Visit:
హైదరాబాద్‌, నవంబర్‌ 30 (నమస్తే తెలంగాణ): తెలంగాణలోని కాంగ్రెస్‌ సర్కారు హిల్ట్‌ పాలసీ పేరిట రూ.5 లక్షల కోట్ల కుంభకోణానికి పాల్పడుతుంటే ఆ పార్టీ అగ్రనేత రాహుల్‌గాంధీ మౌనమెందుకు వహిస్తున్నారు? స్పందించకపోవడంలోని ఆంతర్యమేమిటి? అని బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ ప్రశ్నించారు. మౌనం ఆమోదానికి సంకేతమా అని నిలదీశారు. రాహుల్‌గాంధీకి కూడా ఈ రూ.5 లక్షల కోట్ల అవినీతిలో భాగస్వామ్యం ఉన్నట్టేనని అనుకోవాల్సి వస్తుందని పేర్కొన్నారు. ఈ మేరకు కేటీఆర్‌ ఆదివారం రాహుల్‌గాంధీకి బహిరంగ లేఖ రాశారు. హిల్ట్‌ పాలసీలోని లోపాలు, లక్షల కోట్లను కొల్లగొట్టేందుకు తెలంగాణ సర్కారు చేస్తున్న యత్నాలను రాహుల్‌ దృష్టికి తీసుకెళ్లారు.
సీఎం రేవంత్‌రెడ్డి ఇటీవల ప్రవేశపెట్టిన హైదరాబాద్‌ ఇండస్ట్రియల్‌ ల్యాండ్‌ ట్రాన్స్‌ఫర్మేషన్‌ (హిల్ట్‌) పాలసీ స్వతంత్ర భారతదేశంలో అతిపెద్ద కుంభకోణాల్లో ఒకటని కేటీఆర్‌ అభివర్ణించారు. అత్యంత అవినీతి, అక్రమాలతో కూడుకున్న ఈ విధానం నాలుగుకోట్ల తెలంగాణ ప్రజల్లో అనేక అనుమానాలు రేకెత్తిస్తున్నదని, తీవ్ర ఆందోళన కలిగిస్తున్నదని పేర్కొన్నారు. రాష్ట్రంలో జరుగుతున్న అక్రమ భూ వ్యవహారంపై కాంగ్రెస్‌ అధిష్ఠానానికి తెలుసా? లేక తెలిసినా కావాలనే మౌనంగా ఉన్నదా? అని తెలంగాణ ప్రజలు ప్రశ్నిస్తున్నారని తెలిపారు. ఈ అవినీతి, అక్రమ పాలసీ కారణంగా అత్యంత విలువైన ప్రభుత్వ భూములను ప్రైవేట్‌ సంస్థలు మార్కెట్‌ విలువలో నామమాత్రపు ధరకే సొంతం చేసుకొనే ప్రమాదం ఉన్నదని ఆందోళన వ్యక్తంచేశారు. వెరసి తెలంగాణకు రూ.5 లక్షల కోట్ల నష్టం వాటిల్లనున్నదని హెచ్చరించారు.
హైదరాబాద్‌ నగరంలోని బాలానగర్‌, జీడిమెట్ల, సనత్‌నగర్‌, ఉప్పల్‌, మల్లాపూర్‌, రామచంద్రాపురం, హయత్‌నగర్‌ లాంటి కీలక ఇండస్ట్రియల్‌ క్లస్టర్లలో గత ప్రభుత్వాలు 9,300 ఎకరాల భూమిని పారిశ్రామిక అవసరాలకు కేటాయించాయని కేటీఆర్‌ వివరించారు. ఈ భూములను మొదట పారిశ్రామిక వృద్ధి, ఉపాధి కల్పన, దీర్ఘకాలిక ఆర్థికాభివృద్ధిని ప్రోత్సహించే లక్ష్యంతో రాయితీ ధరలకు కేటాయించారని గుర్తుచేశారు. అయితే ప్రస్తుత రేవంత్‌రెడ్డి సర్కారు హిల్ట్‌ పాలసీ కింద ఈ భూములను వాణిజ్య లేదా నివాస జోన్లుగా మార్చుకొనేందుకు ఎస్‌ఆర్వో విలువలో కేవలం 30 శాతం మాత్రమే తీసుకొని కట్టబెడుతున్నదని ఆరోపించారు. ప్రస్తుతం ఆయా చోట్ల మార్కెట్‌ ధరలు ఎక్కువగా ఉన్నాయని తెలిపారు. కానీ ప్రభుత్వం మాత్రం ప్రజలకు దక్కాల్సిన ఆస్తులను అగ్గువకు ప్రైవేట్‌ వ్యక్తులకు అప్పగించేందుకు కుట్రలు చేస్తున్నదని ఆరోపించారు. సుమారు రూ.5 లక్షల కోట్ల విలువైన భూములను కారుచౌకగా కట్టబెట్టే కుతంత్రానికి తెరలేపిందని ధ్వజమెత్తారు.
