ఉన్నత విద్యామండలిలో ఇష్టారాజ్యం

తెలంగాణ ఉన్నత విద్యామండలి ఇష్టారాజ్యంగా కీలక పదవులను సృష్టించి తమకు అనుకూలమైన వారిని నియమించుకుంటుందన్న ఆరోపణలు వినిపిస్తున్నాయి.

• కన్సల్‌టెంట్ల పేరుతో రిక్రూట్‌మెంట్‌
• వివాదాస్పదమవుతున్న నియామకాలు

హైదరాబాద్‌, డిసెంబర్‌ 10 (నమస్తే తెలంగాణ) : తెలంగాణ ఉన్నత విద్యామండలి ఇష్టారాజ్యంగా కీలక పదవులను సృష్టించి తమకు అనుకూలమైన వారిని నియమించుకుంటుందన్న ఆరోపణలు వినిపిస్తున్నాయి. కన్సల్‌టెంట్ల పేరుతో రిక్రూట్‌మెంట్‌ చేసుకోవడం వివాదాస్పదమవుతున్నది.

ఇప్పటికే నలుగురిని నియమించగా, నేడో, రేపో మరో ఇద్దరిని నియమించుకునేందుకు పావులు చకాచకా కదుపుతున్నారు. వీరిలో ఒకరిని ఓఎస్డీగా, మరొకరిని రీసెర్చ్‌ కోసం, ఒకరిని ఇండస్ట్రీ కో ఆర్డినేటర్‌గా నియమించారు. వీరికి లక్ష నుంచి రూ. 50వేల వరకు వేతనం నిర్ణయించినట్టు తెలిసింది.

డిప్యూటేషన్‌పై వర్సిటీలు, ప్రభుత్వశాఖల్లో పనిచేసే వారిని తీసుకునే వీలున్నా కన్సల్‌టెంట్ల పేరుతో నియామకాలు చేపట్టడంపై విమర్శలొస్తున్నాయి. ఉన్న త విద్యామండలి ఉన్నతాధికారి స్పందిస్తూ పరిశోధన, పరిశ్రమలను అనుసంధానించడంలో భాగంగాకొత్త వారిని నియమించుకున్నట్టు తెలిపారు.

• ఒక పోస్టులో ఓ ప్రైవేట్‌ వర్సిటీలో పనిచేసిన అసిస్టెంట్‌ ప్రొఫెసర్‌కు రీసెర్చ్‌ కన్సల్‌టెంట్‌గా దాదాపు లక్షరూపాయలకు పైగా వేతనమిచ్చి నియమించారు. ఇండస్ట్రీ కన్సల్‌టెంట్‌ను సైతం ఇలాగే నియమించారు.
• ఉన్నత విద్యామండలి చైర్మన్‌కు ఓఎస్డీగా మరొకరిని నియమించారు. వాస్తవానికి ఉన్నత విద్యామండలిలో ఈ పోస్టులేదు. కానీ ఓ వ్యక్తిని నియమించారు.
• ఎన్‌ఎస్‌ఎస్‌ స్టేట్‌ కోఆర్డినేటర్‌ అనే పోస్టు లేనేలేదు. ఈ విభాగంతో ఉన్నత విద్యామండలికి సంబంధమే లేదు. ఈ పోస్టు వర్సిటీల్లోనే ఉంటుంది. వర్సిటీ వారిగా ఎన్‌ఎస్‌ఎస్‌ కో ఆర్డినేటర్లు ఉన్నారు. వారంతా ప్రొఫెసర్లే. కానీ పోస్టులేకపోయినా ఓ మహిళను స్టేట్‌ కో ఆర్డినేటర్‌గా పెట్టి, నెలకు రూ. 50వేలకు పైగా వేతనమిస్తున్నారు.