Visit:
కేసీఆర్‌ సచ్చుడో..తెలంగాణ వచ్చుడో..కేసీఆర్‌ శవయాత్రనా? తెలంగాణ జైత్రయాత్రనా? అని ఒక బక్క పలుచని వ్యక్తి ఇచ్చిన సమరనాదం యావత్‌ జాతిని ఏకం చేసింది. ఆ 11 రోజులు పోరాట సముద్రం పోటెత్తి సునామీని సృష్టించింది. అగ్నిపర్వతం బద్ధలైనట్టు.. భూకంపం వచ్చినట్టు, పెను తుఫాను తీరం దాటినట్టు.. తెలంగాణ ఉద్యమ శిఖరంపై శిగమూగింది. మడి దున్నే రైతు..బడికెళ్లే బాలుడు..కార్ఖానాలో కార్మికుడు.. కార్యాలయంలో ఉద్యోగి..నల్లకోటు లాయర్‌..తెల్లకోటు డాక్టర్‌..కలంపట్టిన జర్నలిస్టు.. ఎన్నారైలు బరిగీసి కొట్లాడిన అపురూప ఘట్టమది. తరం మారుతున్నది. స్వరం మారుతున్నది. 30 ఏండ్లకోసారి కొత్త జనరేషన్‌ వస్తున్నది..ఉడుకు నెత్తురుతో ఉరకలెత్తే యువతరం ముందుకొస్తుంటది. నవతరం ఏడు తరాల కథను తెలుసుకోవాలి..అప్పుడే మన కథ ఎటుపోతుందో అర్థమవుతది.
-కేటీఆర్‌
హైదరాబాద్‌, నవంబర్‌ 29 (నమస్తే తెలంగాణ): తెలంగాణకు కథానాయకుడు కేసీఆర్‌ అయితే, ముమ్మాటికీ విలన్‌ కాంగ్రెస్‌ అని బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ ధ్వజమెత్తారు. ఉవ్వెత్తున ఎగిసిపడ్డ మలిదశ తెలంగాణ పోరులో కేసీఆర్‌ దీక్ష ఒక చారిత్రాత్మక ఘట్టమని, ప్రత్యేక రాష్ట్ర ఉద్యమ ప్రస్థానంలో 2009, నవంబర్‌ 29 ఒక ఉజ్వల దృశ్యమని, తెలంగాణ చరిత్రను మలుపు తిప్పిన అద్వితీయ సందర్భమని, నాలుగు కోట్ల ప్రజల స్వరాష్ట్ర లక్ష్యం సాకారమయ్యేందుకు తొలి అడుగు పడిన రోజు అని అభివర్ణించారు. ప్రాణాలకు తెగించి 11 రోజులు ఆమరణ దీక్షబూని తెలంగాణ చరిత్రను మలుపుతిప్పిన యోధుడు కేసీఆర్‌ అని, తెలంగాణ తల్లి బానిస సంకెళ్లను తెంపి నాలుగుకోట్ల జనుల ఆకాంక్షను నెరవేర్చిన వీరుడు అని కొనియాడారు. కేసీఆర్‌ అనే మూడక్షరాలే లేకుంటే తెలంగాణ లేదని స్పష్టంచేశారు. హైదరాబాద్‌ తెలంగాణ భవన్‌లో శనివారం మాజీ మంత్రి తలసాని శ్రీనివాస్‌ యాదవ్‌ ఆధ్వర్యంలో దీక్షాదివస్‌ను అట్టహాసంగా నిర్వహించారు. ఈ సందర్భంగా పెద్దసంఖ్యలో తరలివచ్చిన పార్టీ శ్రేణులను ఉద్దేశించి కేటీఆర్‌ భావోద్వేగంతో ప్రసంగించారు. తెలంగాణ ఉద్యమ ఘట్టాలను ప్రస్తావించారు. రాష్ట్రం కోసం ప్రాణాలర్పించిన యోధులను గుర్తు చేసుకున్నారు.
