నిర్మల్‌లో జనసునామీ దద్దరిల్లిన రైతుగర్జన సభ
బీఆర్‌ఎస్‌ రైతుగర్జన సభతో నిర్మల్‌లోని ఎన్టీఆర్‌ మినీ స్టేడియం దద్దరిల్లింది. పార్టీ వర్కింగ్‌ ప్రెసిడెంట్‌ కేటీఆర్‌ ముఖ్య అతిథిగా వస్తారని తెలిసి, సాయంత్రం 4గంటలకే జనం సభా ప్రాంగణానికి బారులుదీరడంతో స్టేడియం నలుమూలలా ఇసుకేస్తే రాలనంత జనంతో నిండిపోయింది. సభ మొదలయ్యేటప్పటికే గులాబీ జనసునామీ కనిపించింది. కేటీఆర్‌ సభా ప్రాంగణానికి చేరుకున్నది మొదలు తిరిగివెళ్లే వరకు ఆ ప్రాంతమంతా శివమూగింది.
- కిక్కిరిసిన నిర్మల్‌ ఎన్టీఆర్‌ మినీస్టేడియం
- ఎటుచూసినా ఇసుకేస్తే రాలనంత జనం
- గులాబీమయమైన పట్టణ పరిసరాలు
- కేటీఆర్‌ ప్రసంగంతో అందరిలో ఉత్సాహం
- సర్కార్‌ తీరుపై కదంతొక్కిన రైతాంగం
మంచిర్యాల, నవంబర్‌ 11(నమస్తే తెలంగాణ ప్రతినిధి) : బీఆర్‌ఎస్‌ రైతుగర్జన సభతో నిర్మల్‌లోని ఎన్టీఆర్‌ మినీ స్టేడియం దద్దరిల్లింది. పార్టీ వర్కింగ్‌ ప్రెసిడెంట్‌ కేటీఆర్‌ ముఖ్య అతిథిగా వస్తారని తెలిసి, సాయంత్రం 4గంటలకే జనం సభా ప్రాంగణానికి బారులుదీరడంతో స్టేడియం నలుమూలలా ఇసుకేస్తే రాలనంత జనంతో నిండిపోయింది. సభ మొదలయ్యేటప్పటికే గులాబీ జనసునామీ కనిపించింది. కేటీఆర్‌ సభా ప్రాంగణానికి చేరుకున్నది మొదలు తిరిగివెళ్లే వరకు ఆ ప్రాంతమంతా శివమూగింది.
‘ఇది కాలం తెచ్చిన కరువు కాదు.. కాంగ్రెస్‌ తెచ్చిన కరువు’ అంటూ కేటీఆర్‌ చేసిన ప్రకటనకు నిర్మల్‌ జిల్లా రైతులు, యువత ముక్తకంఠంతో మద్దతు తెలిపారు. తన ప్రసంగంలో కేటీఆర్‌ అడిగిన ప్రశ్నలకు సభకు వచ్చిన జనాలు దిక్కులు పిక్కటిల్లేలా సమాధానాలు ఇచ్చారు. ‘పదేండ్ల కేసీఆర్‌ పాలనలో రైతుబంధు ఇచ్చింది వాస్తవం కాదా? అని కేటీఆర్‌ అడిగినప్పుడు సభకు వచ్చిన జనం వాస్తవమే అంటూ జైకొట్టారు. వ్యవసాయానికి 24గంటల కరెంట్‌ ఇచ్చింది వాస్తమా కాదా?, పొలం దగ్గరికే యూరియా బస్తాలు పంపింది.. రైతు బీమా ఇచ్చింది, రైతులు పండించిన ప్రతి గింజనూ కొన్నది, చెరువులను బాగుచేసింది వాస్తవమా కాదా? అని కేటీఆర్‌ వేసిన ప్రశ్నలకు వాస్తవమే అంటూ జనం నుంచి సమాధానం వచ్చింది.