ఈ పాలసీ ముసుగులో పెద్దమొత్తంలో నగదు దండుకొనేందుకే సర్కారు తొందరపాటు చర్యలకు దిగుతున్నదని కేటీఆర్‌ విమర్శించారు. వేలాది కోట్ల విలువైన ఆస్తుల మార్పిడికి 45 రోజుల్లో ఫాస్ట్‌ట్రాక్‌ ఆమోదాలు ఇవ్వాలని నిర్ణయిచండంలోని మతలబేమిటని సందేహం వ్యక్తం చేశారు. హడావుడిగా చేసే ఈ ప్రక్రియలో పారదర్శకత లేదని, కేవలం కోట్లు దండుకొనేందుకే విలువైన స్థలాలను ప్రైవేట్‌ వ్యక్తులకు అప్పగిస్తున్నారని ఆరోపించారు. ఈ తొందరపాటు చర్యలు పాలసీ ముసుగులో దాగి ఉన్న అవినీతిని బట్టబయలు చేస్తున్నదని, అనేక ప్రశ్నలను లేవనెత్తుతున్నదని పేర్కొన్నారు.
కాలుష్యకారక పరిశ్రమలను ఔటర్‌ రింగ్‌రోడ్డు (ఓఆర్‌ఆర్‌) వెలుపలికి తరలించాలనే నెపంతో హిల్ట్‌ పాలసీ తెచ్చి అడ్డదారిలో లక్షల కోట్ల తెలంగాణ సంపదను దోచుకొనేందుకు కాంగ్రెస్‌ సర్కారు పక్కా ప్లాన్‌ వేసిందని కేటీఆర్‌ ఆరోపించారు. ‘కాలుష్యకారక పరిశ్రమల తరలింపే ప్రధాన లక్ష్యమైతే, మొత్తం పరిశ్రమలన్నింటికీ ఒకే పాలసీగా నిర్ణయించడం లేదేందుకు? స్వచ్ఛందంగా నచ్చిన వారు మాత్రమే దరఖాస్తు చేయాలనడం, ఒక్కో దరఖాస్తు వారీగా ప్రత్యేకంగా ప్రభుత్వ భూములుగా బదలాయింపునకు ఆమోదం ఇవ్వాలని ప్రభుత్వం నిర్ణయించడం.. ప్రస్తుత పరిశ్రమల తరలింపునకు నిర్దేశిత గడువు విధించకపోవడం.. అసలు పరిశ్రమలు తరలివెళ్తాయా.. లేదా అనే అంశాన్ని స్పష్టంగా ప్రకటించకపోవడంలాంటి లోపభూయిష్టమైన విధానాలు చూస్తుంటే దోపిడీ చేయాలనే ఉద్దేశ్యం స్పష్టంగా కనిపిస్తున్నది’ అని పేర్కొన్నారు.
అలాగే తరలించాలనుకొనే పరిశ్రమలకు ప్రత్నామ్నాయ స్థలాలను ఈ విధానం గుర్తించలేదనే విషయాన్ని లేఖలో ప్రస్తావించారు. హిల్ట్‌ విధానం కారణంగా నగరంలో పారిశ్రామిక అభివృద్ధికి బదులు, ఇండస్ట్రియల్‌ యూనిట్ల స్థానంలో ఆకాశహర్మ్యాలు, వాణిజ్య సముదాయాలు వచ్చే అవకాశం ఉంటుందని, తద్వారా లక్షలాది మంది యువతకు ఉపాధి కల్పించాలనే లక్ష్యం దెబ్బతింటుందని హెచ్చరించారు.