‘తరం మారుతున్నది. స్వరం మారుతున్నది. 30 ఏండ్లకోసారి కొత్త జనరేషన్‌ వస్తున్నది.. ఉడుకు నెత్తురుతో ఉరకలెత్తే యువతరం ముందుకొస్తుంటది. నవతరం ఏడు తరాల కథను తెలుసుకోవాలి.. అప్పుడే మన కథ ఎటుపోతున్నదో అర్థమవుతది’ అని కేటీఆర్‌ సూచించారు. ‘నువ్వు పుట్టిన మట్టి కథ.. నిన్ను పెంచిన జాతి కథ చదవకపోతే చదివిన చదువంతా వ్యర్థమే. రామాయణంలో హీరో శ్రీరాముడు..విలన్‌ రావణుడు..ఎన్నో యుగాలు మారినా సీతమ్మ తల్లి అపహరణ, రామరావణ యుద్ధం నేటి తరానికి తెలుసు. భారతంలో హీరోలు పాండవుల్లోని కృష్ణార్జునులు, విలన్లు కౌరవులు, మహాభారతం ద్వాపర యుగం నాటి గాథ.. వేల ఏండ్లు గడిచినా అరణ్యవాసం, కురుక్షేత్రం, పద్మవ్యూహం మనందరికీ తెలుసు.. ఇదే తరహాలో మన తెలంగాణకు సైతం మహోన్నత గతం..మహోజ్వల చరిత్ర..దోపిడీ, వివక్ష, కన్నీళ్లలో మగ్గిపోయిన వ్యథ..బానిస సంకెళ్ల చరిత ఉన్నది. కథా నాయకుడు ఉన్నడు..విలన్లు ఉన్నరు’ అంటూ వివరించారు.
‘తెలంగాణ పోరాట కథలోనూ కౌరవులు, సైంధవులు, రావణులు, మారీచులు ఉన్నరు. మనం చూడని స్వతంత్ర పోరాటంలో సిపాయిల తిరుగుబాటు, జలియన్‌ వాలాబాగ్‌, ఉప్పు సత్యాగ్రహం, సహాయ నిరాకరణ, క్విట్‌ ఇండియా లాంటి ఎన్నో ముఖ్య ఘట్టాలున్నట్టే తెలంగాణ పోరాట చరిత్రలోనూ అనేక ఘట్టాలున్నయి. తెలంగాణ చరిత్రను మలుపుతిప్పిన సమున్నత సందర్భం ఒకటున్నది. అదే కేసీఆర్‌ ఆమరణ దీక్ష. కేసీఆర్‌ సచ్చుడో..తెలంగాణ వచ్చుడో..కేసీఆర్‌ శవ యాత్రనా? తెలంగాణ జైత్రయాత్రనా? అని ఒక బక్క పలుచని వ్యక్తి ఇచ్చిన సమరనాదం యావత్‌ జాతిని ఏకం చేసింది’ అని గుర్తుచేశారు. ఆ పదకొండు రోజులు పోరాట సముద్రం పోటెత్తి సునామీని సృష్టించిందని, అగ్నిపర్వతం బద్ధలైనట్టు, భూకంపం వచ్చినట్టు, పెను తుఫాను తీరం దాటినట్టు తెలంగాణ ఉద్యమ శిఖరంపై శిగమూగిందని స్మరించుకున్నారు.
బక్క పలుచని యోధుడు ఉక్కు సంకల్పంతో దీక్షబూని మరణం అంచుల్లోకి పోతుంటే తెలంగాణ అగ్నిగుండమై భగభగ మండిందని కేటీఆర్‌ గుర్తుచేశారు. ఆ మంటల్లో శ్రీకాంతాచారి బలిదానం..కానిస్టేబుల్‌ కిష్టయ్య ప్రాణార్పణం..ప్రాణాలను పణంగా పెట్టిన మొండి పట్టుదలను చూసి పార్లమెంట్‌ ప్రకంపించిందని వివరించారు. ఢిల్లీ దిగిరావడంతో డిసెంబర్‌ 9న తెలంగాణకు అర్ధరాత్రి స్వాతంత్య్రం సిద్ధించిందని చెప్పారు. ‘హస్తినలో చిదంబరం చేసిన ప్రకటన విన్న తెలంగాణలో ప్రతి హృదయం పులకించింది. నట్టనడి రాతిరిలో పులకించింది ఈ నేల.. ఓటములు, గాయాలు, కన్నీళ్లతో అలిసిపోయిన చరిత్రలో ఒక తొలి విజయం..తెలంగాణ స్వప్నం కాదు..సత్యం అని తెలిసిన సందర్భం’ అని అభివర్ణించారు.
