Job Interviews | ఉద్యోగాల భర్తీలో మళ్లీ ఇంటర్వ్యూలు.. డిగ్రీ లెక్చరర్ల భర్తీకి కొత్త విధానం

Job Interviews | ఉద్యోగాల భర్తీలో ఇంటర్వ్యూలు అంటేనే అన్యాయాలు, అసమానతలకు అవకాశమివ్వడం. వివక్ష, ప్రాంతీయతత్వం, ఆశ్రితపక్షపాతం, అవకతవకలు.. పైరవీలకు కేరాఫ్‌ అడ్రస్‌. పోస్టుకు ఇంత అని బహిరంగంగా విక్రయించేందుకు మార్గం సుగమం చేయడమే. స్థూలంగా ప్రతిభకు పాతరేయడం. ఇలాంటి వివాదాస్పద ఇంటర్వ్యూ విధానాన్ని కాంగ్రెస్‌ సర్కార్‌ తిరిగి ప్రవేశపెట్టింది.

Job Interviews | హైదరాబాద్‌, మార్చి 9 (నమస్తే తెలంగాణ) : ఉద్యోగాల భర్తీలో ఇంటర్వ్యూలు అంటేనే అన్యాయాలు, అసమానతలకు అవకాశమివ్వడం. వివక్ష, ప్రాంతీయతత్వం, ఆశ్రితపక్షపాతం, అవకతవకలు.. పైరవీలకు కేరాఫ్‌ అడ్రస్‌. పోస్టుకు ఇంత అని బహిరంగంగా విక్రయించేందుకు మార్గం సుగమం చేయడమే. స్థూలంగా ప్రతిభకు పాతరేయడం. ఇలాంటి వివాదాస్పద ఇంటర్వ్యూ విధానాన్ని కాంగ్రెస్‌ సర్కార్‌ తిరిగి ప్రవేశపెట్టింది. డిగ్రీ లెక్చరర్‌ పోస్టుల భర్తీలో ఇంటర్వ్యూలను పునరుద్ధరించింది. ఇదే తరహాలో మిగిలిన ఉద్యోగాల భర్తీలో ఇంటర్వ్యూలను ప్రవేశపెట్టబోతున్నది. దీనిపై నిరుద్యోగులు, జేఏసీ నేతలు మండిపడుతున్నారు. దీన్ని ఇంటర్వ్యూల పేరిట తమకు అనుకూలంగా ఉన్నవారికి ప్రభుత్వ ఉద్యోగాలను కట్టబెట్టే కుట్రగా అభివర్ణిస్తున్నారు.

రద్దుచేసిన కేసీఆర్‌

ప్రభుత్వ డిగ్రీ కాలేజీల్లో అసిస్టెంట్‌ ప్రొఫెసర్‌, లైబ్రేరియన్‌, ఫిజికల్‌ డైరెక్టర్‌ పోస్టుల భర్తీకి ప్రభుత్వం కొత్త విధానాన్ని ప్రకటించింది. జీవో-4 ద్వారా ఇంటర్వ్యూలను పునరుద్ధరించింది. పైగా ఈ పోస్టులను టీజీపీఎఎస్సీ ద్వారానే భర్తీచేస్తామన్నది. అనేక అక్రమాలకు చోటు కల్పిస్తున్న ఇంటర్వ్యూ విధానాన్ని గత కేసీఆర్‌ సర్కార్‌ ఎత్తివేసింది. 2022 ఏప్రిల్‌ 11న జీవో- 47 ద్వారా టీజీపీఎస్సీలో భర్తీ చేసే అన్ని రకాల, అన్ని క్యాటగిరీ ఉద్యోగాల భర్తీకి ఇంటర్వ్యూలను రద్దుచేసింది. దీంతో గ్రూప్‌ -1, గ్రూప్‌ -2, జూనియర్‌ లెక్చరర్‌, డిగ్రీ లెక్చరర్‌ వంటి పోస్టులను పారదర్శకంగా, ప్రతిభ ఆధారంగానే భర్తీ చేసే అవకాశం ఏర్పడింది. ఐఏఎస్‌ పోస్టు తర్వాత అంతటి ప్రాధాన్యం గల గ్రూప్‌-1లో లేనిది అసిస్టెంట్‌ ప్రొఫెసర్‌, లైబ్రేరియన్‌, ఫిజికల్‌ డైరెక్టర్‌ పోస్టుల భర్తీకి ఇంటర్వ్యూలను పెట్టడంపై నిరుద్యోగులు మండిపడుతున్నారు.

