కాంగ్రెస్‌ సర్కారుపై నేతన్నల పోరుబాట

రాష్ట్రంలో చేనేత సమస్యలు పరిష్కారం కోసం నేత కార్మికులు కాంగ్రెస్‌ సర్కారుకు వ్యతిరేకంగా నిరసన కార్యక్రమాలకు శ్రీకారం చట్టారు. కాంగ్రెస్‌ అధికారంలోకి వచ్చిన తర్వాత పేరుకుపోయిన సమస్యలు పరిష్కారమయ్యేంత వరకు పోరాటం కొనసాగిస్తామని నేత కార్మిక సంఘాల నాయకులు కూరపాటి రమేశ్‌, వీ శాంతికుమార్‌ డిమాండ్‌ చేశారు.

• 20న కలెక్టరేట్ల ముట్టడి
• 25న భారీ బహిరంగ సమావేశం
• సమస్యలు పరిష్కారమయ్యేంత వరకు పోరాటం కొనసాగింపు
• నేత కార్మికుల సంఘం స్పష్టీకరణ

హైదరాబాద్‌, జనవరి 16 (నమస్తే తెలంగాణ): రాష్ట్రంలో చేనేత సమస్యలు పరిష్కారం కోసం నేత కార్మికులు కాంగ్రెస్‌ సర్కారుకు వ్యతిరేకంగా నిరసన కార్యక్రమాలకు శ్రీకారం చట్టారు. కాంగ్రెస్‌ అధికారంలోకి వచ్చిన తర్వాత పేరుకుపోయిన సమస్యలు పరిష్కారమయ్యేంత వరకు పోరాటం కొనసాగిస్తామని నేత కార్మిక సంఘాల నాయకులు కూరపాటి రమేశ్‌, వీ శాంతికుమార్‌ డిమాండ్‌ చేశారు.

ఈ సందర్భంగా ఈ నెల 20న జిల్లా కలెక్టరేట్ల ముట్టడించి, ధర్నా తదితర కార్యక్రమాలు నిర్వహించాలని పిలుపునిచ్చారు. దశలవారీగా జరగనున్న పోరాటంలో భాగంగా వచ్చే నెల 25న భారీ బహిరంగ సమావేశం నిర్వహించనున్నట్టు తెలిపారు.

చేనేత కార్మికుల డిమాండ్లు

• చేనేత వస్త్ర పరిశ్రమ కార్మికుల కోసం ఉపాధి, సంక్షేమ, అభివృద్ధి బోర్డు ఏర్పాటు చేయాలి.
• అభివృద్ధి బోర్డులకు రూ.1,000 కోట్ల బడ్జెట్‌ కేటాయించాలి.
• ప్రతి కార్మికుడికి రూ.5 లక్షల పెట్టుబడి సాయం అందించాలి.
• కాంగ్రెస్‌ సర్కారు నిలిపివేసిన త్రిఫ్ట్‌ ఫండ్‌ పథకాన్ని తిరిగి కొనసాగించాలి.
• ఆరోగ్య బీమా పథకాన్ని అమలు చేయాలి.
• చేనేత కార్మికుల రుణాలు మాఫీ చేయాలి.
• చేనేత సహకార సంఘాలు, టెస్కోకు ఎన్నికలు నిర్వహించాలి.
• నూలు రంగుల సబ్సిడీ పథకం నగదు బదిలీ కొనసాగించాలి.
• ఇల్లులేని చేనేత కార్మికులకు హౌస్‌తో పాటు వర్క్‌షెడ్‌ పథకాన్ని పునరుద్ధరించాలి.
• టెస్కో ద్వారా చేనేత సహకార సంఘాల్లో నిల్వ ఉన్న వస్ర్తాలను కొనుగోలు చేయాలి.
• అందుకోసం ప్రభుత్వం నిధులు విడుదల చేయాలి.