మహాత్ముడి బాటలో ఆమరణ దీక్షే ఆయుధంగా సంచలన విజయం సాధించిన కీర్తి కేసీఆర్‌ సొంతమని కొనియాడారు. ‘చుట్టూ చిమ్మ చీకట్లు అలుముకున్న పరిస్థితులు, ఆశలు ఆవిరైన వేళ..నిరాశానిస్పృహలు అలుముకున్న సందర్భంలో ఒకే ఒక్కడు 2001, ఏప్రిల్‌ 27న జలదృశ్యం వేదికగా మొండి ధైర్యంతో జెండా ఎగురవేసిన ధీరుడు..తన జాతి కోసం కలగని, స్వరాష్ట్రాన్ని స్వప్నించి ముందుకురికిన వీరుడు కేసీఆర్‌’ అని పేర్కొన్నారు. ‘బాలనాగమ్మ కథలో సాహసించి బాలవర్ధిరాజు తన తల్లిని కాపాడుకున్నట్టుగానే మన కథలో తెలంగాణ తల్లి సంకెళ్లను తెంచిన తనయుడు కేసీఆర్‌’ అని కీర్తించారు. పరాయి పెత్తనాన్ని, ఆధిపత్యాన్ని ధిక్కరించి నాలుగుకోట్ల జనుల ఆశలను నెరవేర్చిన ఘనత కేసీఆర్‌కే దక్కిందని కొనియాడారు.
తెలంగాణ కోసం కేసీఆర్‌ ముందడుగేసి పార్టీ పెట్టిన రోజు మఖలో పుట్టి పుబ్బలో మాయమవుతుందని ఎంతో మంది ఎగతాళి చేశారని కేటీఆర్‌ గుర్తుచేశారు. ‘ఎన్నో అవమానాలు, అవహేళనలు, వెయ్యి దాడులు, లక్ష కుట్రలు, ఎన్నో ఎదురుదెబ్బలు, అనేక ఒడిదుడుకులు, అయినా పట్టువదలకుండా ఎత్తిన జెండా దించితే రాళ్లతో కొట్టి చంపండని పిలుపునిచ్చి కేసీఆర్‌ ఉద్యమాన్ని ఎత్తుకున్నరు. విశ్వాసానికి విశ్వరూపమైన కేసీఆర్‌.. ఆంధ్రప్రదేశ్‌ నుంచి వెళ్తున్న.. తెలంగాణలోనే అడుగుపెడతా అని ప్రకటించి ఢిల్లీకి వెళ్లి ప్రత్యేక తెలంగాణను ముద్దాడారు’ అని పేర్కొన్నారు. పోరాట పంథాలో కేసీఆర్‌ అనేక ఎత్తుగడలను అవలంబించి, విశ్వాసాన్ని నూరిపోసి అనుకున్నది సాధించారని కొనియాడారు.
స్వాతంత్య్రం సిద్ధించినప్పటి నుంచి ఇప్పటివరకు తెలంగాణకు తొలి విలన్‌ కాంగ్రెస్సేనని కేటీఆర్‌ తీవ్రస్థాయిలో విరుచుకుపడ్డారు. ‘1952లో నాన్‌ముల్కీ గో బ్యాక్‌ అంటూ తిరగబడ్డ ఏడుగురు తెలంగాణ బిడ్డలను పొట్టనబెట్టుకున్నది..1969లో 369 మంది విద్యార్థులను బలితీసుకున్నది కాంగ్రెస్సే. మలిదశ పోరాటంలోనూ ఆ పార్టీది ద్రోహపు పాత్రే.. కౌరవులు, సైంధవులు, మారీచులు, విలన్లు కాంగ్రెస్‌ వాళ్లే. నాడు జేఏసీ పిలుపునిస్తే రాజీనామాలు చేయకుండా వెన్నుచూపి పారిపోయిన దుర్మార్గులు వాళ్లే. పదవుల కోసం పెదవులు మూసుకున్న నీచులు.. పత్తాలేకుండా పారిపోయిన ఉత్తరకుమారులు’ అని నిప్పులుచెరిగారు. ప్రతికథలోనూ విలన్లు ఉంటారని, తెలంగాణ కథలో కాంగ్రెస్‌ నాయకులే ప్రతినాయకులని విరుచుకుపడ్డారు.