రేవంత్‌ సర్కారు తెచ్చిన హిల్ట్‌ పాలసీ కొద్దిమంది కాంగ్రెస్‌ నేతలు, పలుకుబడి గలిగిన రియల్‌ ఎస్టేట్‌ గ్రూపులు, ముఖ్యమంత్రికి సన్నిహితంగా ఉన్న వ్యక్తులు, రియల్‌ఎస్టేట్‌ వ్యాపారులు, వారి కుటుంబసభ్యులకు లబ్ధి చేకూర్చుతుందని కేటీఆర్‌ ఆరోపించారు. వీరందరూ రాష్ట్ర రాజధాని నడిబొడ్డున గల అత్యంత విలువైన భూములను నామమాత్రపు ధరలకు కారుచౌకగా కొట్టేసేందుకే హిల్ట్‌ పాలసీని రూపొందించారని ధ్వజమెత్తారు. అధికార పార్టీ పెద్దల అవినీతి కోసం, డబ్బు కట్టల కోసం తీసుకువచ్చిన ఈ విధానం ముమ్మాటికీ తెలంగాణ ప్రజలకు ద్రోహం చేయడమేనని నిప్పులు చెరిగారు.
హైదరాబాద్‌ భూములను కాపాడేందుకు గత బీఆర్‌ఎస్‌ సర్కారు కట్టుదిట్టమైన చర్యలు తీసుకున్నదని కేటీఆర్‌ పేర్కొన్నారు. గతంలో భూ వినియోగ మార్పిడికి పారిశ్రామిక యూనిట్లు ఎస్‌ఆర్వో విలువలో 100 నుంచి 200 శాతం చెల్లించాలని నిర్ణయించి అత్యంత కఠినమైన నిబంధనలు అమలుచేసిందని గుర్తుచేశారు. తద్వారా రాష్ట్ర ఖజానాకు మంచి ఆదాయం సమకూరేలా చర్యలు చేపట్టిందని పేర్కొన్నారు. కానీ ప్రస్తుత సీఎం రేవంత్‌రెడ్డి.. కఠిన నిబంధనలను సడలించి తెలంగాణను కాంగ్రెస్‌కు, ఆయన అనుచరులు, పార్టీ నేతల అనుయాయులకు ఏటీఎంగా మార్చేశారని మండిపడ్డారు. తద్వారా ప్రజా సంపదను దోచుకోవడానికి ఈ విధానాన్ని అమల్లోకి తీసుకువచ్చారని విమర్శించారు.
తెలంగాణలో జరుగుతున్న భూ కుంభకోణం గురించి తెలియకుంటే ఇప్పటికైనా తెలుసుకోవాలని రాహుల్‌గాంధీకి కేటీఆర్‌ విజ్ఞప్తిచేశారు. మౌనం వీడి రాష్ట్రంలోని కాంగ్రెస్‌ నేతల దోపిడీ, అక్రమాలకు అడ్డుకట్ట వేయాలని కోరారు. లేదంటే దేశచరిత్రలోనే అతిపెద్ద భారీ భూ కుంభకోణంలో రాహుల్‌గాంధీకి కూడా భాగస్వామ్యం ఉన్నదని తెలంగాణ ప్రజలు భావిస్తారని చెప్పారు. ఇప్పటికైనా స్పందించి కాంగ్రెస్‌ నేతల అక్రమాలను నిలువరించి తెలంగాణ ప్రజల ప్రయోజనాలను కాపాడాలని డిమాండ్‌ చేశారు.
కాంగ్రెస్‌ నేతల అవినీతి కోసం తెలంగాణ భవిష్యత్తును తాకట్టుపెడతామంటే ఒప్పుకునేది లేదని కేటీఆర్‌ తేల్చిచెప్పారు. అక్రమాలకు తెరలేపిన కాంగ్రెస్‌పై బీఆర్‌ఎస్‌ పోరాటం కొనసాగిస్తుందని స్పష్టంచేశారు. ‘నేను రాస్తున్న బహిరంగ లేఖపై రాహుల్‌ ఏ విధంగా స్పందిస్తారు..తెలంగాణ ప్రయోజనాలను కాపాడతారా..?లేకుంటే నాలుగుకోట్ల ప్రజల ఆస్తులు దోచుకుంటున్న మీ పార్టీ నేతలు, మీ ముఖ్యమంత్రి అనుచరులకు అండగా నిలబడతారా?’ అని సూటిగా ప్రశ్నించారు. తన లేఖపై రాహుల్‌ సమాధానం, స్పందన కోసం నాలుగుకోట్ల తెలంగాణ ప్రజలు ఎదురుచూస్తారనే విషయాన్ని విస్మరించవద్దని విజ్ఞప్తిచేశారు.
