కేటీఆర్‌ పంచ్‌లు

ద్రవ్య వినిమయ బిల్లుపై చర్చ సందర్భంగా బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ పదునైన మాటలు, గుండెను తాకే వాగ్బాణాలను ప్రభుత్వంపై ఎక్కుపెట్టారు.

హైదరాబాద్‌, జూలై 31 (నమస్తే తెలంగాణ): ద్రవ్య వినిమయ బిల్లుపై చర్చ సందర్భంగా బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ పదునైన మాటలు, గుండెను తాకే వాగ్బాణాలను ప్రభుత్వంపై ఎక్కుపెట్టారు. వాటిలో కొన్ని..

• ఉద్యమాలతో ఉదయించిన తెలంగాణ.. ఉజ్వల తెలంగాణగా అవతరించింది
• శుష్కప్రియాలు, శూన్య హస్తాలు.. గ్యారెంటీలకు టాటా.. లంకెబందెల వేట.
• డిక్లరేషన్లు డీలా.. డైవర్షన్ల మేలా..
• హమీపత్రాలకు పాతర.. శ్వేతపత్రాల జాతర.
• నిరుద్యోగుల మీద నిర్బంధాలు.. జర్నలిస్టుల మీద దౌర్జన్యాలు.. విమర్శిస్తే కేసులు, ప్రశ్నిస్తే దాడులు, నేతన్నల ఆత్మహత్యలు, ఆటో అన్నల బలవన్మరాలు.
• ఓట్లకు ముందు అభయహస్తం.. ఓట్లు పడ్డాక శూన్య హస్తం
• మ్యానిఫెస్టోలో అరచేతిలో స్వర్గం.. బడ్జెట్‌లో మోచేతికి బెల్లం
• మూడు తిట్లు.. ఆరు అబద్ధాలు కాంగ్రెస్‌ బడ్జెట్‌లో కనిపిస్తున్నాయి
• సిరిగళ్ల తెలంగాణను, లక్ష్మీకళ గల తెలంగాణను దివాలా తీసిందని చెప్పడం భావ్యం కాదు
• బుట్టలో ఓట్లు వేయించుకొని.. గెలిచాక బుట్టదాఖలు చేశారు.
• దళితులకు ద్రోహం, మహిళలకు మోసం, నిరుద్యోగులకు నయవంచన, కాంగ్రెస్‌ ఇచ్చిన హామీలు కొండంత, గ్యారెంటీ కార్డులు, డిక్లరేషన్‌లు చాంతాడంతా. కానీ బడ్జెట్‌లో కేటాయింపులు గోరంతనే..
• అసెంబ్లీలో నాలుగు గోడల మధ్య కూర్చొని నాలుగు కోట్ల మందిని మోసం చేస్తే కచ్చితంగా నిలదీస్తాం, ప్రశ్నిస్తాం.
• అన్నవస్ర్తాల కోసం పోతే.. ఉన్న వస్ర్తాలు పోయినట్టుంది.‘ఉండబట్టలేక ఓటేస్తే.. ఉన్నబట్ట కూడా లాక్కున్నట్టుంది.
• జాబుల జాతర పెట్టిస్తారనుకుంటే అబద్ధాల జాతర నడుస్తున్నది.
• ఇంట్లో ఉన్న క్యాలెండర్‌ మరో నాలుగు నెలలైతే మారిపోతుంది కానీ, కాంగ్రెస్‌ జాబ్‌ క్యాలెండర్‌కు దిక్కులేదు.
• కల్లాల్లో ధాన్యం లేదు.. రైతు కండ్లలో ధైర్యం లేదు
• నాట్లు పడేటప్పుడు వచ్చే రైతుబంధును.. ఓట్లు పడేటప్పుడు వేశారు
• మహాలక్ష్ములకు మోసం, తులం బంగారం తూచ్‌ అయిపోయింది
• అమ్మాయిలకు స్కూటీలు లేవుగాని వారిపై లాఠీలు ప్రయోగిస్తున్నరు
• సాంచాల మీద సప్పుళ్లు ఆగిపోయె, మగ్గాల మీద మరణమృదంగం మోగె.