‘జయశంకర్‌ సార్‌ మాటల్లో చెప్పాలంటే మూడు తరాలను ముంచిన పార్టీ కాంగ్రెస్‌.. రాచి రంపాన పెట్టిన పార్టీ కాంగ్రెస్‌’ అంటూ తుర్పారబట్టారు. ‘ఇచ్చిన మాట తప్పి యాదయ్య, వేణుగోపాల్‌రెడ్డి, ఇషాన్‌రెడ్డి, కానిస్టేబుల్‌ కిష్టయ్య లాంటి వేలాది మంది బిడ్డలను బలితీసుకున్నది..లేలేత పిల్లల ఉసురుపోసుకున్న పాపపు పార్టీ కాంగ్రెస్సే’ అని తీవ్రస్థాయిలో ధ్వజమెత్తారు. ఆగస్టు 15న జెండా ఎగరవేసి తెల్లదొరల దోపిడీని గుర్తుచేసుకున్నట్టే దీక్షా దివస్‌ అయిన నవంబర్‌ 29న, డిసెంబర్‌ 9న విజయ్‌ దివస్‌ నాడు, రాష్ట్ర ఆవిర్భావ దినమైన జూన్‌ 2న 60 ఏండ్లుగా కాంగ్రెస్‌ ముష్కరులు తెలంగాణను ఎలా కాల్చుకుతిన్నారో.. బిడ్డలను ఎట్లా పొట్టనబెట్టుకున్నారో గుర్తుచేసుకోవాలి’ అని తెలంగాణ ప్రజలకు పిలుపునిచ్చారు. లేదంటే చరిత్రను వక్రీకరిస్తారని, విలన్లే హీరోలమని చెప్పుకొనే ప్రమాదం ఉన్నదని హెచ్చరించారు.
స్వాతంత్య్రం సిద్ధించినప్పటి నుంచి ఇప్పటివరకు తెలంగాణకు విలన్‌ కాంగ్రెస్సే. 1952లో నాన్‌ముల్కీ గో బ్యాక్‌ అంటూ తిరగబడ్డ ఏడుగురు తెలంగాణ బిడ్డలను పొట్టనబెట్టుకున్నది.1969లో 369 మంది విద్యార్థులను బలితీసుకున్నది కాంగ్రెస్సే. మలిదశ పోరాటంలోనూ ఆ పార్టీది ద్రోహపు పాత్రే. కౌరవులు, సైంధవులు, మారీచులు, విలన్లు కాంగ్రెస్‌ వాళ్లే. ప్రతికథలో విలన్లు ఉంటరు. తెలంగాణ కథలో కాంగ్రెస్‌ నాయకులే విలన్లు.
– కేటీఆర్‌
నీళ్ల కోసం 60 ఏండ్లుగా తెలంగాణ ప్రజలు ఎంతగానో తల్లడిల్లారని కేటీఆర్‌ గుర్తుచేశారు.. జలసాధన యాత్రలు చేపట్టారని వివరించారు. గద్దెనెక్కగానే గోదావరి నీటిని మన బీళ్లలోకి మళ్లిస్తామని నాటి పాలకులు చెప్పిన మాటలు నీటిమూటలయ్యాయని, దశాబ్దాల పాటు ఎన్నో ఆందోళనలు కొనసాగాయని చెప్పారు. గోదావరిలోయలో నెత్తుటేర్లు తప్ప ఏనాడూ నీళ్లు పారలేదని గుర్తుచేశారు. అందుకే తెలంగాణ సిద్ధించిన వెంటనే గోదారమ్మను మన బీళ్లకు మళ్లించాలనే సంకల్పంతో కేసీఆర్‌ బృహత్తరమైన కాళేశ్వరం ప్రాజెక్టుకు అంకురార్పణ చేశారని పేర్కొన్నారు. మూడేండ్లలోనే మహత్తరమైన ఎత్తిపోతల ప్రాజెక్టును నిర్మించి తెలంగాణ జాతికి అంకితమిచ్చారని కొనియాడారు. కానీ తెలంగాణ జీవనాడి అయిన కాళేశ్వరంపై కాంగ్రెస్‌ నేతలు రెండేండ్లుగా దుష్ప్రచారం చేస్తున్నారని ఆవేదన వ్యక్తంచేశారు. వారి తప్పుడు మాటలను తిప్పికొట్టాలంటే నేటి యువత కాళేశ్వరం గొప్పతనాన్ని తెలుసుకోవాలని, నాడు గుక్కెడు నీటి కోసం తెలంగాణ పడ్డ వెతలు, ఈతి బాధలను గుర్తుకు తెచ్చుకోవాలని సూచించారు.
