బీమా.. దరఖాస్తులతోనే సరి!
రాష్ట్రంలో మరోసారి కాంగ్రెస్ మార్క్ దరఖాస్తుల పండుగ వచ్చింది! గతంలో ఆరు గ్యారెంటీలు, ఇందిరమ్మ ఇండ్ల కోసం రోజుల తరబడి పడిగాపులు కాసి దరఖాస్తు చేసుకున్న ప్రజలు.. ఇప్పుడు ‘ఇందిరమ్మ కుటుంబ బీమా పథకం’ కోసం మరోసారి దరఖాస్తులు చేసుకోవాల్సిన పరిస్థితి ఏర్పడింది.
- ఆరంభంలోనే ఇందిరమ్మ బీమా పథకం అమలుపై నీలినీడలు
- అంతా దాపరికం.. అయోమయం..
- ఇవాళ్టినుంచి దరఖాస్తుల ప్రహసనం
- ఎప్పటినుంచి అమలో స్పష్టత ఏది?
- ప్రీమియమెంత? ఏసంస్థతో ఒప్పందం?
- మరణిస్తే ఎన్ని రోజుల్లో పరిహారం?
- దరఖాస్తులకు చివరి తేదీ ఎప్పుడు?
- మార్గదర్శకాలు విడుదల చేయని వైనం
- నేడు సిద్దిపేటలో ప్రారంభించనున్న రాష్ట్ర ముఖ్యమంత్రి రేవంత్రెడ్డి
- ఇందిరమ్మ బీమాలో కుటుంబంలోని ఒక్కరికే బీమా అమలు చేసేది
హైదరాబాద్, నవంబర్ 18 (నమస్తే తెలంగాణ): రాష్ట్రంలో మరోసారి కాంగ్రెస్ మార్క్ దరఖాస్తుల పండుగ వచ్చింది! గతంలో ఆరు గ్యారెంటీలు, ఇందిరమ్మ ఇండ్ల కోసం రోజుల తరబడి పడిగాపులు కాసి దరఖాస్తు చేసుకున్న ప్రజలు.. ఇప్పుడు ‘ఇందిరమ్మ కుటుంబ బీమా పథకం’ కోసం మరోసారి దరఖాస్తులు చేసుకోవాల్సిన పరిస్థితి ఏర్పడింది. ఇందిరమ్మ జయంతిని పురస్కరించుకొని రాష్ట్రంలో ఇందిరమ్మ కుటుంబ బీమా పథకం, ఇందిరమ్మ చీరల పంపిణీ కార్యక్రమాన్ని సిద్దిపేట వేదికగా ప్రారంభిస్తామని ముఖ్యమంత్రి రేవంత్రెడ్డి ప్రకటించారు.
కానీ, ఈ రెండు పథకాలను ‘కాంగ్రెస్ మార్క్’ పాలన అలవాటులో భాగంగా వాయిదా వేశారు. ఇందిరమ్మ పథకాన్ని కేవలం దరఖాస్తులకే పరిమితం చేయగా, చీరల పంపిణీని వాయిదా వేశారు. దీంతో ప్రారంభానికి ముందే ఇందిరమ్మ బీమా పథకంపై నీలినీడలు కమ్ముకుంటున్నాయి. గురువారం ఉదయం ప్రారంభించబోయో పథకానికి బుధవారం రాత్రి వరకూ చాలా అంశాల్లో స్పష్టత కరువైంది. ముహూర్తం సమీపిస్తున్నా, పథకానికి సంబంధించిన విధి విధానాల్లేవు. నిధుల ఊసు లేదు. దరఖాస్తులు ఎప్పుడు తీసుకుంటారు? ఎక్కడ తీసుకుంటారు? ఎప్పటివరకు తీసుకుంటారు? ఎవరు దరఖాస్తు చేసుకోవాలి? ఏ పత్రాలు జత చేయాలి? ఈ పథకానికి ఎవరు అర్హులు? ఇలా ఏ ఒక్క అంశంపైనా స్పష్టత లేదు.
ఇప్పుడు దరఖాస్తులు.. మరి అమలెప్పుడు?