వివక్షకు నిదర్శనం

ఉమ్మడి ఏపీ నుంచి మొదలుకుంటే ఇంటర్వ్యూ విధానంలో గతంలో అనేక అక్రమాలు జరిగాయి. 2011 గ్రూప్‌-1 రిక్రూట్‌మెంట్‌లో అనేక అవకతవకలు జరుగడంతో ఏపీపీఎస్సీ అపనిందలు మూటగట్టుకోవాల్సి వచ్చింది. 2007 గ్రూప్‌ -1లోనూ ఇదే జరిగింది. 2007 గ్రూప్‌ -1 రాతపరీక్షలో రెండో ర్యాంక్‌ వచ్చిన వ్యక్తికి ఇంటర్వ్యూలో 20 మార్కులే వేశారు. దీంతో డిప్యూటీ కలెక్టర్‌ కావాల్సిన అభ్యర్థి ఆర్టీవో ఉద్యోగంతో సరిపెట్టుకోవాల్సి వచ్చింది. అదే రాయలసీమ అభ్యర్థులకు ఇంటర్వ్యూలో 85 మార్కులు వేశారు. తెలంగాణలోని కొందరు అభ్యర్థులకు 13, 15మార్కులే వేయడంతో వారంతా ఉన్నత ఉద్యోగాలు పొందలేకపోయారు. ఇలాంటి వివక్షకు తావు లేకుండా.. పక్షపాతానికి అవకాశం లేకుండా.. ఉద్యోగాల భర్తీ అత్యంత పారదర్శకంగా జరగాలని అస్తవ్యస్తమైన విధానం తెలంగాణలో ఉండరాదన్న సదుద్దేశంతోనే కేసీఆర్‌ సర్కార్‌ ఇంటర్వ్యూలను రద్దు చేసింది.

ఒకే పోస్టు.. రెండు విధానాలు

యూజీసీ మార్గదర్శకాలను అనుసరించి కొత్త విధానాన్ని అనుసరించినట్టు ప్రభుత్వం పేర్కొన్నది. యూజీసీ మార్గదర్శకాల్లో ఎక్కడా రాత పరీక్ష గురించి ప్రస్తావనే లేదు. మరీ ప్రభుత్వ డిగ్రీ కాలేజీల్లో అసిస్టెంట్‌ ప్రొఫెసర్‌, లైబ్రేరియన్‌, ఫిజికల్‌ డైరెక్టర్‌ పోస్టుల భర్తీకి రాత పరీక్ష ఎందుకన్న వాదనలు వినిపిస్తున్నాయి. కొంతకాలం క్రితం యూనివర్సిటీల్లో అసిస్టెంట్‌ ప్రొఫెసర్ల రిక్రూట్‌మెంట్‌కు జీవో-21ని ప్రభుత్వం జారీచేసింది. ఈ జీవోలో రాత పరీక్ష గురించిన ప్రస్తావనే లేదు. 70% అకాడమిక్‌ మార్కులు, 30% ఇంటర్వ్యూకు మార్కులు కేటాయించారు. డిగ్రీ కాలేజీల్లోని టీచింగ్‌ పోస్టులను సైతం అసిస్టెంట్‌ ప్రొఫెసర్‌ పేరుతోనే పిలుస్తున్నారు. వీటి భర్తీకి మాత్రం 40 మార్కులకు రాత పరీక్ష ఉంటుందని జీవో-4 ద్వారా ప్రభుత్వం ప్రకటించింది. అంటే ఒకే రాష్ట్రంలో ఒకే పోస్టుకు రెండు రకాల విధానం ఎలా ఉంటుందని నిరుద్యోగులు ప్రశ్నిస్తున్నారు.

