Pesticides | రైతన్నా జర భద్రం.. ఇబ్బడి ముబ్బడిగా పురుగుల మందు వాడితే ఎన్నో అనర్థాలు

యాసంగి సీజన్‌లో పంటల సస్యరక్షణ చర్యలు తీసుకుని, పంట ఆరోగ్యంగా పెరిగేలా చేయడమే లక్ష్యంగా రైతులు ముందుకు వెళ్లాల్సిన అవసరం ఉన్నది. వరి, మొక్కజొన్న, కంది, పప్పుదినుసులు, వేరుశెనగ తదితర పంటలు ఏపుగా పెరిగే సమయంలో ఎరువులతో పాటు పురుగుల మందులను (Pesticides) కూడా వాడాల్సి ఉంటుంది.

ఇబ్రహీంపట్నం, ఫిబ్రవరి 10: యాసంగి సీజన్‌లో పంటల సస్యరక్షణ చర్యలు తీసుకుని, పంట ఆరోగ్యంగా పెరిగేలా చేయడమే లక్ష్యంగా రైతులు ముందుకు వెళ్లాల్సిన అవసరం ఉన్నది. వరి, మొక్కజొన్న, కంది, పప్పుదినుసులు, వేరుశెనగ తదితర పంటలు ఏపుగా పెరిగే సమయంలో ఎరువులతో పాటు పురుగుల మందులను (Pesticides) కూడా వాడాల్సి ఉంటుంది. పంట సాగు చేసినప్పటి నుంచి పెరిగే, కోత దశలో కూడా పురుగు, తెగుళ్లు సోకుతాయి. ఈ సమయంలో వ్యవసాయాధికారుల సలహాలు, సూచనలు తీసుకుని మందులను వాడితేనే మంచి ఫలితాలు, దిగుబడులు వస్తుంది.

కానీ, రైతులు ఎరువుల దుకాణాల యాజమానులు, పక్క రైతుల సలహాలు తీసుకుని మాత్రమే ఎరువులు, పురుగులు మందులు వాడుతున్నారు. దీంతో ఎన్నో అనర్థాలు చోటుచేసుకుంటున్నాయి. తెగులు ఒకటైతే మరొక్క ఫెస్టిపైడ్‌ను వాడటం, మోతాదుకు మించి వాడటంతో దిగుబడుల్లో తేడాలు వస్తుంటాయి. ప్రతి సీజన్‌లో రైతులు ఇటువంటి పొరపాట్లు చేస్తూ పంట నష్టపోవడం చూస్తూనే ఉంటాం. ముఖ్యంగా పురుగుల మందులు కొనుగోలు నుంచి వాటిని పంటలపై పిచికారీ చేసేంత వరకు రైతులు తగిన జాగ్రత్తలు తీసుకోవాల్సిన అవసరమున్నదని వ్యవసాయాధికారులు చెప్తున్నారు.

ఎలాంటి స్ప్రేయర్లు వాడాలి..

రైతులు తమ పంటపొలాల్లో క్రిమిసంహారక మందులు పిచికారీ చేసేందుకు వివిధ రకాల స్ప్రేయర్లు వాడుతారు. ఇందులో పవర్‌, కంప్రెషర్‌స్ప్రేయర్లు ఉంటాయి. పవర్‌ స్ప్రేయర్లు వాడకంలో మందు వినియోగం ఎక్కువ. నీటి వినియోగం తక్కువగా ఉంటుంది. వీటి ద్వారా స్ప్రే చేస్తే పంటలోని ప్రతి భాగంపై మందుపడి పురుగులు, తెగుళ్లు తొందరగా చనిపయే అవకాశం ఉంటుంది. కంప్రెషర్‌ స్ప్రేయర్లతో పిచికారీ చేసినప్పుడు చిన్నచిన్న తుంపర్లుగా మాత్రమే పంటపై పడుతుంది. పవర్‌ స్ప్రేయర్‌తో పిచికారీ చేస్తే పొగలాగా వ్యాపించి ప్రతిచోట పడుతుంది. రైతులు తెక్కువగా పవర్‌ స్ప్రేయర్లకే ప్రాధాన్యతనిస్తే మంచిది. అకేలా స్ప్రేయర్లు, చేతి పంపులు, కంప్రెషర్‌ పంపులతో ప్రయోజనం తక్కువగా ఉంటుందని నిపుణులు సూచిస్తున్నారు.