ఇదే సమయంలో ‘రేవంత్‌రెడ్డి రూ.2లక్షల రుణమాఫీ చేసిండా అని కేటీఆర్‌ అడుగగా రాలేదంటూ రైతులు బదులిచ్చారు. రూ.15వేల రైతుబంధు, పంటకు రూ.500 బోనస్‌ ఇచ్చారా అంటే ఇవ్వలేదంటూ చెప్పారు. ఇవాళ కాంగ్రెస్‌ పాలనలో కనీసం రైతులు పండించే పంటలు కొనే పరిస్థితి లేదు అని కేటీఆర్‌ చెప్పగానే సభకు వచ్చిన రైతులు.. రైతులం ఆగమైపోయినం సారూ.. కాంగ్రెస్‌ పార్టీ పని అయిపోయింది. కేసీఆర్‌ బాపు తిరిగి రావాలె.. ఆయన ఎక్కడున్నా సల్లంగుండాలె అంటూ ఆవేదన వెళ్లగక్కడం కనిపించింది.
రైతులకు భరోసా.. కాంగ్రెస్‌ను నిలదీత
రైతుగర్జన సభ ద్వారా ఉమ్మడి ఆదిలాబాద్‌ జిల్లా రైతులకు కేటీఆర్‌ ధైర్యం చెప్పారు. బీఆర్‌ఎస్‌ అమలుచేసిన పథకాల గురించి వివరిస్తూనే కాంగ్రెస్‌ ప్రభుత్వాన్ని ఎండగట్టారు. ఈ సందర్భంగా రేవంత్‌రెడ్డి ఇచ్చిన హామీలపై సభలో ప్రదర్శించిన వీడియో ఆకట్టుకున్నది. వీడియో చూపిస్తూ కాంగ్రెస్‌ను నిలదీస్తూ సాగిన ప్రసంగం రైతులకు ఆలోచనలో పడేసింది. మళ్లీ కేసీఆర్‌ సర్కార్‌ వస్తుందని, రైతులు ధైర్యంగా ఉండాలంటూ ఆయన చేసిన ప్రకటన రైతుల్లో భరోసా నింపింది.
గులాబీమయమైన నిర్మల్‌
రైతుగర్జన సభతో నిర్మల్‌ పట్టణం గులాబీమయమైంది. జిల్లాలోకి ప్రవేశ మార్గం నుంచి సభా ప్రాంగణం వరకు భారీగా ఫ్లెక్సీలు, గులాబీ జెండాలు ఏర్పాటుచేయగా, అందరి దృష్టినీ ఆకర్షించింది. గతంలో ఏ పార్టీ కూడా ఈ స్థాయిలో ఏర్పాట్లు చేయలేదని, ఈ సభకు వచ్చినంత జనం ఏ మీటింగ్‌కూ రాలేదని మాట్లాడుకోవడం వినిపించింది. రైతుగర్జన సభతో నిర్మల్‌ జిల్లా బీఆర్‌ఎస్‌ పార్టీలో కొత్త జోష్‌ నింపింది. నిర్మల్‌ జిల్లా నలుమూలల నుంచి ప్రైవేట్‌ వాహనాల్లో భారీగా రైతులు, యువత, కార్యకర్తలు, నాయకులు సభకు తరలివచ్చారు.
ఎక్కడ చూసినా రోడ్లపై గులాబీ దండే కనిపించింది. సభ పూర్తయ్యాక తిరిగి వెళ్లేప్పుడు వాహనాలతో రోడ్లన్నీ బారులు తీరి కనిపించాయి. కేటీఆర్‌ పర్యటనకు నిర్మల్‌ జిల్లా ప్రజానీకం బ్రహ్మరథం పట్టారు. రైతు గర్జనలో కళాకారులు పాడిన పాటలకు రైతుల నుంచి అద్భుత స్పందన వచ్చింది. దాదాపు సభకు వచ్చిన వేలాది మంది పాటలకు డ్యాన్సులు చేస్తూ, గులాబీ జెండాలు ఊపుతూ, కేటీఆర్‌పై అభిమానాన్ని చాటే ప్లకార్డులు ప్రదర్శిస్తూ కనిపించారు. కుర్చీలు ఎక్కి ఊపుతూ, కేటీఆర్‌కు అభివాదం చేస్తూ జోష్‌లో మునిగిపోయారు.