తెలంగాణ కడుపున పుట్టిన పార్టీ అయిన బీఆర్‌ఎస్‌..నాలుగుకోట్ల ప్రజలను కడుపులో పెట్టుకొని రక్షించుకుంటుందని కేటీఆర్‌ స్పష్టం చేశారు. ఉద్యమ పార్టీగా పురుడుపోసుకుని ఢిల్లీ మెడలు వంచి తెలంగాణను సాధించిన పార్టీ బీఆర్‌ఎస్‌ అని స్పష్టంచేశారు. అధికారం చేపట్టి అభివృద్ధి, సంక్షేమంలో ఆదర్శంగా నిలిపిన ఘనత బీఆర్‌ఎస్‌కే దక్కిందని చెప్పారు. నేడు ప్రతిపక్ష పాత్రలోనూ ప్రజల తరఫున వీరోచితంగా పోరాడుతున్నామని గుర్తుచేశారు. ‘బీఆర్‌ఎస్‌ చరిత్ర అంటేనే తెలంగాణ ఆత్మకథ.. 25 ఏండ్ల లాంగ్‌మార్చ్‌ మనది..స్వీయ రాజకీయ అస్తిత్వశక్తి మనది.. తెలంగాణ గళం మనమే..దళం మనమే..రక్షణ కవచం మనమే’ అని తేల్చిచెప్పారు. 125 అడుగుల అంబేద్కర్‌ విగ్రహాన్ని ప్రతిష్ఠించిన ఘనత బీఆర్‌ఎస్‌కే దక్కిందని గుర్తుచేశారు.
రెండేండ్ల కాంగ్రెస్‌ పాలనలో తెలంగాణ తల్లికి అడుగడుగునా అవమానాలు ఎదురవుతున్నాయని కేటీఆర్‌ ఆవేదన వ్యక్తంచేశారు. కేసీఆర్‌పై కోపంతో రగిలిపోతూ తెలంగాణ ఆనవాళ్లను తుడిచేస్తున్నారని ధ్వజమెత్తారు. మాయల ఫకీరుగాళ్లు తెలంగాణ తల్లి చేతిలో నుంచి బతుకమ్మను మాయం చేసి, ఒడ్డాణాన్ని తొలగించి అవమానించారని చెప్పారు. కాకతీయ కళాతోరణం, చార్మినార్‌, బతుకమ్మ వద్దని విర్రవీగుతున్నారని విమర్శించారు. తెలంగాణ ఘనత, రాజసానికి ప్రతీకలను రూపుమాపేందుకు కుట్రలు చేస్తున్నారని ఆరోపించారు. ‘కేసీఆర్‌ ఆనవాళ్లను చెరిపివేస్తామని కలలు గంటున్న నాయకులు గుర్తుంచుకోవాలి..చెరిపేయడానికి చాక్‌పీస్‌తో బ్లాక్‌ బోర్డుమీద రాసిన రాతలు కావు.. చరిత్ర చెక్కిలిమీద చెక్కిన సత్యాలు’ అని స్పష్టంచేశారు. ‘మూరెడంత లేనోడు కూడా కేసీఆర్‌పై ఇంతెత్తు ఎగిరిపడుతున్నడు. నాడు సోనియాగాంధీని బలిదేవత అని తూలనాడిన వ్యక్తి పదవి రాగానే ఆమెను కీర్తిస్తున్నడు’ అని ఎద్దేవాచేశారు.
