Gurukula Schools | గురుకులం కన్నా జైలు నయం.. ఉదయం నుంచి రాత్రి వరకు 16 గంటల షెడ్యూల్‌!

రాష్ట్రంలోని గురుకుల సొసైటీలన్నింటికీ ఇటీవల కాంగ్రెస్‌ ప్రభుత్వం ఖరారు చేసిన పనివేళలు జైలు మాన్యువల్‌ కన్నా దారుణంగా ఉన్నాయన్న విమర్శలు వెల్లువెత్తుతున్నాయి. జైల్లో ఖైదీలకు వర్తింపజేసేట్టు విద్యార్థులకు టైం టేబుల్‌ అమలు చేయటంపై అసహనం వ్యక్తం అవుతున్నది. ఉదయం 5 గంటలకే నిద్రలేపి.. రాత్రి 9 గంటల వరకు విశ్రాంతి లేకుండా, వ్యక్తిగత సమయం ఇవ్వకుండా చేయటంతో విద్యార్థులు అలసిపోతున్నారు.

• కారాగారాల టైంటేబుల్‌ కన్నా దారుణంగా పనివేళలు
• తరగతుల్లోనే విద్యార్థుల నిద్ర.. బుర్రకెక్కని పాఠాలు
• కరువైన వ్యక్తిగత సమయం.. తీవ్ర మానసిక ఒత్తిడి

Gurukula Schools | హైదరాబాద్‌, ఆగస్టు 26 (నమస్తే తెలంగాణ): రాష్ట్రంలోని గురుకుల సొసైటీలన్నింటికీ ఇటీవల కాంగ్రెస్‌ ప్రభుత్వం ఖరారు చేసిన పనివేళలు జైలు మాన్యువల్‌ కన్నా దారుణంగా ఉన్నాయన్న విమర్శలు వెల్లువెత్తుతున్నాయి. జైల్లో ఖైదీలకు వర్తింపజేసేట్టు విద్యార్థులకు టైం టేబుల్‌ అమలు చేయటంపై అసహనం వ్యక్తం అవుతున్నది. ఉదయం 5 గంటలకే నిద్రలేపి.. రాత్రి 9 గంటల వరకు విశ్రాంతి లేకుండా, వ్యక్తిగత సమయం ఇవ్వకుండా చేయటంతో విద్యార్థులు అలసిపోతున్నారు. దాంతో తరగతి గదుల్లో క్లాసులు జరుగుతుండగానే నిద్ర వచ్చేస్తున్నది. అటు పాఠాలు కూడా బుర్రకు ఎక్కడం లేదు. ప్రభుత్వం మార్చిన పనివేళలతో విద్యార్థులు విపరీతమైన ఇబ్బందులు ఎదుర్కొంటున్నారని ఉపాధ్యాయులు వాపోతున్నారు. టైం టేబుల్‌ అమలు ఆచరణ సాధ్యం కాదని పేర్కొంటున్నారు. అనేక గురుకులాలు ప్రైవేటు భవనాల్లోనే ఉన్నాయని, అందులో బాత్రూంలు, నీళ్లు, వంటగది తదితర వసతులు సరిపడా లేవని, బ్రేక్‌ఫాస్ట్‌ రెడీ అయ్యే వరకు విద్యార్థులను పరిగడుపున తరగతి గదిలో కూర్చొబెట్టి క్లాస్‌ చెప్పాల్సి వస్తున్నదని, తిరిగి క్లాస్‌ మధ్యలో బ్రేక్‌ఫాస్ట్‌కి పంపాల్సిన పరిస్థితి నెలకొన్నదని వివరిస్తున్నారు. విద్యార్థులు తీవ్ర ఒత్తిడికి లోనై, మానసిక స్థితిపై దెబ్బ పడుతున్నదని తెలిపారు. ప్రభుత్వం ఈ పనివేళల ఉత్తర్వులను ఉపసంహరించుకోవాలని గురుకుల ఉపాధ్యాయ, ఉద్యోగ సంఘాలు ముక్తకంఠంతో డిమాండ్‌ చేస్తున్నాయి.