ఇందిరాగాంధీ జయంతి సందర్భంగా రాష్ట్రంలో అన్ని కుటుంబాలకూ ఇందిరమ్మ బీమా పథకాన్ని అమలు చేస్తామని ఆర్నెల్లుగా సీఎం రేవంత్రెడ్డితోపాటు మంత్రులు ప్రచారం చేస్తున్నారు. కానీ, వారు చెప్పినట్టుగా ఈ పథకం గురువారం నుంచి అమలుకావడంపై సందిగ్ధత నెలకొన్నది. గురువారం నుంచి దరఖాస్తులను స్వీకరిస్తామని మాత్రమే ప్రభుత్వం ప్రకటించడమే ఇందుకు కారణం. ఇప్పుడు దరఖాస్తుల స్వీకరణ మొదలుపెడుతున్నందున పథకం అమలుకు మరో ఏడాది పట్టే అవకాశం ఉన్నదని అధికార వర్గాల్లో చర్చ జరుగుతున్నది. దరఖాస్తుల స్వీకరణకు నిర్ణీత గడువు పెట్టలేదు. అసలు ఈ దరఖాస్తుల ప్రక్రియ ఎప్పుడు పూర్తవుతుంది? క్షేత్రస్థాయిలో అధికారులు వాటిని ఎప్పుడు పరిశీలిస్తారు? అర్హుల జాబితాను ఎప్పుడు ఆమోదిస్తారు? ఆ తర్వాత బీమా బాండ్లు ఎప్పుడు జారీ చేస్తారు? అనే విషయాలపై స్పష్టత లేదు.
విధి విధానలేవి?
ఏదైనా ఒక సంక్షేమ పథకాన్ని ప్రారంభించే ముందు ప్రభుత్వం దానికి సంబంధించిన పూర్తిస్థాయి మార్గదర్శకాలను విడుదల చేయాలి. కానీ, ఇందిరమ్మ కుటుంబ బీమా పథకం ప్రారంభోత్సవానికి ముందు కేవలం ఒక నమూనా దరఖాస్తు ఫారాన్ని మాత్రమే విడుదల చేశారు. గురువారం నుంచి పథకాన్ని ప్రారంభిస్తామని ప్రకటించినప్పటికీ, ఇందుకు సంబంధించిన విధివిధానాలను ప్రభుత్వం విడుదల చేయకపోవడం గమనార్హం. 18 ఏండ్ల నుంచి 59 ఏండ్ల వయసు వారు అర్హులని, కుటుంబంలో ఒక్కరికే అవకాశం ఉంటుందని చెప్తున్నారు. కానీ, ఇందుకు మార్గదర్శకాలను విడుదల చేయలేదు. ఒకవేళ కుటుంబ పెద్ద మరణిస్తే, ఆ కుటుంబానికి ఎప్పటిలోపు రూ.5 లక్షల పరిహారం చెల్లిస్తారు? అనే అంశంపై కూడా స్పష్టత లేదు.
బీమా కంపెనీని ఎంపిక చేయకుండా.. ఎలా ?
ఇందిరమ్మ బీమా పథకం అమలు చేయాలంటే ముందుగా ఏదైనా బీమా కంపెనీతో ప్రభుత్వం ఒప్పందం కుదుర్చుకోవాలి. ఒకవేళ వ్యక్తి మరణిస్తే, అతని కుటుంబానికి ఆ సంస్థ నుంచి పరిహారం అందుతుంది. కానీ, ఇందిరమ్మ కుటుంబ బీమా పథకం అమలు కోసం ఇప్పటివరకూ ప్రభుత్వం ఏ ఇన్సూరెన్స్ కంపెనీతోనూ ఒప్పందం చేసుకోలేదు. గతంలో బీఆర్ఎస్ ప్రభుత్వం రైతుబీమా పథకం అమలు కోసం ప్రభుత్వరంగ సంస్థ ఎల్ఐసీతో ఒప్పందం చేసుకున్నది.
ప్రభుత్వమే రైతుల తరఫున ఎల్ఐసీకి ప్రీమియం చెల్లించే విధంగా, ఏ కారణంచేతనైనా రైతు మరణిస్తే ఆ కుటుంబానికి ఎల్ఐసీనే రూ.5 లక్షల పరిహారం చెల్లించేలా ఏర్పాట్లు చేసింది. కానీ, ఇప్పుడు ఇందిరమ్మ కుటుంబ బీమా పథకంలో అలాంటి ఏర్పాట్లు ఏమీలేకపోవడం గమనార్హం. ఇందిరమ్మ బీమా కింద మరణం సంభవించాక ఎన్ని రోజుల్లోగా క్లెయిమ్ పరిషరించి పరిహారం చెల్లిస్తారో ప్రభుత్వం స్పష్టత ఇవ్వలేదు. ఆ దరఖాస్తులను ఎవరు ధృవీకరించాలి? అనే అంశంపైనా స్పష్టత లేదు. దీంతో బాధిత కుటుంబాలు ప్రభుత్వ ఆఫీసుల చుట్టూ తిరుగాల్సి వస్తుంది.
