పెండ్లి.. ఆ వెంటనే రిజిస్ట్రేషన్‌

చట్టప్రకారం వివాహాన్ని రిజిస్ట్రేషన్‌ చేసుకోవాలనుకునే స్పృహ నేటి తరంలో పెరుగుతున్నది. ముఖ్యంగా కల్యాణలక్ష్మి, షాదీముబారక్‌ పథకాన్ని రాష్ట్ర ప్రభుత్వం ప్రారంభించాక పెండ్లిళ్ల రిజిస్ట్రేషన్లు భారీగా పెరిగాయి. ఈ పథకాల కింద లబ్ధి పొందేందుకు చాలా మంది వివాహాన్ని నమోదు చేయించుకొనేందుకు ముందుకు వస్తున్నారు

• వివాహ నమోదుకు పెరుగుతున్న ఆదరణ
• గ్రామీణ ప్రాంతాల్లో భారీగా రిజిస్ట్రేషన్లు
• కల్యాణలక్ష్మి, షాదీముబారక్‌తో మార్పు

హైదరాబాద్‌, జూలై 18 (నమస్తే తెలంగాణ): చట్టప్రకారం వివాహాన్ని రిజిస్ట్రేషన్‌ చేసుకోవాలనుకునే స్పృహ నేటి తరంలో పెరుగుతున్నది. ముఖ్యంగా కల్యాణలక్ష్మి, షాదీముబారక్‌ పథకాన్ని రాష్ట్ర ప్రభుత్వం ప్రారంభించాక పెండ్లిళ్ల రిజిస్ట్రేషన్లు భారీగా పెరిగాయి. ఈ పథకాల కింద లబ్ధి పొందేందుకు చాలా మంది వివాహాన్ని నమోదు చేయించుకొనేందుకు ముందుకు వస్తున్నారు. పట్టణాలతో పోలిస్తే గ్రామీణ ప్రాంతాల్లోనే ఎక్కువ మ్యారేజ్‌ రిజిస్ట్రేషన్లు జరుగుతుండటం గమనార్హం. గత ఐదేండ్లలో స్టాంపులు, రిజిస్ట్రేషన్‌ శాఖ ద్వారా జరిగిన వివాహ రిజిస్ట్రేషన్లు ఉమ్మడి కరీంనగర్‌, వరంగల్‌, నల్లగొండ జిల్లాల్లోనే ఎక్కువగా జరిగాయి. ఐదేండ్లలో కరీంనగర్‌లో 76,062, వరంగల్‌లో 52,751 వివాహాలు సబ్‌రిజిస్ట్రార్‌ కార్యాలయాల్లో రిజిస్టర్‌ అయ్యాయి. అటు.. కులాంతర వివాహాలు (స్పెషల్‌ మ్యారేజెస్‌) సైతం వేల సంఖ్యలో రిజిస్టర్‌ అవుతున్నాయి.

పెండ్లి రిజిస్ట్రేషన్‌ ప్రయోజనాలు

• వివాహ రిజిస్ట్రేషన్‌ ధ్రువపత్రం పెండ్లికి సాక్ష్యంగా నిలిచే చట్టపరమైన పత్రం.
• అమ్మాయికి పెండ్లి తర్వాత పాస్‌పోర్ట్‌ దరఖాస్తుకు, బ్యాంక్‌ ఖాతా తెరవాలనుకొన్నా, పాన్‌ కార్డులో పేరు మార్పునకు వివాహ ధ్రువీకరణ పత్రం తప్పనిసరి.
• విదేశాలకు వెళ్లాలనుకొనే భార్యాభర్తలు వీసాలు పొందేందుకు సాయపడుతుంది. విదేశీ రాయబార కార్యాలయాలు సంప్రదాయ వివాహాలను గుర్తించవు. దీంతో విదేశాలకు వెళ్లడానికి వివాహ ధ్రువీకరణ పత్రం కచ్చితంగా ఉండాలి.
• నామిని, బీమాదారు, డిపాజిటర్‌ మరణించిన సందర్భంలో జీవితబీమా రిటర్న్‌ లేదా బ్యాంక్‌ డిపాజిట్లను క్లెయిమ్‌ చేసుకొనేందుకు జీవిత భాగస్వామికి ఈ ధ్రువీకరణ పత్రం సాయపడుతుంది.
• జీవిత భాగస్వామి ఆస్తి వారసత్వ హక్కుగా పొందేందుకు ఇది తప్పనిసరి.
• చట్టపరంగా భార్యాభర్తలు విడిపోవాలనుకొనే సమయంలో ఆస్తి బదిలీ, పిల్లల కస్టడీకి కోర్టులో వివాహ ధ్రువీకరణ పత్రాన్ని సమర్పించాల్సి ఉంటుంది.