తెలంగాణ ప్రజలు వీరులని, ఈ ప్రాంత నాయకులు మాత్రం బానిసలని కేటీఆర్‌ విమర్శించారు. అందుకే 60 ఏండ్లపాటు తెలంగాణ అరిగోసపడ్డదని గుర్తుచేశారు. నాటి నుంచి నేటి వరకు అమ్ముడుపోయిన నాయకుల వల్లే నష్టం జరుగుతున్నదని చెప్పారు. తెలంగాణ ఉద్యమం ఉధృతంగా సాగుతున్న తరుణంలో బీఆర్‌ఎస్‌ నుంచి 26 మంది ఎమ్మెల్యేలు గెలిస్తే కాంగ్రెస్‌ పార్టీ 10 మందిని ప్రలోభాలకు గురిచేసి చేర్చుకున్నదని దుమ్మెత్తిపోశారు. ఇదే పద్ధతిలో ఇప్పుడు కూడా బీఆర్‌ఎస్‌ నుంచి గెలిచిన పది మంది ఎమ్మెల్యేలు కాంగ్రెస్‌కు అమ్ముడుపోయారని ధ్వజమెత్తారు. దమ్ముంటే వారు రాజీనామా చేసి తిరిగి గెలవాలని సవాల్‌ విసిరారు.
25 ఏండ్ల ప్రస్థానం మనది.. ఏ స్థానంలో ఉన్నా ప్రజల హృదయమే మన అసలు స్థానం..ఏ పక్షంలో ఉన్నా.. మనది ప్రజాపక్షమే. బీఆర్‌ఎస్‌ చరిత్ర అంటేనే తెలంగాణ ఆత్మకథ. స్వీయ రాజకీయ అస్తిత్వశక్తి మనది. తెలంగాణ గళం మనమే..దళం మనమే.. రక్షణ కవచం మనమే.
– కేటీఆర్‌
కేసీఆర్‌ పాలనలో తెరిపిన పడ్డ తెలంగాణ రెండేండ్లలోనే తిరిగిన బానిసత్వంలోకి వెళ్లిపోయిందని కేటీఆర్‌ వాపోయారు. ఆత్మగౌరవంలేని నాయకత్వంతో రాష్ట్రం తెర్లయిపోతున్నదని ఆవేదన వ్యక్తంచేశారు. రెండు జాతీయ పార్టీల నుంచి ఎనిమిది మంది చొప్పున ఎంపీలను గెలిపించడంతో పార్లమెంట్‌లో తెలంగాణ గళం మూగబోయిందని వాపోయారు. ‘ఢిల్లీ తోలుబొమ్మలు..గుజరాత్‌ కీలుబొమ్మలు తెలంగాణ తెరపై కనిపిస్తున్నరు.. ఒకరు నెలకు మూడుసార్లు ఢిల్లీకి కప్పం కట్టివస్తున్నరు.. ఒకరు ఇంకెందుకు తెలంగాణ అనాలి అంటున్నడు’ అని మండిపడ్డారు. ఉద్యమం అంటే తెలియని పీసీసీ అధ్యక్షుడు నాడు కేసీఆర్‌ దొంగ దీక్ష చేశారని విషం గక్కడం దుర్మార్గమని, నాడు కేసీఆర్‌ది దొంగ దీక్ష అయితే డిసెంబర్‌ 9న కాంగ్రెస్‌కు చెందిన అప్పటి హోంమంత్రి చిదంబరం కేసీఆర్‌ ప్రాణాలు ముఖ్యమని ఎందుకు ప్రకటించారని ప్రశ్నించారు. ‘ఇప్పటికైనా తెలంగాణ ప్రజలు మేలుకోవాలి. సామంతులుగా ఉందామా? స్వతంత్రులుగా ఉందామా? తేల్చుకోవాలి. పోరాడి తెచ్చుకున్న తెలంగాణను మళ్లీ బానిసత్వంలోకి పోనిద్దామా? ఆలోచించుకోవాలి’ అని విజ్ఞప్తిచేశారు.