పనివేళలను శాస్త్రీయంగా నిర్ణయించాలి

గురుకుల పాఠశాలల పనివేళలు విద్యార్థుల మానసిక వికాసానికి తగిన విధంగా ఉండాలని, టీచర్లు ఒత్తిడి లేకుండా పనిచేసేలా శాస్త్రీయంగా నిర్ణయించాలని టీఎస్‌యూటీఎఫ్‌ రౌండ్‌టేబుల్‌ సమావేశంలో వక్తలు డిమాండ్‌ చేశారు. ‘గురుకులాల పనివేళలు-విద్యార్థులపై ప్రభావం’ అంశంపై తెలంగాణ ఐక్య ఉపాధ్యాయ ఫెడరేషన్‌ (టీఎస్‌యూటీఎఫ్‌) రాష్ట్ర కమిటీ రౌండ్‌టేబుల్‌ సమావేశాన్ని నిర్వహించింది. ఫెడరేషన్‌ అధ్యక్షుడు జంగయ్య అధ్యక్షతన కొనసాగిన సమావేశంలో వక్త లు మాట్లాడుతూ విద్యార్థులకు అనుగుణంగా పనివేళలను సవరించాలని డిమాం డ్‌ చేశారు. సమావేశంలో టీఎస్‌యూటీఎఫ్‌ ప్రధాన కార్యదర్శి చావ రవి, కోశాధికారి లక్ష్మిరెడ్డి, టీపీటీఎఫ్‌ ప్రధాన కార్యదర్శి నాగిరెడ్డి పాల్గొన్నారు.

గురుకులాల కామన్‌ టైంటేబుల్‌

• ఉదయం 5-5.15 గంటలకు నిద్రలేవాలి.
• 5.15-6 గంటల వరకు యోగ, వ్యాయామం,
• 6-7 గంటల వరకు కాలకృత్యాలు
• 7-7.45 గంటల వరకు అల్పాహారం
• 7.45-8 గంటల వరకు కిచెన్‌ ఇన్‌స్పెక్షన్‌
• 8-8.15 గంటల వరకు ప్రేయర్‌
• 8.15 గంటల నుంచి ప్రతి 45 నిమిషాల చొప్పున 11.15 గంటల వరకు 4 క్లాస్‌ల నిర్వహణ
  (10 నిమిషాల స్వల్ప విరామం)
• 11.25 గంటలకు క్లాస్‌లు ప్రారంభం మధ్యాహ్నం 12.45 గంటల వరకు 2 క్లాస్‌ల నిర్వహణ.
• మధ్యాహ్నం 12.45-1.30 గంటల వరకు 5, 6, 7 తరగతుల విద్యార్థులకు లంచ్‌
• 1.45-2.30 గంటల వరకు 5, 6, 7 తరగతుల విద్యార్థులకు పర్సనల్‌ టైం
• 12.45-1.25 గంటల వరకు 8వ తరగతి నుంచి ఆ పైతరగతులకు 7వ పీరియడ్‌
• 1.25-2.15 గంటల వరకు లంచ్‌
• 2.15-2.30 గంటల వరకు పైతరగతుల విద్యార్థులకు పర్సనల్‌ టైం
• మధ్యాహ్నం 2.30-4.30 గంటల వరకు క్లబ్‌ యాక్టివిటీస్‌, ప్రాజెక్ట్స్‌, కోకరిక్యులర్‌ యాక్టివిటీస్‌
• సాయంత్రం 4.30-4.45 గంటల వరకు స్నాక్స్‌
• సాయంత్రం 4.45-5.45 గంటల వరకు స్పోర్ట్స్‌
• సాయంత్రం 5.45-6 గంటల వరకు రోల్‌కాల్‌
• 6.15 వరకు పర్సనల్‌ టైం
• రాత్రి 6.15-7 గంటల వరకు డిన్నర్‌
• రాత్రి 9 గంటల వరకు స్టడీ అవర్స్‌
• ఆ తర్వాత విద్యార్థులకు నిద్రకు ఉపక్రమించాలి.