Groups Exams | చిన్న తప్పు పెద్దశిక్ష.. గ్రూప్స్‌ పరీక్షల్లో భారీగా ఇన్‌వాలిడేషన్‌

హాల్‌టికెట్‌ నంబర్‌ లేదా ప్రశ్నప్రతం నంబర్‌ తప్పుగా రాయడం, గడులను సక్రమంగా నింపకపోవడం, ఒకసారి నింపిన గడులను తప్పు అని తెలుసుకొని చెరిపివేయడం వంటి చిన్న చిన్న పొరపాట్లు పోటీ పరీక్షల అభ్యర్థుల పాలిట శాపంగా మారుతున్నాయి.

• గ్రూప్‌-2, 3లో 31 వేల మంది అనర్హులు

Groups Exams | హైదరాబాద్‌, మార్చి 14 (నమస్తే తెలంగాణ): హాల్‌టికెట్‌ నంబర్‌ లేదా ప్రశ్నప్రతం నంబర్‌ తప్పుగా రాయడం, గడులను సక్రమంగా నింపకపోవడం, ఒకసారి నింపిన గడులను తప్పు అని తెలుసుకొని చెరిపివేయడం వంటి చిన్న చిన్న పొరపాట్లు పోటీ పరీక్షల అభ్యర్థుల పాలిట శాపంగా మారుతున్నాయి. చిన్న పొరపాటే పెద్దశిక్షకు దారితీస్తున్నాయి. ఇలాంటి తప్పిదాల కారణంగా గ్రూప్స్‌ పరీక్షల్లో వేలాది మంది అభ్యర్థులపై అనర్హత వేటుపడింది. కొందరు టాప్‌ మార్కులకు దగ్గరగా ఉన్న వారు సైతం ఫలితాలు చూసుకుని అవాక్కయ్యారు.

జీఆర్‌ఎల్‌లో తమ హాల్‌టికెట్‌ నంబర్‌ లేకపోవడం, ఓఎమ్మార్‌లో చూస్తే తప్పులుండటంతో అయ్యో రామా..! అంటూ నిట్టూర్చాల్సిన పరిస్థితి తలెత్తుతున్నది. గ్రూప్‌-2, గ్రూప్‌-3 రెండు పేపర్లలో 31,679 మంది అభ్యర్థులపై అనర్హత వేటు పడింది. అత్యధికంగా గ్రూప్‌-3లో 18 వేల మంది, గ్రూప్‌-2లో 13 వేల మంది ఓఎమ్మార్‌ షీట్లు ఇన్‌వాలిడ్‌ అయ్యాయి. గ్రూప్‌-1లో కొంత మంది పేపర్లు ఇన్‌వాలిడ్‌ అయ్యాయి. దీంతో ఆయా అభ్యర్థుల పరిస్థితి అగమ్యగోచరంగా మారింది. టీజీపీఎస్సీ అధికారులు మానవతాదృక్పథంతో తమ ఓఎమ్మార్‌ షీట్లను లెక్కలోకి తీసుకుని, తమకు అవకాశం కల్పించాలని అభ్యర్థులు డిమాండ్‌ చేస్తున్నారు.

కొన్ని ఉదాహరణలు..

• ఓ అభ్యర్థికి మూడు పేపర్లలో 270 మార్కులొచ్చాయి. ఈ అభ్యర్థి గడులు సరిగ్గా నింపని కారణంగా అనర్హత వేటువేశారు.
• ఓ మహిళా అభ్యర్థి ప్రశ్నప్రతం బుక్‌లెట్‌ నంబర్‌ను తప్పుగా బబుల్‌ చేసింది. మొదటి నంబర్‌ ఒకటి అని రాసి గడులు నింపే క్రమంలో ఒకటి అంకెకు బదులు సున్నా అంకెను బబుల్‌ చేసింది. దీంతో సదరు అభ్యర్థిపై అనర్హత వేటుపడింది.
• ఓ అభ్యర్థికి గ్రూప్‌-3లో 288 మార్కులొచ్చాయి. సరిగా గడులు నింపని కారణంగా ఈ అభ్యర్థిపై అనర్హత వేటుపడింది.
• గ్రూప్‌-3 ఫలితాల్లో మహిళా క్యాటగిరీలో టాప్‌ ర్యాంకు 325 కాగా, టాప్‌ టెన్‌లో ఉన్న చివరి అభ్యర్థినికి 301 మార్కులొచ్చాయి. ఫలితాల్లో చూస్తే ఓ అభ్యర్థినికి 288 మార్కులొచ్చినా ఇన్‌వాలిడ్‌కావడంతో ఇప్పుడా అభ్యర్థిని ఆవేదన వర్ణనాతీతంగా మారింది.