ఇందూర్‌ గడ్డపై కేటీఆర్‌కు ఘనస్వాగతం
నమస్తే యంత్రాంగం, నవంబర్‌ 11: బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌కు ఉమ్మడి నిజామాబాద్‌ జిల్లాలో పార్టీ శ్రేణులు బుధవారం ఘనంగా స్వాగతం పలికాయి. నిర్మల్‌ జిల్లాలో రైతు గర్జన సభకు వెళ్తున్న కేటీఆర్‌కు అడుగడుగునా సాదర స్వాగతం లభించింది. కేటీఆర్‌ను కలిసేందుకు పార్టీ కార్యకర్తలు, అభిమానులు భారీగా తరలివచ్చారు. పుష్పగుచ్ఛాలు అందజేసి స్వాగతం పలికేందుకు పోటీపడ్డారు. సీఎం, సీఎం అంటూ నినాదాలతో హోరెత్తించారు.
కాంగ్రెస్‌ సర్కార్‌కు గుణపాఠం తప్పదు
కేసీఆర్‌ పాలనలో రాజుల్లా బతికిన రైతులను ప్రస్తుత కాంగ్రెస్‌ ప్రభుత్వం అగాధంలోకి నెట్టింది. ఎరువులు, విత్తనాలు అందించడంలో, నాణ్యమైన విద్యుత్తు సరఫరా చేయడంలో కాంగ్రెస్‌ ప్రభుత్వం పూర్తిగా విఫలమైంది. కేసీఆర్‌కు పేరు వస్తుందనే ఉద్దేశంతో కాళేశ్వరం పంపులను వినియోగించకుండా నీటిని వృథా చేసింది. ఎన్నికల ముందు ఇచ్చిన హామీలను కాంగ్రెస్‌ అమలు చేయకుండా రైతుల కన్నీళ్లకు కారణమవుతున్న ప్రభుత్వానికి ప్రజలే గుణపాఠం చెప్తారు. రైతుల హక్కుల సాధన, అన్నదాతల సమస్యలపై కాంగ్రెస్‌ ప్రభుత్వాన్ని నిలదీసేందుకే రైతు గర్జన సభ నిర్వహించాం. కేసీఆర్‌ హయాంలో అమలైన రైతు సంక్షేమ పథకాలు, సాగునీటి సదుపాయాలు మళ్లీ రావాలంటే బీఆర్‌ఎస్‌ అధికారంలోకి రావాలి.
– అనిల్‌ జాదవ్‌, బోథ్‌ ఎమ్మెల్యే
కేసీఆర్‌ హయాంలోనే నిర్మల్‌ జిల్లా అభివృద్ధి
కాళేశ్వరం ప్రాజెక్టు ద్వారా శ్రీరాంసాగర్‌ ప్రాజెక్టుకు నీటిని ఎత్తిపోసి నిర్మల్‌ జిల్లా రైతులకు సాగునీరు అందించాలన్నది కేసీఆర్‌ ఆశయం. రైతులకు సాగునీటి కష్టాలు తొలగించేందుకు కేసీఆర్‌ ప్రభుత్వం అనేక ప్రాజెక్టులు, పథకాలకు రూపకల్పన చేసింది. కేసీఆర్‌ హయాంలో నిర్మల్‌ జిల్లా ఏర్పాటు కావడంతో కలెక్టరేట్‌, ఎస్పీ కార్యాలయాలతోపాటు మెడికల్‌, నర్సింగ్‌ కళాశాలలు అందుబాటులోకి వచ్చి జిల్లా అభివృద్ధికి కొత్త బాటలు పడ్డాయి. పదవులు అనుభవించి పార్టీ మారిన నాయకులకు ప్రజలే తగిన సమాధానం చెబుతారు.
