సైనిక్‌ స్కూల్‌ ఇచ్చారు.. ప్రవేశాలు మరిచారు..

‘దేశవ్యాప్తంగా కొత్తగా 21 సైనిక స్కూళ్లను మంజూరుచేశాం. రాష్ర్టాలవారీగా తెలంగాణ, ఏపీ, తమిళనాడుకు ఒకటి చొప్పున ఇచ్చాం. 2022-23 విద్యాసంవత్సరం నుంచి వీటిల్లో తరగతులు ప్రారంభమవుతాయి” ఇది సైనిక స్కూళ్లు మంజూరుచేసినప్పుడు కేంద్ర రక్షణశాఖ చేసిన ప్రకటన.

• జాతీయ స్థాయిలో 18 స్కూళ్లకే అవకాశం
• తెలంగాణ విద్యార్థులు ఆంధ్రపదేశ్‌కు వెళ్లాల్సిందే

హైదరాబాద్‌, అక్టోబర్‌ 25 (నమస్తే తెలంగాణ) : ‘దేశవ్యాప్తంగా కొత్తగా 21 సైనిక స్కూళ్లను మంజూరుచేశాం. రాష్ర్టాలవారీగా తెలంగాణ, ఏపీ, తమిళనాడుకు ఒకటి చొప్పున ఇచ్చాం. 2022-23 విద్యాసంవత్సరం నుంచి వీటిల్లో తరగతులు ప్రారంభమవుతాయి” ఇది సైనిక స్కూళ్లు మంజూరుచేసినప్పుడు కేంద్ర రక్షణశాఖ చేసిన ప్రకటన. కానీ, తెలంగాణకు మంజూరైన సైనిక్‌ స్కూల్‌ కాగితాలకే పరిమితమైంది. కొత్త సైనిక స్కూల్‌ ఏర్పాటులో కేంద్రం పూర్తిగా నిర్లక్ష్య వైఖరిని ప్రదర్శించింది. ఈ విద్యాసంవత్సరం 18 స్కూళ్లల్లోనే ప్రవేశాలకు అవకాశం కల్పించి.. తెలంగాణ సైనిక్‌ స్కూల్‌ను పూర్తిగా విస్మరించింది. అన్ని విషయాల్లో తెలంగాణపై పూర్తిగా కక్షపూరితంగా వ్యవహరిస్తూ.. వివక్షను ప్రదర్శించిన కేంద్రం తాజాగా సైనిక్‌స్కూల్‌ విషయంలోనూ అదే వైఖరిని కనబరిచింది. ఈ లెక్కన తెలంగాణకు సైనిక్‌ స్కూల్‌ మంజూరైనట్టా? లేదా అన్నది ప్రశ్నార్థకంగా మిగిలింది.

నోటిఫికేషన్‌లో లేని రాష్ట్రం

గతంలో ఉన్న 33 సైనిక స్కూళ్లతో పాటు కొత్తగా మంజూరుచేసిన 18 స్కూళ్లల్లోనే ప్రవేశాల గురించి నేషనల్‌ టెస్టింగ్‌ఏజెన్సీ (ఎన్టీఏ) నోటిఫికేషన్‌లో ప్రకటించారు. తెలంగాణ సైనిక్‌ స్కూల్‌ను ఈ నోటిఫికేషన్‌లో చేర్చలేదు. కాగా, తెలంగాణ వారికి ఏపీలోని సైనిక్‌ స్కూళ్లో ప్రవేశాలు కల్పిస్తామని వెల్లడించారు.

బీజేపీ పాలిత రాష్ర్టాలకే..

కొత్తగా అడ్మిషన్లు ప్రారంభించిన 18 సైనిక్‌ స్కూళ్లల్లో 11 స్కూళ్లను బీజేపీ పాలిత రాష్ట్రాలకే తరలించింది. మహారాష్ట్ర, గుజరాత్‌, కర్ణాటక, హర్యానాకు 2 చొప్పున, మధ్యప్రదేశ్‌, అరుణాచల్‌ప్రదేశ్‌, హిమాచల్‌ప్రదేశ్‌కు ఒకటి చొప్పున స్కూళ్లను బీజేపీ పాలిత రాష్ర్టాలకే కేటాయించింది. మిగిలిన ఏడు బీజేపీయేతర ప్రభుత్వాలున్న బీహార్‌కు రెండు, తమిళనాడు, ఏపీ, దాద్రానగర్‌ హవేలి, పంజాబ్‌, కేరళ రాష్ర్టాలకు ఒకటి చొప్పున ఇచ్చారు.