పెట్రోలింగ్‌లో కింగ్‌ ‘ఇంద్రజాల్‌’

దేశ సరిహద్దుల్లో డ్రోన్‌ దాడులను సమర్థవంతంగా నిలువరిస్తూ గస్తీ కాసేందుకు ఉపయోగపడేలా యాంటీ డ్రోన్‌ పెట్రోలింగ్‌ వాహనం ‘ఇంద్రజాల్‌'ను హైదరాబాద్‌కు చెందిన ఆంత్రప్రెన్యూర్‌ కిరణ్‌రాజు రూపొందించారు.

• 10 కి.మీ పరిధిలోని డ్రోన్లపై నిఘా
• 4 కి.మీ పరిధిలోని డ్రోన్ల బ్లాస్టింగ్‌
• ఎంతటి డ్రోన్‌నైనా వశపర్చుకునే శక్తి
• యాంటీ పెట్రోలింగ్‌కు వాహనం
• హైదరాబాద్‌ యువకుడి ఆవిష్కరణ

హైదరాబాద్‌, నవంబర్‌ 26 (నమస్తే తెలంగాణ): దేశ సరిహద్దుల్లో డ్రోన్‌ దాడులను సమర్థవంతంగా నిలువరిస్తూ గస్తీ కాసేందుకు ఉపయోగపడేలా యాంటీ డ్రోన్‌ పెట్రోలింగ్‌ వాహనం ‘ఇంద్రజాల్‌’ను హైదరాబాద్‌కు చెందిన ఆంత్రప్రెన్యూర్‌ కిరణ్‌రాజు రూపొందించారు. డ్రోన్‌ దాడుల నుంచి ప్రజలను కాపాడుతూ, శత్రుడ్రోన్లను పేల్చే పరిజ్ఞానంతో ఈ వాహనాన్ని తయారు చేశారు. బుధవారం హైదరాబాద్‌ టీహబ్‌లో ఇంద్రజాల్‌ డ్రోన్‌ డిఫెన్స్‌ సంస్థ లెఫ్టినెంట్‌ జనరల్‌ దేవేంద్ర ప్రతాప్‌పాండే చేతుల మీదుగా ‘ఇంద్రజాల్‌’ను ఆవిష్కరించారు. ఈ వాహనం ఆర్టిఫిషియల్‌ ఇంటెలిజెన్స్‌తో పనిచేస్తుందని రూపకర్తలు తెలిపారు.

‘ఇంద్రజాల్‌’తో ప్రయోజనాలు

• కదులుతున్న డ్రోన్‌లను గుర్తించడం, కచ్చితమైన పర్యవేక్షణ, నిఘా, ఆర్టిఫిషియల్‌ ఇంటెలిజెన్స్‌ ద్వారా ము ప్పును అంచనా వేసి, అడ్డుకోవడం.
• సరిహద్దుల నుంచి నగరాల వరకు నిరంతరాయ పర్యవేక్షణ సామర్థ్యం. రోడ్డు మార్గాలు, నీటి కాలువలు, వ్యవసాయ క్షేత్రాలను పర్యవేక్షించగల పనితనం.
• 10 కి.మీ పరిధిలో డ్రోన్లపై నిఘా పెట్టడంతోపాటు, 4 కి.మీ పరిధిలో డ్రోన్లు పేల్చగల సామర్థ్యం.
• సరిహద్దు ప్రాంతాల్లో మత్తు పదార్థాల రవాణాను అడ్డుకోవడం. ఆయుధాలు రాకుండా పూర్తిగా అడ్డుకట్ట వేయడం.

దేశ అంతర్గత భద్రతలో కీలకం
ఈ వాహనం భారతదేశ అంతర్గత భద్రతను బలోపేతం చేయడంలో కీలకంగా మారనుంది. అక్రమ రవాణా(స్మగ్లింగ్‌)తోపాటు, డ్రోన్ల చొరబాటును నిలువరించగలదు. భారతీయుల స్వేచ్ఛను రక్షించడమే ‘ఇంద్రజాల్‌’ ప్రాథమిక లక్ష్యం.
-కిరణ్‌రాజు, ఇంద్రజాల్‌ సంస్థ ఫౌండర్‌

భవిష్యత్తుకు రక్షణ కవచం
దేశ యువతను అంతర్జాతీయ నేర ముఠాల నుంచి రక్షించేందుకు ఈ వాహనం ఉపయోగపడనుంది. యాంటీ డ్రోన్‌ పెట్రోల్‌ వాహనం వంటి సాంకేతిక పరికరాలు కేవలం యంత్రాలు మాత్రమే కావు. అవి మన పిల్లలు, రైతులు, భవిష్యత్తును కాపాడే రక్షణ కవచాలు. -దేవేంద్ర ప్రతాప్‌పాండే, లెఫ్టినెంట్‌ జనరల్‌