గారడీ మాటలు చెప్పి రెండేండ్ల కిందట గద్దెనెక్కిన కాంగ్రెస్‌.. తెలంగాణ అస్తిత్వాన్ని రూపు మాపేందుకు యత్నిస్తున్నదని కేటీఆర్‌ విమర్శించారు. ‘రాష్ట్రం నుంచి తెలంగాణ అమ్మను మాయం చేసి కాంగ్రెస్‌ బొమ్మను తెచ్చిపెట్టారు.. తెలంగాణ తల్లి చేతి నుంచి బతుకమ్మను తొలగించారు’ అని దుయ్యబట్టారు. దోపిడీదారులే పాలకులుగా మారి ప్రజల రక్తం పీలుస్తున్నారని మండిపడ్డారు. ‘గులాముల ఎగుర్లాట కొన్ని రోజులే..వారి దుర్మార్గపు ఆగడాలు కొంతకాలమే..వచ్చే కాలమంతా గులాబీ సేనలదే’ అని స్పష్టంచేశారు.
‘మేలుకున్న, తేరుకున్న, కోలుకున్న తెలంగాణపై మసిపూస్తం..మన్నుపోస్తం అంటే మర్లవడి తీరుతం’ అని ఘాటుగా హెచ్చరించారు. ‘ఆటుపోట్లు తట్టుకొని రాటుదేలినం.. ఎన్నో ఎత్తుపల్లాలు చూసినం.. బూడిద కుప్పలోంచి ఫీనిక్స్‌ పక్షిలా లేస్తం.. అస్తిత్వాన్ని కబళించాలని చూస్తే కలబడుతం..ఆత్మగౌరవాన్ని తొక్కాలని చూస్తే తిరుగబడుతం..అభివృద్ధిని ఆగం చేయాలని చూస్తే అగ్గిపెడుతం..సస్యశ్యామల దృశ్యాలను మాయం చేయాలని చూస్తే సమరం చేస్తం’ అంటూ హెచ్చరించారు.
‘తెలంగాణ అస్తిత్వ పతాక బీఆర్‌ఎస్‌.. చిన్న చిన్న విభేదాలు, పొరపొచ్చాలున్నా సర్దుకొని సమన్వయంతో పనిచేద్దాం’ అని పార్టీ శ్రేణులకు కేటీఆర్‌ పిలుపునిచ్చారు. అధికారం పోయిందని అధైర్యపడవద్దని..ప్రజల కోసం ధైర్యంగా పోరాడాలని సూచించారు. పరాయి పాలన పోయి కిరాయి పాలన వచ్చి తెలంగాణ ప్రజలకు కన్నీళ్లు తెచ్చిపెట్టిందని నిప్పులు చెరిగారు. ఈ పరిస్థితుల్లో కేసీఆర్‌ దీక్షాదివస్‌ స్ఫూర్తితో గులాబీ దళం కలిసికట్టుగా ముందుకు కదలాల్సిన సమయం ఆసన్నమైందని చెప్పారు. కుంభకోణాల కుంభకర్ణుల భరతంపట్టి..తెలంగాణ సింహాసనంపై కొదమసింహాన్ని కూర్చోబెట్టే దిశగా ముందుకుసాగాలని పిలుపునిచ్చారు. దీక్షాదివస్‌ స్ఫూర్తితో ప్రతిజ్ఞ చేసి కంకణబద్ధులు కావాలని విజ్ఞప్తిచేశారు.
రామాయణంలో హీరో శ్రీరాముడు..విలన్‌ రావణుడు.. భారతంలో హీరోలు పాండవులు.. విలన్లు కౌరవులు. మహాభారతం ద్వాపర యుగం నాటి గాథ.. వేల ఏండ్లు గడిచినా అరణ్యవాసం, కురుక్షేత్రం, పద్మవ్యూహం మనందరికీ తెలుసు.. ఇదే తరహాలో తెలంగాణకు సైతం మహోన్నత గతం..మహోజ్యల చరిత్ర..దోపిడీ, వివక్ష, కన్నీళ్లలో మగ్గిపోయిన వ్యథ..బానిస సంకెళ్ల చరిత్ర ఉన్నది. కథా నాయకుడు ఉన్నడు..విలన్లు ఉన్నరు.. కథానాయకుడు కేసీఆర్‌ అయితే.. విలన్‌ కాంగ్రెస్‌.
-కేటీఆర్‌