మందులు ఎక్కువగా అవసరమయ్యే పంటలు..

వాణిజ్య పంటలతో పాటు కూరగాయల పంటలకు ఎక్కువగా పురుగుల మందులను వాడుతారు. ముఖ్యంగా వరి, పత్తి, మిరప, వేరుశెనగ, కంది, పొగాకు, బెండ, కాలీప్లవర్‌, క్యాబేజీ తదితర పంటలకు క్రిమిసంహారక మందులు అవసరం ఎక్కువగా ఉంటుంది. కూరగాయల సాగులోనూ పురుగుల మందు అవసరం ఉంటుంది. కూరగాయలు, ఆకుకూర పంటలపై మోతాదుకు మించి ఫెస్టిసైడ్స్‌ వాడితే ప్రజల ఆరోగ్యాలపై తీవ్ర ప్రభావం ఉంటుంది. కాబట్టి సరైన జాగ్రత్తలు పాటించాలి.

ఆరోగ్యంపై క్రిమి సంహారక మందుల ప్రభావం అధికం..

పురుగుల మందుల వాడకం మనుషుల ఆరోగ్యంపై తీవ్ర ప్రభావాన్ని చూపుతుంది. పురుగుల మందుల ప్రభావానికి గురైన వాళ్లలో ప్రత్యుత్పత్తి, పెరుగుదలలో మార్పులు సంభవించడం హైపర్‌ యాక్టివిటీ, శరీర భాగాల మధ్య సమన్వయ లోపం, ఊపిరి తీసుకోవడం కష్టంగా మారటం, వికారం, వాంతులు, విరేచనాలు స్పృహ కోల్పోవడం లాంటివి జరుగుతాయని అధికారులు చెబుతున్నారు. ఈ మందులు వాడేటప్పుడు అత్యంత జాగ్రత్తలు తీసుకోవాలని సూచిస్తున్నారు.

మందులు కొనుగోలు చేసేటప్పుడు తీసుకోవల్సిన జాగ్రత్తలు..

• పురుగుల మందులు కొనుగోలులో ఎక్కువ దుకాణదారుడి లేదా పక్క రైతుల సూచనలు పాటించడం మానేయాలి.
• పంటకు ఆశించి పురుగా లేదా తెగులా పోషకాహార లోపమా, అనే విషయాన్ని నిర్దారణ చేసుకుని మాత్రమే పురుగుల మందును ఎంపికచేసుకోవాలి. లేకుంటే పంటకు తీవ్ర నష్టం వాటిల్లుతుంది.
• పురుగుల మందును అనేక వ్యాపార సంస్థలు వేర్వేరు పేర్లతో తయారుచేసి విక్రయిస్తారు. సాదారణ పేర్లతోపాటు వ్యాపార నామాలు కూడా రైతులు తెలుసుకోవల్సిన అవసరమున్నది.
• పురుగు మందుల డబ్బాపై త్రిభుజాకారంలో ఒక రంగు ఉంటుంది. ఎరుపురంగు ఉంటే అత్యధిక విషపూరితమైనది, పసుపురంగు ఉంటే అధిక విషపూరితం. నీలం రంగులో ఉంటే మధ్యస్త
• విషపూరితం, ఆకుపచ్చ రంగు ఉంటే స్వల్ప విషపూరితమని తెలుసుకోవాలి.
• రనైతులు వ్యవసాయశాఖ నుంచి లైసెన్స్‌ పొందిన కంపణీలు, దుకాణాల నుంచి మాత్రమే పురుగుల మందులు కొనుగోలు చేయాలి.
• కొనుగోలు చేసిన ప్రతి పురుగుల మందుకు విధిగా బిల్లు తీసుకుని భద్రపర్చుకోవాలి.
• పురుగుల మందు డబ్బాలపై గడువు తేదీని విధిగా చూడాలి. గడువు తీరిన మందులను ఎట్టి పరిస్థితుల్లోనూ కొనుగోలు చేయకూడదు. డబ్బాలకు మూతలు సరిగ్గా ఉన్నాయా లేదా ముందుగానే చూసుకోవాలి. లీకేజీ ఉన్న డబ్బాల్లోని పురుగుల మందు నాణ్యతను కోల్పోయే ప్రమాదమున్నది.
• ఆహార పదార్థాలను పురుగుల మందులను ఒకేసారి కొనుగోలు చేయకూడదు. రెండింటినీ ఒకచోట నిల్వ ఉంచరాదు.
• పురుగుల మందులు కొనుగోలు చేసిన తరలించేటప్పుడు, నిల్వ ఉంచేటప్పుడు జాగ్రత్తలు తీసుకోవాలి. ఇంటిలో కాకుండా వ్యవసాయక్షేత్రంలో ప్రత్యేక స్థలంలోనే భద్రపర్చుకోవాలి.

