మావోయిస్టు కీలక నేత అడెల్లు ఎన్‌కౌంటర్‌

మావోయిస్టులకు మరో గట్టి ఎదురుదెబ్బ తగిలింది. పార్టీ సీనియర్‌ నాయకుడు సుధాకర్‌ మరణించిన 24 గంటల వ్యవధిలోనే మరో కీలక నేత ఎన్‌కౌంటర్‌లో మృతిచెందారు. ఛత్తీస్‌గఢ్‌ రాష్ట్రం బీజాపూర్‌ జిల్లాలో చోటుచేసుకున్న ఎన్‌కౌంటర్‌లో తెలంగాణ రాష్ట్ర కమిటీ సభ్యుడు, కుమ్రంభీం-మంచిర్యాల డివిజన్‌ కమిటీ సభ్యుడు మైలారపు ఆడెళ్లు అలియాస్‌ భాస్కర్‌ ప్రాణాలు కోల్పోయారు.

• ఛత్తీస్‌గఢ్‌ రాష్ట్రం బీజాపూర్‌ జిల్లాలో ఘటన
• మృతుడు తెలంగాణ రాష్ట్ర కమిటీ సభ్యుడు
• ఆయనపై రెండు రాష్ర్టాల్లో 45 లక్షల రివార్డు
• భాస్కర్‌ స్వగ్రామం ఆదిలాబాద్‌ జిల్లా బోథ్‌

కొత్తగూడెం ప్రగతి మైదాన్‌, జూన్‌ 6: మావోయిస్టులకు మరో గట్టి ఎదురుదెబ్బ తగిలింది. పార్టీ సీనియర్‌ నాయకుడు సుధాకర్‌ మరణించిన 24 గంటల వ్యవధిలోనే మరో కీలక నేత ఎన్‌కౌంటర్‌లో మృతిచెందారు. ఛత్తీస్‌గఢ్‌ రాష్ట్రం బీజాపూర్‌ జిల్లాలో చోటుచేసుకున్న ఎన్‌కౌంటర్‌లో తెలంగాణ రాష్ట్ర కమిటీ సభ్యుడు, కుమ్రంభీం-మంచిర్యాల డివిజన్‌ కమిటీ సభ్యుడు మైలారపు ఆడెళ్లు అలియాస్‌ భాస్కర్‌ ప్రాణాలు కోల్పోయారు. బీజాపూర్‌ జిల్లా నేషనల్‌ పార్క్‌ అడవుల్లో మావోయిస్టులు ఉన్నారన్న విశ్వసనీయ సమాచారం మేరకు డీఆర్‌జీ భద్రతా దళాలు సెర్చింగ్‌ ఆపరేషన్‌ నిర్వహించాయి. ఈ క్రమంలో మావోయిస్టులు తారసపడి జవాన్లపైకి కాల్పులు జరపడంతో వెంటనే అప్రమత్తమైన జవాన్లు ఎదురుకాల్పులకు దిగారు.

దీంతో ఇరువర్గాల మధ్య పలుమార్లు ఎదురుకాల్పులు చోటు చేసుకున్నాయి. జవాన్ల ధాటికి తాళలేక మావోయిస్టులు అక్కడి నుంచి తప్పించుకున్నారు. తర్వాత భద్రతా దళాలు ఆ ప్రాంతాన్ని తమ ఆధీనంలోకి తీసుకుని గాలింపు చర్యలు చేపట్టాయి. ఘటనా స్థలం నుంచి భాస్కర్‌ మృతదేహంతోపాటు ఒక ఏకే-47, ఇతర ఆయుధ, వస్తు సామగ్రిని జవాన్లు స్వాధీనం చేసుకున్నారు. భాస్కర్‌పై తెలంగాణ రాష్ట్ర ప్రభుత్వం రూ.20 లక్షలు, ఛత్తీస్‌గఢ్‌ ప్రభుత్వం రూ.25 లక్షల రివార్డు ప్రకటించింది.