డిగ్రీలో ఇంటర్న్‌షిప్‌ ఇక తప్పనిసరి

డిగ్రీ కోర్సుల్లోని విద్యార్థులకు ఇక నుంచి ఇంటర్న్‌షిప్‌ తప్పనిసరి. మూడు, నాలుగేండ్ల డిగ్రీ విద్యార్థులు నాలుగో సెమిస్టర్‌ తర్వాత 60 నుంచి 120 గంటల పాటు పరిశ్రమల్లో ఇంటర్న్‌షిప్‌గా పనిచేయాల్సి ఉంటుంది. ఇక నాలుగేండ్ల డిగ్రీ (రిసెర్చ్‌) విద్యార్థులైతే ఒక సెమిస్టర్‌ మొత్తం ఇంటర్న్‌షిప్‌ చేయాలి.

• డ్రాఫ్ట్‌ మార్గదర్శకాలు విడుదల చేసిన యూజీసీ
• నాల్గో సెమిస్టర్‌ తర్వాత 60-120 గంటల శిక్షణ
• నాలుగేండ్ల డిగ్రీలో ఒక సెమిస్టర్‌ పూర్తిగా..
• దాని ఆధారంగానే విద్యార్థులకు క్రెడిట్లు

హైదరాబాద్‌, అక్టోబర్‌ 10 (నమస్తే తెలంగాణ) : డిగ్రీ కోర్సుల్లోని విద్యార్థులకు ఇక నుంచి ఇంటర్న్‌షిప్‌ తప్పనిసరి. మూడు, నాలుగేండ్ల డిగ్రీ విద్యార్థులు నాలుగో సెమిస్టర్‌ తర్వాత 60 నుంచి 120 గంటల పాటు పరిశ్రమల్లో ఇంటర్న్‌షిప్‌గా పనిచేయాల్సి ఉంటుంది. ఇక నాలుగేండ్ల డిగ్రీ (రిసెర్చ్‌) విద్యార్థులైతే ఒక సెమిస్టర్‌ మొత్తం ఇంటర్న్‌షిప్‌ చేయాలి. ఇందుకు క్రెడిట్స్‌ జారీ చేస్తారు.

డిగ్రీలో ఇంటర్న్‌షిప్‌పై యూనివర్సిటీ గ్రాంట్స్‌ కమిషన్‌ (యూజీసీ) మంగళవారం కీలక నిర్ణయం తీసుకొన్నది. ఇందుకు సంబంధించిన డ్రాఫ్ట్‌ మార్గదర్శకాలను విడుదల చేసింది. ఆయా మార్గదర్శకాలపై సూచనలు, సలహాలు ఇవ్వాలని కోరింది. ఇండియా స్కిల్స్‌ రిపోర్టు ప్రకారం.. 2022లో 88.6శాతం విద్యార్థులు ఇంటర్న్‌షిప్‌ల కోసం వెతుకుతున్నట్టు తేలింది. ఈ నేపథ్యంలో యూజీసీ.. డిగ్రీలో ఇంటర్న్‌షిప్‌ను తప్పనిసరి చేసింది.

మార్గదర్శకాలిలా..

• విద్యార్థులు ఇంటర్న్‌షిప్‌లో భాగంగా ట్రైనింగ్‌, షార్ట్‌టర్మ్‌రిసెర్చ్‌ ప్రాజెక్ట్‌, సెమినార్‌, ఎంటర్‌ప్రైజ్‌లు, రైతులు, సోషల్‌ ప్రాజెక్ట్‌లు, అంత్రపెన్యూర్స్‌ విజయాలను అధ్యయనం చేయాలి. ఇందుకు 2 నుంచి 4 క్రెడిట్లు జారీచేస్తారు.
• స్టార్టప్‌లు, సంబంధిత సంస్థలతో ఎంవోయూ కుదుర్చుకోవాలి. కొంతమంది విద్యార్థి బృందానికి ఇంటర్న్‌షిప్‌ సూపర్‌వైజర్‌, మెంటార్లు మార్గదర్శనం చేస్తారు.
• నాలుగేండ్ల డిగ్రీ (ఆనర్స్‌ విత్‌ రిసెర్చ్‌)లో విద్యార్థులకు 8వ సెమిస్టర్‌ అంతా ఇంటర్న్‌షిప్‌నే అమలుచేస్తారు. థీసిస్‌, ప్రాజెక్ట్‌ వర్క్‌, రిసెర్చ్‌ ప్రాజెక్ట్‌ వర్క్‌లను రూపొందించాలి. ఇందుకు 8 నుంచి 12 క్రెడిట్లు జారీచేస్తారు.