ఏండ్లు గడుస్తున్నా.. లైన్లు పడవు!

తెలంగాణ పట్ల అన్ని విషయాలలో వివక్ష చూపుతున్న కేంద్ర ప్రభుత్వం రైల్వే ప్రాజెక్టుల అంశంలోనూ అదే ధోరణి కనబరుస్తున్నది. రాష్ట్రంలో రైల్వే ప్రాజెక్టులు ఒక అడుగు ముందుకు.. నాలుగు అడుగులు వెనుకకు అన్న చందంగా

• రైల్వే ప్రాజెక్టుల్లో కేంద్రం వివక్ష
• 25 ఏండ్లుగా పనుల పెండింగ్‌
• కొత్త లైన్లు, డబ్లింగ్‌ పనులు, విద్యుదీకరణ.. రైల్వే స్టేషన్ల అభివృద్ధి.. ఎక్కడి పనులు అక్కడే

హైదరాబాద్‌ సిటీబ్యూరో, సెప్టెంబర్‌ 8 (నమస్తే తెలంగాణ): తెలంగాణ పట్ల అన్ని విషయాలలో వివక్ష చూపుతున్న కేంద్ర ప్రభుత్వం రైల్వే ప్రాజెక్టుల అంశంలోనూ అదే ధోరణి కనబరుస్తున్నది. రాష్ట్రంలో రైల్వే ప్రాజెక్టులు ఒక అడుగు ముందుకు.. నాలుగు అడుగులు వెనుకకు అన్న చందంగా సాగుతున్నాయి. తెలంగాణకు దాదాపు 25 ప్రాజెక్టులు మంజూరైనా పనులు మాత్రం ముందుకు సాగడం లేదు. బీజేపీ ఏలికలోని గుజరాత్‌, ఉత్తరప్రదేశ్‌, కర్ణాటక రాష్ర్టాల్లో రైల్వే ప్రాజెక్టులు వేగంగా పూర్తవుతుండగా.. తెలంగాణలో మాత్రం నత్త వేగంతో కూడా సాగడం లేదు.

కొత్త లైన్లు, డబ్లింగ్‌ పనులు, విద్యుదీకరణ, రైల్వే స్టేషన్ల అభివృద్ధి వంటి పనులు సుదీర్ఘకాలంగా పెండింగ్‌లో ఉన్నాయి. కేంద్ర ప్రభుత్వానికి ఆదాయం తెచ్చి పెట్టే ప్రాజెక్టులకు ప్రాధాన్యమిస్తున్న కేంద్రం.. తెలంగాణ ప్రజల అవసరాలు తీర్చే ప్రాజెక్టులకు మాత్రం మొండిచేయి చూపుతున్నది. ఇక కేటాయింపుల విషయంలో కూడా వివక్ష కొట్టొచ్చినట్టు కనిపిస్తున్నది. గత బడ్జెట్‌లో ఏపీకి రూ.7032 కోట్లు కేటాయించిన కేంద్రం తెలంగాణకు రూ.3034 కోట్లు మాత్రమే కేటాయించింది.

నత్తను తలపిస్తున్న ప్రాజెక్టుల నడక
దేవరకద్ర నుంచి కర్ణాటకలోని కృష్ణ రైల్వే స్టేషన్‌ వరకు 66 కిలోమీటర్ల కొత్త రైలు మార్గాన్ని 1997-98లో అప్పటి ప్రభుత్వం మంజూరు చేసింది. దాదాపు 25 ఏండ్లు గడుస్తున్నా ఈ ప్రాజెక్టు ముందుకు సాగడం లేదు. ఇప్పటికి 53 కిలోమీటర్ల మేరకు లైను పూర్తయినట్టు అధికారులు చెప్తున్నారు.

