జనవరి 28 నుంచి మేడారం మహాజాతర

ఆసియా ఖండంలోనే అతిపెద్ద గిరిజన జాతరగా పేరుగాంచిన ములుగు జిల్లా తాడ్వాయి మండలంలోని మేడారం సమ్మక్క, సారలమ్మ మహాజాతర నిర్వహణకు ఆదివాసీ పూజారులు తేదీలను ఖరారు చేశారు.

• తేదీలు ఖరారు చేసిన ఆదివాసీ పూజారులు

తాడ్వాయి, జూలై 2 : ఆసియా ఖండంలోనే అతిపెద్ద గిరిజన జాతరగా పేరుగాంచిన ములుగు జిల్లా తాడ్వాయి మండలంలోని మేడారం సమ్మక్క, సారలమ్మ మహాజాతర నిర్వహణకు ఆదివాసీ పూజారులు తేదీలను ఖరారు చేశారు. బుధవారం పూజారుల సంఘం అధ్యక్షుడు సిద్దబోయిన జగ్గారావు ఆధ్వర్యంలో సమ్మక్క, సారలమ్మ, గోవిందరాజు, పగిడిద్దరాజుల పూజారులు తల్లుల గద్దెల ప్రాంగణంలో సమావేశమాయ్యరు.

ఆదివాసీ సంస్కృతీ సంప్రదాయాల ప్రకారం వచ్చే ఏడాది జనవరి 28నుంచి 31వ తేదీ వరకు నాలుగు రోజులపాటు మహాజాతర నిర్వహించనున్నారు. జనవరి 28న కన్నెపల్లి నుంచి సారలమ్మ దేవతను, ఏటూరునాగారం మండలం కొండాయి, కొత్తగూడ మండలం పూనుగొండ్ల నుంచి గోవిందరాజు, పగిడిద్దరాజు గద్దెలపైకి చేరుతారని, 29న మేడారంలోని చిలకలగుట్ట నుంచి సమ్మక్క దేవత గద్దెపై కొలువుదీరుతుందని, 30న వనదేవతలకు భక్తుల మొక్కులు చెల్లించుకున్న అనంతరం 31న సాయంత్రం 6 గంటల సమయంలో తల్లులను వనప్రవేశం చేయించడంతో మహాజాతర ఘట్టం పూర్తవుతుందని పూజారులు తెలిపారు.