-రామ్‌కిషన్‌రెడ్డి, బీఆర్‌ఎస్‌ నిర్మల్‌ నియోజకవర్గ ఇన్‌చార్జి
మళ్లీ కేసీఆర్‌ వస్తేనే సమస్యల పరిష్కారం
కాలేజీ నుంచి కాలిఫోర్నియా వరకు, అక్కడి నుంచి ఖానాపూర్‌ వరకు నా 30 ఏండ్ల ప్రస్థానంలో బీఆర్‌ఎస్‌ నాయకత్వం అండగా నిలిచింది. కేసీఆర్‌, కేటీఆర్‌ నాపై నమ్మకంతో ప్రజాసేవకు అవకాశం కల్పించారు. ఉమ్మడి ఆదిలాబాద్‌ జిల్లాకు ఆరోసారి కేటీఆర్‌ వచ్చారు. రైతులకు మద్దతు ధర లభించని సమయంలో వారి పక్షాన నిలిచి పోరాడారు. రాష్ట్రంలో రైతులు, ప్రజలు ఎదుర్కొంటున్న సమస్యలకు పరిష్కారం లభించాలంటే కేసీఆర్‌ను మరోసారి ముఖ్యమంత్రిగా చేసుకోవాలి.
-భూక్యా జాన్సన్‌ నాయక్‌, బీఆర్‌ఎస్‌ ఖానాపూర్‌ నియోజకవర్గ ఇన్‌చార్జి
మూడు సార్లు రైతుబంధు ఎగ్గొట్టిండు..
కేసీఆర్‌ పెట్టుబడి కోసం రైతుబంధు తీసుకొచ్చిండు. యేటా పంట పంటకూ రైతుల ఖాతాల్లో పైసలు జమయ్యేవి. రైతు చనిపోతే రైతు బీమా కింద పది రోజుల్లో వచ్చేవి. ఇప్పుడున్న ముఖ్యమంత్రి రేవంత్‌రెడ్డి ఇప్పటికి మూడుసార్లు రైతుబంధు ఎగ్గొట్టిండు. కేసీఆర్‌ సర్కార్‌ ఉన్నప్పుడే అన్ని విధాలా బాగుండె.
– తోకల చందు, రైతు, సిరికొండ, ఆదిలాబాద్‌ జిల్లా
కాంగ్రెస్‌ పాలనలో అన్ని కష్టాలే
కాంగ్రెస్‌ ప్రభుత్వం వచ్చినప్పటి నుంచి నాకు రైతుబంధు జమ కాలే. రైతులకు అన్నీ కష్టాలే. సకాలంలో ఎరువులు, విత్తనాలు అందక అరిగోస పడుతున్నం. అప్పులు చేసి వ్యవసాయం చేస్తున్నా పంటలు పండక, పెట్టుబడులు ఎల్లక ఇబ్బందులు పడుతున్నం. మళ్లీ కేసీఆర్‌ పాలన వస్తేనే రైతులు బాగుపడుతరు.
– పవార్‌ పండిట్‌, రైతు, బామ్ని తండా, తానూర్‌ మండలం నిర్మల్‌ జిల్లా
తులం బంగారం ఇవ్వలే.. లోన్లు రాలే
కల్యాణలక్ష్మీ పథకం కింద ఇస్తామన్న తులం బంగారం ఇవ్వలేదు. మత్స్యకారులకు లోన్లు లేవు. ఆరు గ్యారెంటీలు లేవు. కరెంటు బరాబర్‌ రావడం లేదు. ఎకరానికి యూరియా రెండు సంచులే ఇస్తే రైతులు ఏం గావాలె. కేసీఆర్‌ సీఎంగా ఉన్నప్పుడు మత్స్యకారులకు వలలు, ద్విచక్రవాహనాలు ఇచ్చిండు. మళ్లీ ఆ సారే రావాలె.
– గాడి గంగారాం, రైతు, టెంబుర్ని, నర్సాపూర్‌ (జీ) మండలం, నిర్మల్‌ జిల్లా
కాంగ్రెస్‌ ప్రభుత్వంలో దళారుల దోపిడీ
కాంగ్రెస్‌ ప్రభుత్వంలో దళారుల దోపిడీ పెరిగింది. పంటలు అమ్ముకొనేందుకు కష్టాలు పడుతున్నం. సోయా, పత్తి పంటలకు సరైన ధర దక్కడం లేదు. కేసీఆర్‌ పాలనలో ఇలాంటి పరిస్థితి లేకుండె. ప్రభుత్వం నిర్ణయించిన ధరకే పంటలు విక్రయించేవాళ్లం.
– దార్క గోవింద్‌, రైతు, దర్బాతండా, ఇచ్చోడ
Read Today's Latest Telangana News in Telugu and Telugu News
- Follow Us :
-