• భద్రాచలం- సత్తుపల్లి మార్గంలో కొత్తలైను నిర్మాణానికి 2010-11లో పనులు మంజూరు కాగా, రెండు నెలల క్రితం పూర్తి చేశారు. కానీ ఆ మార్గంలో ఇంకా విద్యుదీకరణ పనులు పూర్తికాలేదు. ఈ ప్రాజెక్టు మొత్తం వ్యయం రూ.927.94కోట్లు కాగా, రూ.618.55 కోట్లు కేటాయించినట్టు రైల్వే అధికారులు తెలిపారు.
• సికింద్రాబాద్‌-మహబూబ్‌నగర్‌ స్టేషన్‌ మధ్య 85 కిలోమీటర్ల పొడవున డబ్లింగ్‌ పనులను 2015-16లో మంజూరు చేశారు. ఈ పనులు పూర్తయ్యాయని చెప్తున్నప్పటికీ వచ్చే డిసెంబర్‌ నాటికి అది పూర్తిస్థాయిలో అందుబాటులోకి వస్తుందని అంటున్నారు.
• కాజీపేట బల్లార్ష మధ్య 201 కిలోమీటర్ల పొడవున మూడో లైను 2015-16లో మంజూరైంది. ఈ పనుల కోసం రూ.2,063 కోట్లు కేటాయించారు. ఎనిమిదేండ్లు అవుతున్నా ఇప్పటికి 49 కిలోమీటర్ల వరకే పనులు పూర్తయ్యాయి.
• మణుగూరు రామగుండం మధ్య కొత్త రైల్వే లైను 2013-14లో మంజూరైంది. దాదాపు 197 కిలోమీటర్ల పొడవున లైను వేయడానికి రూ.1112 కోట్లు కేటాయించారు. ఈ పనులు ఎప్పుడు పూర్తవుతాయన్న దానిపై అధికారులకే స్పష్టత లేకుండా పోయింది.
• భద్రాచలం-కొవ్వూరు మధ్యలో 151 కిలోమీటర్ల పొడవున కొత్త లైను నిర్మాణానికి 2012-13లో రూ.1445.27 కోట్లు కేటాయించారు. పదేండ్లు పూర్తవుతున్నా.. ఈ పనుల ప్రారంభానికి ఇంతవరకు రైల్వే బోర్డు అనుమతి ఇవ్వలేదు.
• గుంటూరు-బీబీనగర్‌ స్టేషన్ల మధ్య 293 కిలోమీటర్ల పొడవున డబ్లింగ్‌ పనులకు 2019-20లో రైల్వే బోర్డు అనుమతి ఇచ్చింది. ఇందుకోసం రూ.2,480 కోట్లు కేటాయించారు. ఇంతవరకు పనులు మాత్రం ప్రారంభించలేదు.
• మహారాష్ట్ర, తెలంగాణ, ఏపీ రాష్ర్టాలను అనుసంధానం చేస్తూ ముత్కేడ్‌-ఢోన్‌ స్టేషన్ల మధ్య 418 కిలోమీటర్ల పొడవున డబ్లింగ్‌ పనుల కోసం 2019-20లో రూ.6,260 కోట్లు కేటాయించారు. దీనికి సంబంధించిన డీపీఆర్‌ రైల్వే బోర్డుకు అందినప్పటికీ, పనుల పురోగతిలో ఎటువంటి మార్పు కనిపించడం లేదు.
• సికింద్రాబాద్‌ రైల్వే స్టేషన్‌ అభివృద్ధికి రూ.530 కోట్లు మంజూరు చేస్తూ ఈ ఏడాది జూన్‌లో రైల్వే బోర్డు నిర్ణయం తీసుకుంది. కానీ పనులు ఇంకా టెండర్‌ దశలో ఆగిపోయాయి.

పెండింగ్‌లో ఉన్న మరికొన్ని ప్రతిపాదనలు
1. కరీంనగర్‌-మానకొండూర్‌- హుజూరాబాద్‌-కాజీపేట్‌
2. మంచిర్యాల-ఆదిలాబాద్‌
3. మణుగూర్‌-రామగుండం
4. నంద్యాల-జడ్చర్ల
5. కోయగూడెం మైన్స్‌- తడికపూడి
6. భద్రాచలం రోడ్‌- విశాఖపట్నం
7. హైదరాబాద్‌-శ్రీశైలం
8. సిద్దిపేట- అక్కన్నపేట్‌
9. వాషిం-మాహోర్‌-ఆదిలాబాద్‌
10. పటాన్‌చెరు-సంగారెడ్డి
11. పగిడిపల్లి దగ్గర..బైపాస్‌ లైన్‌