ఈ ప్రశ్నలకు, అనుమానాలకు జవాబేది?
పథకం అమలుకు సంబంధించి మార్గదర్శకాలు విడుదల చేశారా? దరఖాస్తు ఎవరికి చేసుకోవాలి? దరఖాస్తు ఎక్కడ చేసుకోవాలి? దరఖాస్తుకు నిర్ణీత గడువు విధించారా? కుటుంబంలో ఒక్కరికే పథకం వర్తిస్తుందని ప్రభుత్వం ప్రకటించింది. కుటుంబంలో ఆ ఒక్కరిని ఎలా ఎంపిక చేస్తారు? గురువారం నుంచి దరఖాస్తులు మాత్రమే స్వీకరిస్తారా? లేక పథకాన్ని అమలు చేస్తారా? పథకం అమలుకు సంబంధించి బీమా కంపెనీతో ఒప్పందం జరిగిందా? ఒకవేళ పథకం అమల్లోకి వచ్చేనాటికి మరణించిన వారికి పరిహారం చెల్లిస్తరా? లేదా? మరణిస్తే ఎన్ని రోజుల్లో పరిహారం అందజేస్తారు? కుటుంబం ఎంపికకు దేనిని ప్రామాణికంగా తీసుకుంటారు? అర్హులను ఏవిధంగా గుర్తిస్తారు? పథకం వర్తించాలంటే అర్హతలేంది?
రైతుబీమాకు మంగళం… ఇందిరమ్మ బీమాతో నాటకం
బీఆర్ఎస్ ప్రభుత్వం 2018లో ప్రవేశపెట్టిన రైతుబీమా పథకం దేశ చరిత్రలోనే ఒక సువర్ణాధ్యాయంగా నిలిచింది. కారణమేదైనా సరే, రైతులు మరణిస్తే ఆ రైతు కుటుంబానికి రూ.5 లక్షల పరిహారం అందించి అండగా నిలిచేది. 2018-19 నుంచి 2023-24 వరకూ 1.33 లక్షల మంది రైతు కుటుంబాలకు రూ.6,680 కోట్ల పరిహారం అందింది. రైతు కుటుంబాలను ఆదుకుంటున్న ఈ పథకంపై దేశవ్యాప్తంగా ప్రశంసలొచ్చాయి. ఇలాంటి పథకాన్ని నీరుగార్చి, ఇప్పుడు కాంగ్రెస్ ప్రభుత్వం ఇందిరమ్మ కుటుంబ బీమా పేరుతో డ్రామాలు ఆడుతున్నదనే విమర్శలు వ్యక్తమవుతున్నాయి.
ఇందిరమ్మ కుటుంబ బీమాకూ, రైతుబీమాకూ మధ్య భారీ వ్యత్యాసం ఉన్నది. రైతుబీమా పథకంలో కుటుంబంలోని ఎంతమంది పేరుపై భూమి ఉంటే అంతమందికీ బీమా వర్తించేది. కానీ, ఇప్పుడు ఇందిరమ్మ కుటుంబ బీమాలో కుటుంబంలో ఒక్కరికి మాత్రమే వర్తిస్తుంది. అది కూడా ఎవరికి వర్తిస్తుందనే అంశంలోనూ స్పష్టతలేదు. ఈ నేపథ్యంలో ఈ పథకంపై అనేక అనుమానాలు వ్యక్తమవుతున్నాయి.
Read Today's Latest Telangana News in Telugu and Telugu News
RELATED ARTICLES
తాజా వార్తలు
ట్రెండింగ్ వార్తలు
Vande Bharat Train | బంధువులను సాగనంపేందుకు వందే భారత్ రైలు ఎక్కిన 12 మంది.. తర్వాత ఏం జరిగిందంటే?
Watch: హాస్పిటల్ యజమానిని బెదిరించి రూ.10 లక్షలు వసూలు.. కాంగ్రెస్ నేత అరెస్ట్, పార్టీ నుంచి బహిష్కరణ
Watch: ‘బ్యాగ్లో గంజాయి పెడతా.. డ్రగ్స్ కేసులో ఇరికిస్తా’.. జంటను బెదిరించిన పోలీస్ అధికారి
Migratory birds | చిలికా సరస్సుకు ప్రత్యేక అతిథులు.. ఏకంగా 80 జాతుల వలసపక్షుల సందడి.. Video
China flies electric plane | 19 సీట్ల ఎలక్ట్రిక్ విమానం.. విజయవంతంగా నడిపి పరీక్షించిన చైనా

