వేతనాలు ఇప్పించండి.. వ్యవసాయశాఖ కార్యదర్శికి మార్కెట్‌ కమిటీల సెక్యూరిటీ గార్డ్స్‌ యూనియన్‌ వినతి

ఐఎఫ్‌ఎంఎస్‌ పోర్టల్‌లో తమ వివరాల నమోదులో సాంకేతిక లోపాలను సరిచేసి సకాలంలో వేతనాలు విడుదలయ్యేలా చర్యలు తీసుకోవాలని మారెట్‌ కమిటీల సెక్యూరిటీగార్డులు ప్రభుత్వానికి విజ్ఞప్తిచేశారు.

హైదరాబాద్‌, మార్చి 12(నమస్తే తెలంగాణ) : ఐఎఫ్‌ఎంఎస్‌ పోర్టల్‌లో తమ వివరాల నమోదులో సాంకేతిక లోపాలను సరిచేసి సకాలంలో వేతనాలు విడుదలయ్యేలా చర్యలు తీసుకోవాలని మారెట్‌ కమిటీల సెక్యూరిటీగార్డులు ప్రభుత్వానికి విజ్ఞప్తిచేశారు. ఈ మేరకు గురువారం వ్యవసాయశాఖ కార్యదర్శి సురేంద్రమోహన్‌ను కలిసిన మారెట్‌ కమిటీల సెక్యూరిటీగార్డుల యూనియన్‌ (సీఐటీయూ)రాష్ట్ర అధ్యక్షుడు తుమ్మల సాంబ య్య, ప్రధాన కార్యదర్శి యాటల సోమన్న వినతిపత్రం అందజేశారు. పోర్టల్‌ తప్పిదాలతో 1,200 మందికి 4 నెలలుగా వేతనాలు అందడంలేదని ఆవేదన వ్యక్తంచేశారు.

యాసంగి సాగు 79 లక్షల ఎకరాలు

హైదరాబాద్‌, మార్చి 12(నమస్తే తెలంగాణ) : యాసంగిలో అన్ని పంటలు కలిపి 79.33 లక్షల ఎకరాల్లో సాగైనట్టు వ్యవసాయశాఖ వెల్లడించింది. ఈ సీజన్‌లోనూ వరి సాగు హవా కొనసాగింది. 58.69 లక్షల ఎకరాల్లో వరి, 11.70 ఎకరాల్లో మక్కజొన్న సాగైంది. గతంతో పోల్చితే వరి, మక్కజొన్న, జొన్న సాగు పెరుగగా.. శనగ, వేరుశనగ, పెసర, మినుము సాగు తగ్గింది. నిరుడు శనగ 2.20 లక్షలు, ఈ సీజన్‌లో 1.91 లక్షల ఎకరాల్లో, వేరుశనగ నిరుడు 2.4 లక్షలు, ఈ సీజన్‌లో 1.97 లక్షల ఎకరాల్లో మాత్రమే సాగైంది.