గతంలో 500 మార్కులు.. ఇప్పుడేమో 100 మార్కులు

ఇది వరకు డిగ్రీ లెక్చరర్‌ పోస్టుల భర్తీకి 500 మార్కులుండేవి. జనరల్‌ స్టడీస్‌కు 150 మార్కులు, సబ్జెక్టుకు 300 మార్కులు (రెండు మార్కుల ప్రశ్నలు 150), మరో 50 మార్కులకు ఇంటర్వ్యూ/డెమో ఉండేది. కానిప్పుడు దీన్ని 100 మార్కులకు కుదించారు. ఈ 100 మార్కుల్లో రాత పరీక్షకు కేవలం 40 మార్కులే ఉంటాయి. ఈ 40 మార్కులకు ఒక మార్కునిచ్చే 40 ప్రశ్నలిస్తారా..? లేక అర మార్కునిచ్చే 80 ప్రశ్నలిస్తారా.? అన్న విషయంపై స్పష్టతలేదు. గతంలో సంబంధిత సబ్జెక్టులో పీజీ, నెట్‌ లేదా సెట్‌, పీహెచ్‌డీ ఉంటే సరిపోయేది. కానిప్పుడు కొత్తగా అకాడమిక్‌ మార్కులను ప్రామాణికంగా తీసుకుంటామన్నారు. అంటే డిగ్రీ, పీజీ మార్కులను లెక్కలోకి తీసుకుంటారు. మొత్తంగా ఇది గందరగోళానికి దారితీయనున్నది.

నిరుద్యోగుల అభ్యంతరాలివి

• గతంలో యూజీ, పీజీ మార్కులను పరిగణనలోకి తీసుకోలేదు. కానిప్పుడు పరిగణనలోకి తీసుకుంటున్నారు. పదేండ్ల క్రితం 50% మార్కులు రావడమే గొప్ప. కానిప్పుడు 80-90% మార్కులు సాధిస్తున్న విద్యార్థులున్నారు. దీన్ని ఎలా సర్దుబాటు చేస్తారు.
• కొన్ని వర్సిటీల్లో ఒక్కో రకంగా మార్కులేస్తున్నారు. ఓయూలో పీజీ కోర్సుల్లో గరిష్ఠంగా 80-90% మార్కులేస్తుండగా, కాకతీయ, బీఆర్‌ అంబేద్కర్‌ వంటి వర్సిటీల్లో 50-60% మార్కులు మించడంలేదు. కొన్ని డీమ్డ్‌ వర్సిటీలు, ప్రైవేట్‌ యూనివర్సిటీలు, అటానమస్‌ కాలేజీల్లోని విద్యార్థులకు అడ్డగోలు మార్కులేస్తున్నారన్న ఆరోపణలుఉన్నాయి. ఈ వ్యత్యాసం అనేక మంది అభ్యర్థులకు ఆశనిపాతంగా మారనున్నది. ఈ అన్యాయాన్ని ఎలా సవరిస్తారన్న ప్రశ్నలొస్తున్నాయి.
• గతంలో ప్రమోషన్లు, డైరెక్ట్‌ రిక్రూట్‌మెంట్‌(డీఆర్‌) కోటా 70:30 రేషియోలో ఉండేది. దీన్ని 50:50 రేషియోగా మార్చారు. పాత నోటిఫికేషన్‌ను కొనసాగిస్తారా..? లేక నిబంధనలు మార్చి కొత్త నోటిఫికేషన్‌ జారీచేస్తారా..?
• ఇటీవల ఐదు నుంచి ఆరు లక్షలు తీసుకుని కొన్ని వర్సిటీలు పీహెచ్‌డీలు జారీచేస్తున్నాయి. ఉస్మానియా, జేఎన్టీయూ వంటి ప్రతిష్టాత్మక వర్సిటీలు, సెంట్రల్‌ యూనివర్సిటీల్లో రీసెర్చ్‌ చేసి పీహెచ్‌డీ పట్టాలు పుచ్చుకున్నవారిని, ఐదారులక్షలిచ్చి పీహెచ్‌డీ పట్టాలు పుచ్చుకున్న వారిని ఒకే గాటన కట్టడం సమంజసమేనా..?
• రీసెర్చ్‌ పబ్లికేషన్స్‌కు ఆరు మార్కులు కేటాయించారు. యూజీసీ కన్సార్టియం ఫర్‌ అకాడమిక్‌ అండ్‌ రీసెర్చ్‌ ఎథిక్స్‌(కేర్‌) జర్నల్స్‌ లిస్ట్‌ను ఉపసంహరించింది. మరీ ఏ రీసెర్చ్‌ పబ్లికేషన్స్‌ను ప్రామాణికంగా తీసుకుంటారు..?