JEE Main | ఈ నెల 24 నుంచి జేఈఈ మెయిన్‌.. ఇలా చేస్తే ఈజీగా మంచి ర్యాంక్‌

జేఈఈ మెయిన్‌-1 పరీక్షలు ఈ నెల 24 నుంచి ప్రారంభం కానున్నాయి. ఈ నెల 24న పేపర్‌-2 (ఏ) బీఆర్క్‌, పేపర్‌ -2 (బీ) బీ ప్లానింగ్‌ పేపర్లకు పరీక్ష నిర్వహించనున్నారు.

• సిలబస్‌పై పట్టు సాధించడం ముఖ్యం
• ఈ సమయంలో రివిజన్‌ బెటర్‌
• విద్యార్థులకు నిపుణుల సలహాలు
• 24 నుంచి మెయిన్‌-1 పరీక్షలు
• పేపర్‌-2 అడ్మిట్‌ కార్డులు విడుదల

JEE Main | హైదరాబాద్‌, జనవరి 21 (నమస్తే తెలంగాణ): జేఈఈ మెయిన్‌-1 పరీక్షలు ఈ నెల 24 నుంచి ప్రారంభం కానున్నాయి. ఈ నెల 24న పేపర్‌-2 (ఏ) బీఆర్క్‌, పేపర్‌ -2 (బీ) బీ ప్లానింగ్‌ పేపర్లకు పరీక్ష నిర్వహించనున్నారు. ఈ నేపథ్యంలో ఆదివారం నేషనల్‌ టెస్టింగ్‌ ఏజెన్సీ అడ్మిట్‌ కార్డులను విడుదల చేసింది. విద్యార్థులు అప్లికేషన్‌ నంబర్‌, పుట్టిన తేదీ, సెక్యూరిటీ పిన్‌ను ఎంటర్‌చేసి అడ్మిట్‌కార్డులను పొందవచ్చు. ఇక పేపర్‌ -1 (బీటెక్‌) పరీక్షలు ఈ నెల 27 నుంచి ప్రారంభం అవుతాయి. వీటిని 27, 29, 30, 31, ఫిబ్రవరి 1 తేదీల్లో నిర్వహిస్తారు. పరీక్షల నేపథ్యంలో నిపుణుల సూచిస్తున్న జాగ్రత్తలు ఇవీ..

సూచనలు, సలహాలు

• ప్రశ్నలను క్షుణ్ణంగా పరిశీలించాలి. గుడ్డిగా అంచనా వేసి ఆన్సర్లు చేయవద్దు. రాని ప్రశ్నను పట్టుకుని, సమయం వృథా చేసుకోవద్దు.
• పట్టున్న అంశాలపైనే దృష్టిపెట్టడం మంచిది. లేకపోతే సమయం వృథా అవుతుంది. పరీక్షకు సమయం లేనందున రివిజన్‌ మాత్రమే చేస్తే బెటర్‌.
• ఈ రెండు రోజుల్లో మాక్‌ టెస్టులు రాయటం మంచిది.
• ప్రతి సబ్జెక్టులో రెండో సెక్షన్‌లో ఇచ్చే న్యుమరికల్‌ ప్రశ్నలకు మాత్రమే చాయిస్‌ ఉంటుంది. మొదటి సెక్షన్‌లోని ఆబ్జెక్టివ్‌ ప్రశ్నలకు చాయిస్‌ లేదు.
• నిపుణుల అంచనా ప్రకారం 40 శాతం ప్రశ్నలు నేరుగా ఫార్ములా బేస్డ్‌, మరో 40 శాతం పాత ప్రశ్నపత్రాల నుంచి, 10 శాతం ప్రశ్నలు పాత జేఈఈ అడ్వాన్స్‌డ్‌ నుంచి, మిగతా ప్రశ్నలు ఎక్కువ సమయం పట్టేవి ఇస్తున్నారు.
• విద్యార్థుల్లో అత్యధికులు స్టేట్‌మెంట్స్‌ (వ్యాఖ్యానాలు), అసెర్షన్‌ (ధ్రువీకరణలు), రీజన్స్‌ (కారణాలు) తరహా ప్రశ్నల్లో తప్పులు చేస్తున్నారు. ఈ తప్పు జరగకుండా ఫార్ములాలను గుర్తుంచుకోవటం మంచిది.

కొత్త చాప్టర్ల జోలికెళ్లొద్దు
పరీక్షలు సమీపించినందున అన్ని చాప్టర్స్‌ను ఈ సమయంలో ముందేసుకోవద్దు. కొత్త చాప్టర్ల జోలికెళ్లొద్దు. గణితంలో 15, ఫిజిక్స్‌లో 20, కెమిస్ట్రీలో 20 ప్రశ్నలు రాసేలా రివిజన్‌ చేయాలి. జంక్‌ఫుడ్‌కు దూరంగా ఉండండి. పండ్ల రసాలు, పండ్లు వంటి సాఫ్ట్‌ఫుడ్‌ మాత్రమే తీసుకోవడం మంచిది. గణితంలో సెట్‌ రిలేషన్‌, సిరీస్‌, త్రీడీ జామెట్రీ, వెక్టార్స్‌ ఆల్జీబ్రా, కాంప్లెక్స్‌ నంబర్స్‌ వంటి సబ్జెక్టులను రివిజన్‌ చేయడం ఉత్తమం.
– ఎం నాగభూషన్‌రావు, గణితం సబ్జెక్టు నిపుణుడు

పరీక్ష రోజే అత్యంత కీలకం
ఈ సారి సిలబస్‌ను మార్చారు. కొన్నింటిని తొలగించి, మరికొన్నింటిని కలిపారు. ఇప్పటికే ప్రిపేర్‌ అయిన విద్యార్థులకు ఇది నష్టం చేకూరుస్తుంది. అయితే సిలబస్‌ నుంచి తొలగించిన పాఠ్యాంశాల నుంచి గతంలో కఠినమైన ప్రశ్నలొచ్చేవి. వాటినిప్పుడు తొలగించారు. కెమిస్ట్రీ నుంచి అధ్యాయాలను ఎక్కువగా తీసేశారు. ఇది విద్యార్థులకు కాస్త ఉపశమనం. మ్యాథమెటికల్‌ రీజనింగ్‌ నుంచి గతంలో 99 శాతం ఒక ప్రశ్న వచ్చేది. కానీ ఇప్పుడు పాఠ్యాంశాన్ని తొలగించారు. ఇలాంటివి చాలా పాఠ్యాంశాలున్నాయి. పరీక్ష రోజు ప్రశాంతంగా ఉండాలి. ఎట్టి పరిస్థితుల్లో అత్యుత్సాహంతో తెలిసిన ప్రశ్నలకు తప్పులు చేయవద్దు.
– ఎం ఉమాశంకర్‌, ఆలిండియా ఐఐటీ కో ఆర్డినేటర్‌, శ్రీచైతన్య విద్యాసంస్థలు