మాట్లాడుతుండగా అకస్మాత్తుగా కరెంట్‌ పోయింది.
• గ్రేటర్‌ హైదరాబాద్‌లోని సరూర్‌నగర్‌లో ప్రతి శనివారం కరెంట్‌ పోతున్నట్టు స్థానికులు ఆవేదన వ్యక్తంచేశారు.

డిమాండ్‌ డౌన్‌ అయినా..

ఇటీవల ప్రతిరోజు వర్షం పడుతుండటం, ఉష్ణోగ్రతలు తగ్గడంతో విద్యుత్తు వినియోగం తగ్గిపోయింది. గతనెలలో గరిష్ఠ డిమాండ్‌ 17వేల మెగావాట్లు నమోదుకాగా, ప్రస్తుతం 9,297 మెగావాట్లకు చేరింది. ఈ ఏడాది వేసవి ప్రారంభంలో విద్యుత్తు డిమాండ్‌ 9.8 శాతం పెరిగింది. ప్రస్తుతం విద్యుత్‌ డిమాండ్‌ తగ్గినా కరెంట్‌ కోతలు సర్వసాధారణమవ్వడంతో జనం అవస్థలు పడుతున్నారు.