మహిళలు సామాజిక సంపద సృష్టికర్తలు

మహిళలు సామాజిక సంపద సృష్టికర్తలు అని, దేశాభివృద్ధిలో పురుషులతో సమానంగా మహిళల భాగస్వామ్యం ఇమిడి ఉన్నదని మాజీ సీఎం, బీఆర్‌ఎస్‌ అధినేత కేసీఆర్‌ పేర్కొన్నారు.

• అంతర్జాతీయ మహిళా దినోత్సవం సందర్భంగా మాజీ సీఎం, బీఆర్‌ఎస్‌ అధినేత కేసీఆర్‌ శుభాకాంక్షలు

హైదరాబాద్‌, మార్చి 7(నమస్తే తెలంగాణ) : మహిళలు సామాజిక సంపద సృష్టికర్తలు అని, దేశాభివృద్ధిలో పురుషులతో సమానంగా మహిళల భాగస్వామ్యం ఇమిడి ఉన్నదని మాజీ సీఎం, బీఆర్‌ఎస్‌ అధినేత కేసీఆర్‌ పేర్కొన్నారు. ఆదివారం అంతర్జాతీయ మహిళా దినోత్సవం సందర్భంగా కేసీఆర్‌ మహిళలకు శుభాకాంక్షలు తెలిపారు. ఈ సందర్భంగా ఆయన మాట్లాడుతూ.. సంతానోత్పత్తి అనే అనివార్యమైన ధర్మాన్ని పాటించాల్సిన బాధ్యత స్త్రీకి ప్రకృతి కేటాయించిందని, మానవ మనుగడను కొనసాగించే ప్రత్యేక కర్తవ్యాన్ని అనేక కష్టాలతో నిర్వహిస్తున్న మహిళ త్యాగశీలి అని కేసీఆర్‌ కొనియాడారు.

అకాశంలో సగమై, అపార శక్తి సామర్థ్యాలు కలిగి ఉన్న మహిళ అన్ని రంగాల్లో పురుషుడితో సమానమైన అవకాశాలను మరింతగా అందించినప్పుడు మాత్రమే కుటుంబాభివృద్ధి సంపూర్ణమవుతుందని, తద్వారా సమాజ, దేశ, ప్రపంచాభివృద్ధి పరిఢవిల్లుతుందని కేసీఆర్‌ పేర్కొన్నారు. తెలంగాణ సాధన ఉద్యమంలో, అనంతర స్వయం పాలనలో మహిళల పాత్ర గొప్పదని తెలిపారు. మహిళా సాధికారత దిశగా వారి సంక్షేమం, ప్రగతి కోసం పదేండ్ల బీఆర్‌ఎస్‌ పాలనలో అమలు చేసిన పలు కార్యక్రమాలను ఈ సందర్భంగా స్మరించుకున్నారు. మహిళా సాధికారతను మరింత పెంచే దిశగా ప్రభుత్వాలు కృషి చేయాల్సిన అవసరమున్నదని కేసీఆర్‌ తన అభిప్రాయాన్ని వ్యక్తం చేశారు.