Visit:
హైదరాబాద్‌, ఆగస్టు 4 (నమస్తే తెలంగాణ): రాష్ట్రంలోని పలు జిల్లాల్లో భారీ వర్షం కురిసినట్టు టీఎస్‌డీపీఎస్‌ పేర్కొన్నది. వరంగల్‌ జిల్లా నెక్కొండలో అత్యధికంగా 12.65 సెంటీమీటర్ల వాన పడింది. రుతుపవనాల ప్రభావానికి తోడు ఉపరితల ద్రోణి తెలంగాణపై కొనసాగుతుండడంతో ఈ నెల ఎనిమిది వరకు పలు జిల్లాల్లో భారీ వర్షాలు కురిసే అవకాశం ఉన్నట్టు హైదరాబాద్‌ వాతావరణ కేంద్రం తెలిపింది.
శుక్రవారం కుమ్రంభీం ఆసిఫాబాద్‌, మంచిర్యాల, నిర్మల్‌, నిజామాబాద్‌, కరీంనగర్‌, పెద్దపల్లి, జయశంకర్‌ భూపాలపల్లి, భద్రాద్రి కొత్తగూడెం, వరంగల్‌, హనుమకొండ, వికారాబాద్‌, సంగారెడ్డి, కామారెడ్డి జిల్లాల్లో భారీ వర్షాలు కురిసే అవకాశం ఉన్నట్టు హైదరాబాద్‌ వాతావరణ కేంద్రం హెచ్చరిక జారీచేసింది.