పిచికారీ చేసేప్పుడు..

• పురుగుల మందు ద్రావణాన్ని చేతితో కలుపకుండా కర్రతో గ్లౌజులు వేసుకుని మాత్రమే కలపాలి.
• పురుగుల మందు డబ్బాపై ఉన్న టేబుల్‌లో వివరాలను పూర్తిగా చదవాలి. అందులో సూచించిన విధంగా మాత్రమే మోతాదు ప్రకారం పురుగు మందును, నీటిని కలిపి పంటలపై పిచికారీ చేయాలి.
• రెండు, మూడు మందులను కలిపి వాడేటప్పుడు వాటి కలయిక జరుగుతుందా, లేక ఏమైనా అనర్థం జరుగుతుందా అనే విషయాన్ని తెలుసుకున్నాకే వాడాల్సి ఉంటుంది.
• మందును పిచికారీ చేసేటప్పుడు విధిగా మూతికి మాస్కు, చేతులకు గ్లౌజులు ధరించాలి.
• పిచికారీ చేసేటప్పుడు గంజిపెట్టిన దుస్తులు ధరించాలి. మందు అవశేషాలు దుస్తులపై పడినా ఆరోగ్యంపై ప్రభావం చూపదు.
• పురుగుల మందులను చల్లని వాతావరణం ఉన్నప్పుడు మాత్రమే పిచికారీ చేయాలి. అంటే ఉదయం లేదా సాయంత్రం వేళల్లో మాత్రమే చల్లాలి. తీవ్రమైన ఎండలో గానీ వర్షంలో గానీ పిచికారీ చేయరాదు.
• నిపుణులు సిఫార్సు చేసిన మోతాదులో మందు పరిమాణాన్ని సరిగ్గా కొలిచి నీటితో కలపాలి.
• గడ్డి మందుతో పురుగుల మందు కలిపి స్ప్రే చేయరాదు.
• మందు స్ప్రేచేసే సమయంలో ఆహార పదార్థాలు, పానీయాలు గానీ సేవించరాదు. మందు పిచికారీ పూర్తయ్యాక స్నానం చేసిన తర్వాత మాత్రమే, తినటం, సేవించటం చేయాలి.
• ఏదైనా సమయంలో పురుగుల మందు వల్ల హాని జరిగినట్లు అనిపిస్తే వెంటనే దగ్గరలోని వైద్యున్ని సంప్రదించాలి.
• పురుగుల మందులను పిల్లలకు, పశువులకు దూరంగా ఉంచాలి. చిన్న పిల్లలచే పిచికారీ చేయించరాదు.
• మందు పిచికారీ చేశాక డబ్బాలను భూమిలో పాతిపెట్టాలి.

మోతాదుకు మించితే పంటలకు తీరని నష్టం: శ్రవణ్‌కుమార్‌, ఏఈఓ

క్రిమిసంహారక మందులను మోతాదుకు మించి వాడితే పంటకు నష్టం. అవసరమైనంత మేరకే వాడాలి. పురుగుల మందులను ఎంత తక్కువగా వాడితే అంత మంచిది. వీటివల్ల భూమిలోని సారం తగ్గిపోయి భవిష్యత్తులో పంటలు పండే అవకాశం ఉండకుండా పోతుంది. మందులు పిచికారీ చేసేటప్పుడు తగిన జాగ్రత్తలు అవసరం. పంటకు ఏ తెగులు వచ్చిందో నిర్దారించుకుని అందుకు తగిన మందును ఎంపికచేసుకుని మాత్రమే ఉపయోగించాలి. పురుగుల మందును కలిపేటప్పుడు కూడా కొలతను విదిగా పాటించాలి. అప్పుడే పంట ఆరోగ్యంగా పెరిగి మంచి దిగుబడులు వస్తాయి.